ಸೆಪ್ಟೆಂಬರ್‌ನಲ್ಲಿ ಏರ್‌ಟೆಲ್‌ಗೆ ಭರ್ಜರಿ 1,134 ಕೋಟಿ ರೂ. ಲಾಭ, 300% ಏರಿಕೆ
ಜುಲೈ-ಸೆಪ್ಟೆಂಬರ್‌ ತ್ರೈಮಾಸಿಕದಲ್ಲಿ ಭಾರ್ತಿ ಏರ್‌ಟೆಲ್‌ ಬರೋಬ್ಬರಿ 1,134 ಕೋಟಿ ರೂ. ನಿವ್ವಳ ಲಾಭ ಗಳಿಸಿದೆ. ಇದೇ ವರ್ಷದ ಮೊದಲ ತ್ರೈಮಾಸಿಕದ 283 ಕೋಟಿ ರೂ. ಲಾಭಕ್ಕೆ ಹೋಲಿಸಿದರೆ ಏರ್‌ಟೆಲ್‌ ಲಾಭ ಗಳಿಕೆ ಶೇ. 300ರಷ್ಟು ಏರಿಕೆ ಕಂಡಿದೆ.
Admin
0
4
ಮುಂಬಯಿ: ಸೆಪ್ಟೆಂಬರ್‌ 30ಕ್ಕೆ ಅಂತ್ಯವಾದ ತ್ರೈಮಾಸಿಕದಲ್ಲಿ ಭಾರ್ತಿ ಬರೋಬ್ಬರಿ 1,134 ಕೋಟಿ ರೂ. ನಿವ್ವಳ ಲಾಭ ಗಳಿಸಿದೆ. ಇದೇ ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಕಂಪನಿ 283 ಕೋಟಿ ರೂ. ಲಾಭ ಗಳಿಸಿತ್ತು. ಇದಕ್ಕೆ ಹೋಲಿಸಿದರೆ ಭಾರ್ತಿ ಏರ್‌ಟೆಲ್‌ ಲಾಭ ಗಳಿಕೆ ಭರ್ಜರಿ ಶೇ. 300ರಷ್ಟು ಏರಿಕೆ ಕಂಡಿದೆ.
ಜುಲೈ - ಸೆಪ್ಟೆಂಬರ್‌ ತ್ರೈಮಾಸಿಕ ಅವಧಿಯಲ್ಲಿ ಆದಾಯ ಗಳಿಕೆಯಲ್ಲಿ ಭಾರಿ ಏರಿಕೆ ದಾಖಲಾಗಿದ್ದೇ ನಿವ್ವಳ ಲಾಭ ಹೆಚ್ಚಳವಾಗಲು ಪ್ರಮುಖ ಕಾರಣವಾಗಿದೆ. ವಿಶೇಷವೆಂದರೆ ಕಳೆದ ವರ್ಷ ಇದೇ ಅವಧಿಯಲ್ಲಿ ಕಂಪನಿ ದೊಡ್ಡ ಪ್ರಮಾಣದ ನಷ್ಟ ಅನುಭವಿಸಿತ್ತು. 2020-21ರ ಸೆಪ್ಟೆಂಬರ್‌ ತ್ರೈಮಾಸಿಕದಲ್ಲಿ ಏರ್‌ಟೆಲ್‌ಗೆ 763 ಕೋಟಿ ರೂ. ನಷ್ಟವಾಗಿತ್ತು.
ಕಾರ್ಯಾಚರಣೆಗಳಿಂದ ಗಳಿಸಿದ ಆದಾಯ ಶೇ. 5.4ರಷ್ಟು ಏರಿಕೆಯಾಗಿದ್ದು 28,326 ಕೋಟಿ ರೂ.ಗೆ ಏರಿಕೆಯಾಗಿದೆ. ಜೂನ್‌ ತ್ರೈಮಾಸಿಕದಲ್ಲಿ ಸಂಸ್ಥೆ 26,853 ಕೋಟಿ ರೂ. ಆದಾಯ ದಾಖಲಿಸಿತ್ತು. ಕಳೆದ ವರ್ಷಕ್ಕೆ ಹೋಲಿಸಿದರೆ ಸಂಸ್ಥೆಯ ಆದಾಯ ಶೇ. 13ರಷ್ಟು ಏರಿಕೆಯಾಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ಕಂಪನಿಯ ಆದಾಯ 25,060 ಕೋಟಿ ರೂ.ಗಳಾಗಿತ್ತು.
"ನಾವು ಉನ್ನತ ಮಟ್ಟದ ಆರ್ಥಿಕ ನಮ್ಯತೆಯನ್ನು ಕಾಪಾಡಿಕೊಳ್ಳುವುದನ್ನು ಮುಂದುವರಿಸುತ್ತೇವೆ. ಇದರ ಪರಿಣಾಮ, ಈಗ ನಮ್ಮ ಭಾರತದ ವ್ಯವಹಾರಗಳ ಬ್ಯಾಂಕ್‌ ಸಾಲ ಶೂನ್ಯಕ್ಕೆ ಇಳಿಕೆಯಾಗಿದೆ," ಎಂದು ಭಾರ್ತಿ ಏರ್‌ಟೆಲ್‌ ವ್ಯವಸ್ಥಾಪಕ ನಿರ್ದೇಶಕ ಹಾಗೂ ಸಿಇಒ ಗೋಪಾಲ್‌ ವಿಠ್ಠಲ್ ಹೇಳಿದ್ದಾರೆ.
ಬಡ್ಡಿ, ತೆರಿಗೆ ಮತ್ತು ಡಿಪ್ರಿಸಿಯೇಷನ್‌ಗೂ ಮೊದಲು ಕಂಪನಿಯ ಆದಾಯ ಅಂದರೆ ಎಬಿಟ್ಡಾ ಆದಾಯ ಸೆಪ್ಟೆಂಬರ್‌ ತ್ರೈಮಾಸಿಕದಲ್ಲಿ 14,018 ಕೋಟಿ ರೂ. ಇದೆ.
ಇನ್ನು ಇದೇ ವೇಳೆ ಪ್ರತಿ ಗ್ರಾಹಕನಿಂದ ಕಂಪನಿ ಗಳಿಸುವ ಸರಾಸರಿ ಆದಾಯ (ಎಆರ್‌ಪಿಯು) 153 ರೂ.ಗೆ ಏರಿಕೆಯಾಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ಎಆರ್‌ಪಿಯು ಆದಾಯ 143 ರೂ. ಇತ್ತು.
ಸೆಗ್ಮೆಂಟ್‌ ಪ್ರಕಾರ ಆದಾಯ ನೋಡುವುದಾದರೆ ಭಾರತದ ವ್ಯವಹಾರಗಳಿಂದ ಕಂಪನಿ 15,191 ಕೋಟಿ ರೂ. ಆದಾಯ ಗಳಿಸಿದೆ. ಕಳೆದ ವರ್ಷ ಈ ಪ್ರಮಾಣ 13,831 ಕೋಟಿ ರೂ. ಇತ್ತು.
