ಸ್ಕಿನ್‌ ಫಾಸ್ಟಿಂಗ್‌ ಮಾಡಿ

*ಶುಭಾ ಹೆಗಡೆ ಕನ್ನಡಿ ಮುಂದೆ ನಿಂತಷ್ಟು ಹೊತ್ತು ನೆನಪಾಗುವ ಸೌಂದರ‍್ಯ ಪ್ರಜ್ಞೆ, ಮರುಕ್ಷಣವೇ ಅಲಂಕರಿಸಿಕೊಳ್ಳಲು ಸಿದ್ಧವಾಗುವ ಮನಸ್ಸು, ಕಣ್ಣಿಗೆ ಕಾಡಿಗೆ ಹಚ್ಚಿದಷ್ಟೂ ಕಾಣುವುದೇ ಇಲ್ಲ. ತುಟಿಯ ರಂಗು ಹೆಚ್ಚಾದಷ್ಟು ನಗು ಅರಳುವುದೇ ಇಲ್ಲ. ಕೆನ್ನೆಗೆ ಹಚ್ಚಿದ ತಿಳಿ ಗುಲಾಬಿ ಪೌಡರ್‌ ಮುಖವನ್ನು ಮುದ್ದಾಗಿಸುತ್ತದೆ ಅಂತಾನೇ ನಂಬಿಸುವ ಕನ್ನಡಿ ಕ್ರಮೇಣ ಸೌಂದರ‍್ಯ ವರ್ಧಕಗಳು ಹುಚ್ಚು ಹಿಡಿಸುತ್ತದೆ. ಅವುಗಳಿಲ್ಲದೆ ಮನೆಯಿಂದ ಹೊರ ಬರಲು ಅಸಾಧ್ಯ ಎನ್ನುವ ಮಟ್ಟಿಗೆ. ವಿಪರೀತ ಸೌಂದರ‍್ಯ ಪ್ರಜ್ಞೆಗೆ ಇದೀಗ ಬ್ರೇಕ್‌ ನೀಡಲು ಬಂದಿದೆ ಸ್ಕಿನ್‌ ಫಾಸ್ಟಿಂಗ್‌. ಇತ್ತೀಚೆಗೆ ಈ ಪರಿಕಲ್ಪನೆ ಖ್ಯಾತವಾಗುತ್ತಿದ್ದು, ಇದು ಅತಿಯಾದ ಸೌಂದರ‍್ಯ ವರ್ಧಕಗಳ ಬಳಕೆಯಿಂದ ಕೆಲ ಕಾಲ ದೂರ ಇರುವ ಹಾಗೂ ತ್ವಚೆಯ ಆರೋಗ್ಯವನ್ನು ಕಾಪಾಡಿಕೊಳ್ಳುವ ವಿಧಾನವಾಗಿ ಯುವತಿಯರನ್ನು ಗಮನ ಸೆಳೆಯುತ್ತಿದೆ. ಏನಿದು? ಸದಾ ಬಳಸುವ ತ್ವಚೆಯ ಉತ್ಪನ್ನಗಳಿಂದ ದೂರವಿದ್ದು, ತ್ವಚೆ ಸಹಜವಾಗಿ ಉಸಿರಾಡುವಂತೆ ಮಾಡುವ ಕ್ರಮವಿದು. ಇದನ್ನು ವಾರಾಂತ್ಯ ಅಥವಾ ವಾರದಲ್ಲಿಒಂದೆಡರು ದಿನ ಮಾಡಬಹುದು. ಇದೊಂದು ಪುರಾತನ ಪರಿಕಲ್ಪನೆಯಾಗಿದ್ದು, ಸೌಂದರ‍್ಯ, ಆರೋಗ್ಯ ತಜ್ಞರು ಇದನ್ನೇ ಹೇಳುತ್ತಿದ್ದಾರೆ. ಆದರೆ ಇದೀಗ ಸಾಮಾಜಿಕ ತಾಣಗಳಲ್ಲಿಸ್ಕಿನ್‌ ಫಾಸ್ಟಿಂಗ್‌ ಹೆಸರಿನಲ್ಲಿಇದು ಮತ್ತೊಮ್ಮೆ ಯುವ ಜನತೆಯನ್ನು ಸೆಳೆಯುತ್ತಿದೆ. ಜಪಾನ್‌ನಿಂದ ಇಂಥದ್ದೊಂದು ಪರಿಕಲ್ಪನೆ ಸಾಮಾಜಿಕ ತಾಣಗಳ ಮೂಲಕ ಮತ್ತಷ್ಟು ಖ್ಯಾತವಾಗಿದ್ದು, ಈ ಬಗ್ಗೆ ಒಂದಷ್ಟು ಪರ ವಿರೋಧಗಳು ಕೂಡ ಕೇಳಿ ಬರುತ್ತಿವೆ. ಸೌಂದರ‍್ಯ ವರ್ಧಕ ಉತ್ಪನ್ನಗಳ ಅತಿಯಾದ ಬಳಕೆಯು ನಿಮ್ಮ ಚರ್ಮದ ಮೇಲೆ ಮಾರಕ ಪರಿಣಾಮ ಬೀರುತ್ತದೆ. ದಿನಪೂರ್ತಿ ಮೇಕಪ್‌ ಮಾಡಿಕೊಳ್ಳುವಂಥ ಅಭ್ಯಾಸ ಒಳ್ಳೆಯದಲ್ಲ. ಅದು ನೈಸರ್ಗಿಕವಾಗಿ ತೈಲ ಉತ್ಪತ್ತಿಗೆ ಹಾನಿ ಮಾಡುವುದರ ಜತೆಗೆ ಒಣ ಚರ್ಮಕ್ಕೆ ಕಾರಣವಾಗುತ್ತದೆ. ಹಾಗಾಗಿ ಈ ಕಲ್ಪನೆ ಸೌಂದರ‍್ಯ ವರ್ಧಕ ವಸ್ತುಗಳಿಂದ ಕೆಲವು ಸಮಯ ದೂರ ಇರಲು ಇದು ಪ್ರೇರಣೆ ನೀಡುತ್ತದೆ. ಚರ್ಮದ ಉಸಿರಾಟದ ಕ್ರಿಯೆಯನ್ನು ಇದು ಸುಲಭಗೊಳಿಸುತ್ತದೆ ಎಂಬುದು ಲಾಭವಾದರೂ ತ್ವಚೆಯ ಪೋಷಣೆಗೆ ಅಗತ್ಯವಿರುವ ಉತ್ಪನ್ನಗಳನ್ನು ಬಳಸದಿದ್ದರೆ ಬಿಸಿಲಿನಂತಹ ಸಂದರ್ಭದಲ್ಲಿತ್ವಚೆಗೆ ಹಾನಿಯಾಗಬಹುದು. ಒಣ ಚರ್ಮದಂತಹ ಸಮಸ್ಯೆಗಳು ಕಾಡಬಹುದು ಎನ್ನಲಾಗುತ್ತದೆ. ಹೀಗಾಗಿ ಈ ಕಲ್ಪನೆ ಬಗಗೆ ಪರ ವಿರೋಧಗಳು ವ್ಯಕ್ತವಾಗಿವೆ. ಉತ್ತಮ ದಿನಚರ ಇರಲಿ ಆರೋಗ್ಯಕರ ಚರ್ಮಕ್ಕಾಗಿ, ನಿಮ್ಮ ಚರ್ಮದ ಪ್ರಕಾರಕ್ಕೆ ಅನುಗುಣವಾಗಿ ಉತ್ತಮ ದಿನಚರಿಯನ್ನು ಅನುಸರಿಸಬೇಕು. ನಮ್ಮ ದೇಹದಂತೆಯೇ ನಮ್ಮ ಚರ್ಮಕ್ಕೂ ದೈನಂದಿನ ಪೋಷಕಾಂಶಗಳು ಅಗತ್ಯ. ಅವುಗಳ ಪೂರೈಕಯತ್ತ ಗಮನವಿರಲಿ. ತ್ವಚೆಯ ಸೌಂದರ‍್ಯ ಹಾಗೂ ಆರೋಗ್ಯವೃದ್ಧಿಗೆ ಪೂರಕ ಜೀವನಶೈಲಿ ಜತೆ ಸಹಜವಾಗಿ ತ್ವಚೆ ಉಸಿರಾಡಲು ಅವಕಾಶ ನೀಡಬೇಕು. ಇದಕ್ಕೆ ಪೂರಕವಾಗಿ ವಾರಾಂತ್ಯ ಅಥವಾ ಸೌಂದರ‍್ಯ ವರ್ಧಕ ವಸ್ತುಗಳ ಅಗತ್ಯ ಇಲ್ಲದೆ ಹೋದಾಗ ಮುಖಕ್ಕೆ ಏನನ್ನು ಹಚ್ಚಬೇಡಿ. ಆದರೆ ತ್ವಚೆ ಸ್ನೇಹಿ ಉತ್ಪನ್ನಗಳನ್ನು ಯಾವ ಸಂದರ್ಭದಲ್ಲಿಬಳಸಬೇಕು, ಬೇಡ ಎನ್ನುವುದರ ಸ್ಪಷ್ಟ ಕಲ್ಪನೆ ಇರಲಿ. ಪಲ್ಲವಿ ಇಡೂರು, ಬ್ಯೂಟಿ ಎಕ್ಸ್‌ಪರ್ಟ್‌ ತ್ವಚೆಗೆ ಉಸಿರಾಟ ಎನ್ನುವುದು ಮುಖ್ಯ. ಹಾಗಾಗಿ ಸಾಧ್ಯವಾದಷ್ಟು ತ್ವಚೆಯನ್ನು ಸಹಜವಾಗಿರಲು ಬಿಡಿ. ಚರ್ಮದ ಆರೋಗ್ಯಕ್ಕೆ ಅಗತ್ಯವಿರುವ ಪೂರಕ ಜೀವನಶೈಲಿ ಅನುಸರಿಸಿ. ಡಾ. ಸುಧೀಂದ್ರ, ಸ್ಕಿನ್‌ ಸ್ಪೆಷಲಿಸ್ಟ್‌