ಸ್ಪುಟ್ನಿಕ್‌-ವಿ ಲಸಿಕೆಯ ಉತ್ಪಾದನೆಗೂ ಅನುಮತಿ ಕೇಳಿದ ಸೀರಂ ಇನ್ಸ್‌ಟ್ಯೂಟ್‌

ಪುಣೆ: ಆಸ್ಟ್ರಾಝೆನಿಕಾ ಮತ್ತು ಆಕ್ಸ್‌ಫರ್ಡ್‌ ವಿವಿ ತಯಾರಿಸಿರುವ ಕೋವಿಶೀಲ್ಡ್‌ ಕೊರೊನಾ ಲಸಿಕೆಯನ್ನು ಉತ್ಪಾದಿಸುತ್ತಿರುವ ಪುಣೆ ಮೂಲದ ಆಫ್‌ ಇಂಡಿಯಾ ಇದೀಗ ಇನ್ನೊಂದು ಲಸಿಕೆಯ ಉತ್ಪಾದನೆಗೆ ಮುಂದಾಗಿದೆ. ರಷ್ಯಾ ಮೂಲದ ಸ್ಪುಟ್ನಿಕ್‌-ವಿ ಲಸಿಕೆಯ ಉತ್ಪಾದನೆಗೆ ಭಾರತೀಯ ಔಷಧ ನಿಯಂತ್ರಕರಿಂದ (ಡಿಸಿಜಿಐ) ಅನುಮತಿ ಕೋರಿದೆ. ಅಷ್ಟೇ ಅಲ್ಲದೆ ಸೀರಂ ಇನ್ಸ್‌ಟ್ಯೂಟ್‌ ಲಸಿಕೆ ಉತ್ಪಾದನಾ ಸಂಸ್ಥೆಯು ಲಸಿಕೆಯ ಪರೀಕ್ಷೆ ವಿಶ್ಲೇಷಣೆ ಮತ್ತು ಪರೀಕ್ಷೆಗೂ ಅನುಮೋದನೆ ಕೋರಿದೆ. ಈಗಾಗಲೇ ಭಾರತದಲ್ಲಿ ಹೈದರಾಬಾದ್‌ ಮೂಲದ ಡಾ ರೆಡ್ಡೀಸ್‌ ಲ್ಯಾಬೊರೇಟರೀಸ್‌ ಸ್ಪುಟ್ನಿಕ್‌-ವಿ ಲಸಿಕೆಯ ಉತ್ಪಾದನೆಯಲ್ಲಿ ತೊಡಗಿದೆ. ಜತೆಗೆ ವಿದೇಶಗಳಿಂದ ಲಸಿಕೆ ತರಿಸಿಕೊಂಡು ಭಾರತದಲ್ಲಿ ಅವುಗಳ ಹಂಚಿಕೆಯನ್ನೂ ನಡೆಸುತ್ತಿದೆ. ಹೀಗಿರುವಾಗಲೇ ಸೀರಂ ಕೂಡ ಸ್ಪುಟ್ನಿಕ್‌-ವಿ ಉತ್ಪಾದನೆಗೆ ಮುಂದೆ ಬಂದಿದೆ. ಈಗಾಗಲೇ ಸೀರಂ ಇನ್ಸ್‌ಟ್ಯೂಟ್‌ ಜೂನ್‌ನಲ್ಲಿ 10 ಕೋಟಿ ಕೋವಿಶೀಲ್ಡ್‌ ಲಸಿಕೆಯನ್ನು ಉತ್ಪಾದಿಸುವುದಾಗಿ ಸರಕಾರಕ್ಕೆ ಭರವಸೆ ನೀಡಿದೆ. ಜತೆಗೆ ನೊವಾವ್ಯಾಕ್ಸ್‌ ಎಂಬ ಇನ್ನೊಂದು ಲಸಿಕೆಯ ಉತ್ಪಾದನೆಯಲ್ಲೂ ಸೀರಂ ತೊಡಗಿಸಿಕೊಂಡಿದೆ. ಆದರೆ ಇದಕ್ಕೆ ಇನ್ನೂ ಅಮೆರಿಕ ಔಷಧ ನಿಯಂತ್ರಕರು ಅನುಮತಿ ನೀಡಬೇಕಷ್ಟೆ. ಅದಕ್ಕೂ ಮೊದಲೇ ಉತ್ಪಾದನೆ ಆರಂಭಿಸಿದೆ. ಇನ್ನು ಸ್ಪುಟ್ನಿಕ್‌ ವಿಚಾರಕ್ಕೆ ಬರುವುದಾದರೆ, ಈ ಲಸಿಕೆಯ ತುರ್ತು ಬಳಕೆಗೆ ಡಿಸಿಜಿಐ ಏಪ್ರಿಲ್‌ನಲ್ಲಿ ಅನುಮತಿ ನೀಡಿತ್ತು. ಬಳಿಕ ಮೂರು ಬಾರಿ ವಿದೇಶದಿಂದ ಈ ಲಸಿಕೆಯನ್ನು ಭಾರತ ಆಮದು ಮಾಡಿಕೊಂಡಿದೆ. ಮೂರನೇ ಹಂತದಲ್ಲಿ ಮಂಗಳವಾರ ಒಟ್ಟು 30 ಲಕ್ಷ ಡೋಸ್‌ ಲಸಿಕೆಗೆ ಹೈದರಾಬಾದ್‌ಗೆ ಬಂದಿಳಿದಿವೆ.