'ಹುಡುಗ ಹುಡುಗಿ' ಸಿನಿಮಾ ಖ್ಯಾತಿಯ ಇಲಿಯಾನಾ ಗರ್ಭಪಾತ ಮಾಡಿಕೊಂಡ್ರಾ? ಸ್ಪಷ್ಟನೆ ನೀಡಿದ ನಟಿ!

ಕಲಾವಿದರ ಕುರಿತು ಆಗಾಗ ಸಾಕಷ್ಟು ಅಂತೆ-ಕಂತೆ ಪುರಾಣಗಳು ಕೇಳಿ ಬರುತ್ತವೆ, ಅಂತೆಯೇ ಕೆಲವೊಮ್ಮೆ ಅವು ನಿಜವಾಗಿದ್ದೂ ಇದೆ. ಹೀಗಿರುವಾಗ ತಮ್ಮ ಸುತ್ತ ಹಬ್ಬಿದ ಗಾಸಿಪ್‌ಗಳ ಬಗ್ಗೆ ಇಲಿಯಾನಾ ಮಾತನಾಡಿದ್ದಾರೆ. ಗರ್ಭಿಣಿ ಆಗಿದ್ದರು, ಗರ್ಭಪಾತ ಮಾಡಿಸಿಕೊಂಡಿದ್ರು, ಆತ್ಮಹತ್ಯೆಗೆ ಪ್ರಯತ್ನಪಟ್ಟರು ಅಂತ ಕೂಡ ಹೇಳಲಾಗಿತ್ತು. ನಿಮ್ಮ ಬಗ್ಗೆ ಕೇಳಿಬಂದ ಯಾವ ವಿಚಾರ ನಿಮಗೆ ನಗು ತರುವುದು ಎಂಬ ಪ್ರಶ್ನೆಯನ್ನು ಇಲಿಯಾನಾಗೆ ಸಂದರ್ಶನದಲ್ಲಿ ಕೇಳಲಾಗಿತ್ತು. ಆ ಬಗ್ಗೆ ಉತ್ತರ ನೀಡಿರುವ ಇಲಿಯಾನಾ "ಕೆಲವು ಗಾಸಿಪ್‌ಗಳಿವೆ. ನಾನು ಗರ್ಭಿಣಿಯಾಗಿದ್ದೆ, ಗರ್ಭಪಾತ ಮಾಡಿಸಿಕೊಂಡೆ ಅಂತ ಕೆಲವರು ಹೇಳಿದ್ದರು. ನಿಜಕ್ಕೂ ಈ ರೀತಿಯ ವಿಚಾರ ಬೇಸರ ತರಿಸುತ್ತದೆ. ಇದೆಲ್ಲ ಅಸಹಜ" ಅಂತ ಹೇಳಿದ್ದಾರೆ. "ನಾನು ಆತ್ಮಹತ್ಯೆ ಮಾಡಿಕೊಳ್ಳಲು ಪ್ರಯತ್ನಪಟ್ಟಿದ್ದೆ ಅಂತ ಕೂಡ ಕೇಳಿದೆ. ಇದೆಲ್ಲ ಕೇಳಿದಾಗ ಸಿಕ್ಕಾಪಟ್ಟೆ ಬೇಸರ ಆಗತ್ತೆ. ನಾನು ಆತ್ಮಹತ್ಯೆಗೆ ಪ್ರಯತ್ನಪಟ್ಟರೂ ಕೂಡ ಬದುಕುಳಿದೆ ಎಂದು ನನ್ನ ಸಿಬ್ಬಂದಿಯೊಬ್ಬರು ತಿಳಿಸಿದ್ದರು ಅಂತ ಕೂಡ ಸುದ್ದಿಯಾಗಿತ್ತು. ನನಗೆ ಸಿಬ್ಬಂದಿಯೇ ಇಲ್ಲ. ಈ ರೀತಿ ಅಂತೆ-ಕಂತೆ ಪುರಾಣಗಳು ಹೇಗೆ ಹುಟ್ಟಿಕೊಳ್ಳುತ್ತವೆ ಅಂತ ಅರ್ಥವಾಗೋದಿಲ್ಲ" ಎಂದು ಇಲಿಯಾನಾ ಹೇಳಿದ್ದಾರೆ. 2018ರಲ್ಲಿ ಇಲಿಯಾನಾ ಅವರು ಬಾಯ್‌ಫ್ರೆಂಡ್ ಆಂಡ್ರ್ಯೂ ನೀಬೋನ್ ಜೊತೆ ಮೊದಲ ಮಗು ನಿರೀಕ್ಷೆಯಲ್ಲಿದ್ದಾರೆ ಎಂದು ಹೇಳಲಾಗಿತ್ತು. ಈ ಎಲ್ಲ ಗಾಸಿಪ್‌ಗಳಿಗೂ ಅವರು ಈಗ ತೆರೆ ಎಳೆದಿದ್ದಾರೆ. ಇನ್ನು ಸೋಶಿಯಲ್ ಮೀಡಿಯಾದಲ್ಲಿ ಸಕ್ರಿಯರಾಗಿರುವ ಅವರು ಆಗಾಗ ಗ್ಲಾಮರಸ್ ಫೋಟೋಗಳ ಮೂಲಕ ಸೌಂಡ್ ಮಾಡುತ್ತಿರುತ್ತಾರೆ.