ಹೈ ಎಂಡ್‌ ಕಾರಿನಲ್ಲಿ ಬಂದು ಹೂವಿನ ಕುಂಡ ಕದ್ದ ಬೆಂಗಳೂರು ಮಹಿಳೆಗೆ ಶೋಧ!
ಈ ಜಗತ್ತಿನಲ್ಲೇ ವಿಭಿನ್ನ ಕಳ್ಳರು ಇರುತ್ತಾರೆ ಎನ್ನುವುದಕ್ಕೆ ಬೆಂಗಳೂರಿನ ಈ ಘಟನೆಯೇ ಪುರಾವೆ. ಹೌದು, ಬೆಂಗಳೂರಲ್ಲಿ ಮನೆ ಮುಂದೆ ಕಾಂಪೌಂಡ್ ನಲ್ಲಿಟ್ಟಿದ್ದ ಹೂಕುಂಡಗಳ ಕಳ್ಳತನವಾಗುತ್ತಿದೆ. ಮಹಿಳೆಯೊಬ್ಬರು ಹೈಫೈ ಕಾರಿನಲ್ಲಿ ಬಂದು ಎರಡು ಪಾಟ್ ಕದ್ದುಕೊಂಡು ಹೋಗಿರುವ ಘಟನೆ ನಡೆದಿದೆ. ಈ ಬಗ್ಗೆ ಸಂಪೂರ್ಣ ಮಾಹಿತಿ ಇಲ್ಲಿದೆ.
Admin
0
3
: ಲಕ್ಷಾಂತರ ಮೌಲ್ಯದ ಹೈ ಎಂಡ್‌ ಕಾರುಗಳಲ್ಲಿ ಬಂದು ಮನೆಯ ಬಳಿ ಇಡುತ್ತಿದ್ದ ಹೂವಿನ ಕುಂಡಗಳನ್ನು ಕದ್ದು ಪರಾರಿಯಾಗುತ್ತಿದ್ದ ಚಾಲಾಕಿ ಮಹಿಳೆ ಪತ್ತೆಗೆ ಬಲೆ ಬೀಸಿದ್ದಾರೆ.
ಸಂಜಯನಗರದ ಆರ್‌ಎಂವಿ 2ನೇ ಹಂತದಲ್ಲಿರುವ ಮನೆಯೊಂದರ ಕಾಂಪೌಂಡ್‌ನಲ್ಲಿದ್ದ 2 ಹೂವಿನ ಕುಂಡಗಳು ಜ.24ರಂದು ಕಳವಾಗಿದ್ದವು. ಇದು ಮನೆ ಮಾಲಕಿ ಕಾವ್ಯ ಸೆಲ್ವಂ ಗಮನಕ್ಕೆ ಬಂದು, ಮನೆಯ ಸಿಸಿ ಕ್ಯಾಮೆರಾ ಪರಿಶೀಲಿಸಿದ್ದರು. ಆ ವೇಳೆ ಐಷಾರಾಮಿ ಕಾರಿನಲ್ಲಿ ಬಂದ ಮಹಿಳೆಯೊಬ್ಬರು ಅವಸರದಲ್ಲಿ ಅತ್ತಿತ್ತ ನೋಡುತ್ತಾ ಹೂವಿನ ಕುಂಡವನ್ನು ಕದ್ದು ತಮ್ಮ ಕಾರಿನ ಡಿಕ್ಕಿಯಲ್ಲಿ ತುಂಬಿಕೊಂಡು ಪರಾರಿಯಾಗಿರುವ ದೃಶ್ಯ ಸೆರೆಯಾಗಿತ್ತು.
ಈ ದೃಶ್ಯ ಹಾಗೂ ನಡೆದ ಸಂಗತಿಯನ್ನು ಟ್ವಿಟರ್‌ನಲ್ಲಿ ಬೆಂಗಳೂರು ಪೊಲೀಸರಿಗೆ ಟ್ಯಾಗ್‌ ಮಾಡಿರುವ ಕಾವ್ಯ ಸೆಲ್ವಂ, ಸಂಜಯನಗರ ಠಾಣೆ ಪೊಲೀಸರಿಗೆ ತನಿಖೆ ನಡೆಸುವಂತೆ ಕೋರಿದ್ದಾರೆ. ಕಾರಿನ ನಂಬರ್‌ ಸಹ ಸಿಸಿಕ್ಯಾಮೆರಾದಲ್ಲಿ ದಾಖಲಾಗಿದೆ. ಕದಿಯುವ ಉದ್ದೇಶದಿಂದಲೇ ಆ ಮಹಿಳೆ ಕಾರನ್ನು ರಸ್ತೆಯ ಮಧ್ಯಭಾಗದಲ್ಲಿಯೇ ನಿಲ್ಲಿಸಿಕೊಂಡಿದ್ದರು. ಮತ್ತೊಬ್ಬರು ಕಾರು ಚಾಲನೆ ಮಾಡುತ್ತಿದ್ದರು ಎನ್ನಲಾಗಿದೆ. ಪ್ರಕರಣ ದಾಖಲಿಸಿಕೊಂಡಿರುವ ಸಂಜಯನಗರ ಪೊಲೀಸರು ಆಕೆಯ ಪತ್ತೆಗಾಗಿ ಎಲ್ಲೆಡೆ ಶೋಧ ನಡೆಸುತ್ತಿದ್ದಾರೆ.
