ಸಿನಿಮಾ ನಿರ್ಮಾಣಕ್ಕಿಳಿದ ವಿನೋದ್ ಪ್ರಭಾಕರ್‌; 'ಮರಿ ಟೈಗರ್‌'ಗೆ ಸಾಥ್ ನೀಡಿದ 'ಲೂಸ್ ಮಾದ' ಯೋಗಿ

ಸ್ಯಾಂಡಲ್‌ವುಡ್‌ನಲ್ಲಿ ಹಲವು ವರ್ಷಗಳಿಂದ ಹೀರೋ ಆಗಿರುವ ನಟ ವಿನೋದ್ ಪ್ರಭಾಕರ್, ಈಚೆಗೆ 'ರಾಬರ್ಟ್'ನಿಂದ ದೊಡ್ಡ ಗೆಲುವು ಪಡೆದುಕೊಂಡಿದ್ದಾರೆ. ಸದ್ಯ ಹೊಸದೊಂದು ಸಾಹಸಕ್ಕೂ ಅವರ ಮುಂದಾಗಿದ್ದಾರೆ. ಆ ಕುರಿತು ಇಲ್ಲಿದೆ ಮಾಹಿತಿ.

ಸಿನಿಮಾ ನಿರ್ಮಾಣಕ್ಕಿಳಿದ ವಿನೋದ್ ಪ್ರಭಾಕರ್‌; 'ಮರಿ ಟೈಗರ್‌'ಗೆ ಸಾಥ್ ನೀಡಿದ 'ಲೂಸ್ ಮಾದ' ಯೋಗಿ
Linkup
ಸ್ಯಾಂಡಲ್‌ವುಡ್‌ನಲ್ಲಿ 'ಮರಿ ಟೈಗರ್‌' ತಮ್ಮದೇ ಆದ ಅಭಿಮಾನಿ ವರ್ಗವನ್ನು ಹೊಂದಿದ್ದಾರೆ. ಸಾಲು ಸಾಲು ಆಕ್ಷನ್ ಸಿನಿಮಾಗಳಲ್ಲಿ ಅವರು ಬ್ಯುಸಿ ಇದ್ದಾರೆ. ಕಳೆದ ವರ್ಷ ಅವರು ವಿಶೇಷ ಪಾತ್ರ ಮಾಡಿದ್ದ 'ರಾಬರ್ಟ್' ಸಿನಿಮಾ ದೊಡ್ಡ ಹಿಟ್ ಆಗಿದೆ. ಇದೆಲ್ಲದರ ಮಧ್ಯೆ ಅವರೀಗ ಸಿನಿಮಾ ನಿರ್ಮಾಣಕ್ಕೂ ಮುಂದಾಗಿದ್ದಾರೆ. ಹೌದು, 'ಟೈಗರ್ ಟಾಕೀಸ್' ಹೆಸರಿನ ಬ್ಯಾನರ್ ಶುರು ಮಾಡಿದ್ದಾರೆ. ಆ ಮೂಲಕ ಅವರ ಪತ್ನಿ ನಿಶಾ ಈಗ ನಿರ್ಮಾಪಕಿಯಾಗಿದ್ದಾರೆ. ಜೊತೆಗೆ ವಿನೋದ್ ನಿರ್ಮಾಣದ ಮೊದಲ ಸಿನಿಮಾಕ್ಕೆ ಸಾಥ್ ನೀಡಿದ್ದಾರೆ. ಟೈಗರ್ ಟಾಕೀಸ್‌ನ ಮೊದಲ ಸಿನಿಮಾ ''ವಿನೋದ್ ಪ್ರಭಾಕರ್ ಅವರ ಟೈಗರ್ ಟಾಕೀಸ್ ಮೂಲಕ 'ಲಂಕಾಸುರ' ಸಿನಿಮಾ ನಿರ್ಮಾಣಗೊಳ್ಳುತ್ತಿದೆ. ಇದು ಈ ಬ್ಯಾನರ್‌ನ ಮೊದಲ ಸಿನಿಮಾ. ವಿನೋದ್ ಪ್ರಭಾಕರ್ ಇದರ ಹೀರೋ ಆದರೆ ನಿಶಾ ವಿನೋದ್ ಪ್ರಭಾಕರ್ ಅವರು ಬಂಡವಾಳ ಹೂಡುತ್ತಿದ್ದಾರೆ. ಇನ್ನು, ತಮ್ಮ ನಿರ್ಮಾಣ ಸಂಸ್ಥೆಗೆ 'ಟೈಗರ್ ಟಾಕಿಸ್' ಎಂಬ ಹೆಸರಿಟ್ಟರುವ ವಿನೋದ್, ಆ ಮೂಲಕ ತಮ್ಮ ತಂದೆ ಟೈಗರ್ ಪ್ರಭಾಕರ್ ಅವರನ್ನು ‌ಸ್ಮರಿಸಿಕೊಂಡಿದ್ದಾರೆ. ಇನ್ನು, ಈ ಸಿನಿಮಾದ ವಿಶೇಷ ಪಾತ್ರದಲ್ಲಿ ಲೂಸ್ ಮಾದ ಯೋಗಿ ಅಭಿನಯಿಸುತ್ತಿದ್ದಾರೆ. ಇದು ಇವರಿಬ್ಬರು ಒಟ್ಟಾಗಿ ಅಭಿನಯಿಸುತ್ತಿರುವ ಮೊದಲ ಚಿತ್ರವಾಗಿದೆ. ಉಳಿದಂತೆ, ದೇವರಾಜ್, ರವಿಶಂಕರ್ ಮುಂತಾದವರು 'ಲಂಕಾಸುರ' ಚಿತ್ರಕ್ಕಾಗಿ ಬಣ್ಣ ಹಚ್ಚಿದ್ದಾರೆ. ಈ ಸಾಹಸ ಪ್ರಧಾನ ಸಿನಿಮಾವನ್ನು ಡಿ. ಪ್ರಮೋದ್ ಕುಮಾರ್ ನಿರ್ದೇಶನ ಮಾಡುತ್ತಿದ್ದಾರೆ. ಮತ್ತೊಂದು ವಿಶೇಷವೆಂದರೆ, ಡಿಫರೆಂಟ್ ಡ್ಯಾನಿ, ವಿ‌ನೋದ್, ಕುಂಫು ಚಂದ್ರು, ಅರ್ಜುನ್ ರಾಜ್ ಹಾಗೂ ಚೇತನ್ ಡಿಸೋಜ ಅವರು ಈ ಸಿನಿಮಾದ ಸಾಹಸ ದೃಶ್ಯಗಳನ್ನು ಸಂಯೋಜನೆ ಮಾಡುತ್ತಿದ್ದಾರೆ. ನಾಲ್ಕು ಹಾಡುಗಳಿರುವ ಈ ಚಿತ್ರಕ್ಕೆ ವಿಜೇತ್ ಕೃಷ್ಣ ಸಂಗೀತ ನೀಡಿದ್ದು, 'ಭರ್ಜರಿ' ಚೇತನ್ ಗೀತರಚನೆ ಮಾಡಿದ್ದಾರೆ. 'ಸಿದ್ಲಿಂಗು', 'ಜಯಮ್ಮನ ಮಗ' ಹಾಗೂ 'ಐ ಲವ್ ಯೂ' ಮುಂತಾದ ಜನಪ್ರಿಯ ಚಿತ್ರಗಳಿಗೆ ಛಾಯಾಗ್ರಾಹಕರಾಗಿ ಕಾರ್ಯನಿರ್ವಹಿಸಿರುವ ಸುಜ್ಞಾನ್ (ಜ್ಞಾನಮೂರ್ತಿ) ಈ ಚಿತ್ರಕ್ಕೂ ಛಾಯಾಗ್ರಾಹಕರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಮುರಳಿ, ಮೋಹನ್ ಅವರ ನೃತ್ಯ ನಿರ್ದೇಶನ ಹಾಗೂ ದೀಪು ಎಸ್. ಕುಮಾರ್ ರವರ ಸಂಕಲನ ಈ ಚಿತ್ರಕ್ಕಿದೆ. ಬೆಂಗಳೂರಿನಲ್ಲಿ ಈ ಚಿತ್ರದ ಚಿತ್ರೀಕರಣವು ಬಿರುಸಿನಿಂದ ಸಾಗಿದೆ. ಇನ್ನು, ಉದಯ ಪ್ರಕಾಶ್ ನಿರ್ಮಿಸಿ, ನಿರ್ದೇಶಿಸಿರುವ 'ವರದ' ಅನ್ನೋ ಸಿನಿಮಾದಲ್ಲೂ ವಿನೋದ್ ಪ್ರಭಾಕರ್ ಹೀರೋ ಆಗಿದ್ದಾರೆ. ಆ ಸಿನಿಮಾ ತೆರೆಗೆ ಬರಲು ಸಜ್ಜಾಗಿದೆ. ಈಚೆಗಷ್ಟೇ ಆ ಸಿನಿಮಾದ ಒಂದು ಹಾಡನ್ನು ನಟ ಗಣೇಶ್ ರಿಲೀಸ್ ಮಾಡಿದ್ದರು. ಇದರ ಜೊತೆಗೆ ಫೈಟರ್ ಎಂಬ ಇನ್ನೊಂದು ಸಿನಿಮಾವನ್ನು ವಿನೋದ್ ಪ್ರಭಾಕರ್ ಒಪ್ಪಿಕೊಂಡಿದ್ದಾರೆ.