ವಿರಾಟ್ ಕೊಹ್ಲಿ ಮಗುವಿನ ಮೇಲೆ ಅತ್ಯಾಚಾರ ಬೆದರಿಕೆ: ಪೊಲೀಸ್ ಬಂಧನಕ್ಕೆ ಹೈದರಾಬಾದ್ ಟೆಕ್ಕಿ
ಕ್ರಿಕೆಟಿಗ ವಿರಾಟ್ ಕೊಹ್ಲಿ ಮತ್ತು ನಟಿ ಅನುಷ್ಕಾ ಶರ್ಮಾ ಅವರ ಪುಟ್ಟ ಮಗುವಿನ ಮೇಲೆ ಅತ್ಯಾಚಾರ ನಡೆಸುವ ಬೆದರಿಕೆ ಒಡ್ಡಿದ್ದ ಆರೋಪಿ ಹೈದರಾಬಾದ್ ಮೂಲದ ಸಾಫ್ಟ್‌ವೇರ್ ಎಂಜಿನಿಯರ್ ರಾಮನಾಗೇಶ್ ಅಕುಬತಿನಿಯನ್ನು ಪೊಲೀಸ್ ವಶಕ್ಕೆ ಒಪ್ಪಿಸಲಾಗಿದೆ.
Admin
0
7
ಮುಂಬಯಿ: ಪಾಕಿಸ್ತಾನದ ವಿರುದ್ಧದ ಟಿ20 ವಿಶ್ವಕಪ್ ಪಂದ್ಯದಲ್ಲಿ ಭಾರತ ಸೋಲು ಅನುಭವಿಸಿದ ಬಳಿಕ ನಾಯಕ ಅವರ ಮಗುವಿನ ಮೇಲೆ ಅತ್ಯಾಚಾರ ಮಾಡುವ ಬೆದರಿಕೆ ಹಾಕಿದ್ದ ಆರೋಪದಲ್ಲಿ ಬಂಧಿತನಾಗಿರುವ ಹೈದರಾಬಾದ್ ಮೂಲದ 23 ವರ್ಷದ ಸಾಫ್ಟ್‌ವೇರ್ ಎಂಜಿನಿಯರ್‌ನನ್ನು ಮುಂಬಯಿ ನ್ಯಾಯಾಲಯ ನ. 15ರವರೆಗೂ ಮುಂಬಯಿ ಪೊಲೀಸರ ವಶಕ್ಕೆ ಒಪ್ಪಿಸಿದೆ.
ವಿರಾಟ್ ಕೊಹ್ಲಿ ಮತ್ತು ನಟಿ ಅನುಷ್ಕಾ ಶರ್ಮಾ ಅವರ ಹಸುಗೂಸಿನ ಮೇಲೆ ಹಾಗೂ ಅಶ್ಲೀಲ ಸಂದೇಶಗಳನ್ನು ಕಳುಹಿಸಿದ್ದ ಆರೋಪದಲ್ಲಿ ಮುಂಬಯಿ ಪೊಲೀಸರು ತೆಲಂಗಾಣದ ರಾಮನಾಗೇಶ್ ಅಕುಬತಿನಿ ಎಂಬಾತನನ್ನು ಬುಧವಾರ ಬಂಧಿಸಿದ್ದರು. ಐಐಟಿ ಪದವೀಧರನಾಗಿರುವ ರಾಮನಾಗೇಶ್, ಉನ್ನತ ಶಿಕ್ಷಣ ಪಡೆಯುವುದಕ್ಕಾಗಿ ಮೊಬೈಲ್ ಡೆಲಿವರಿ ಆಪ್‌ನಲ್ಲಿ ಮಾಡುತ್ತಿದ್ದ ಉದ್ಯೋಗವನ್ನು ಇತ್ತೀಚೆಗಷ್ಟೇ ತ್ಯಜಿಸಿದ್ದ.
ವಿರಾಟ್ ಕೊಹ್ಲಿ ಅವರ ವ್ಯವಸ್ಥಾಪಕ ನೀಡಿದ್ದ ದೂರಿನ ಹಿನ್ನೆಲೆಯಲ್ಲಿ ಐಪಿಸಿಯ ವಿವಿಧ ಸೆಕ್ಷನ್‌ಗಳ ಅಡಿ ಪ್ರಕರಣ ದಾಖಲಾಗಿತ್ತು. ಆರೋಪಿ ತನ್ನ ಗುರುತನ್ನು ಮುಚ್ಚಿಡಲು ನಕಲಿ ಹೆಸರುಗಳನ್ನು ಬಳಸಿಕೊಂಡಿದ್ದ. @Criccrazygirl ಎಂಬ ಟ್ವಿಟ್ಟರ್ ಖಾತೆಯಿಂದ ಅವನು ಈ ಟ್ವೀಟ್ ಮಾಡಿದ್ದ. ಅವನು ತನ್ನ ತಾಂತ್ರಿಕ ಜ್ಞಾನಗಳನ್ನು ಬಳಸಿಕೊಂಡು ಆನ್‌ಲೈನ್‌ನಲ್ಲಿ ಗುರುತು ಮರೆಮಾಚಿದ್ದ. ಇದರಿಂದ ಅವನನ್ನು ಪತ್ತೆ ಹಚ್ಚುವುದು ತನಿಖಾ ಅಧಿಕಾರಿಗಳಿಗೆ ಕಷ್ಟಕರವಾಗಿತ್ತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ದಿಲ್ಲಿ ಮಹಿಳಾ ಆಯೋಗ (ಡಿಸಿಡಬ್ಲ್ಯೂ) ಕೂಡ ತನಿಖೆಗೆ ಆಗ್ರಹಿಸಿದ್ದು, ಆರೋಪಿ ವಿರುದ್ಧ ಎಫ್‌ಐಆರ್ ದಾಖಲಿಸಬೇಕು, ಅವನನ್ನು ಬಂಧಿಸಬೇಕು ಹಾಗೂ ತೆಗೆದುಕೊಂಡ ಕ್ರಮಗಳ ಬಗ್ಗೆ ವಿವರವಾದ ವರದಿ ಸಲ್ಲಿಸಬೇಕು ಎಂದು ದಿಲ್ಲಿ ಪೊಲೀಸರಿಗೆ ಆಯೋಗ ನೋಟಿಸ್ ನೀಡಿತ್ತು.
ಹೈದರಾಬಾದ್‌ನಲ್ಲಿ ಆರೋಪಿಯನ್ನು ಬಂಧಿಸಿದ್ದ ಪೊಲೀಸರು, ಆತನನ್ನು ಮುಂಬಯಿಗೆ ಕರೆದೊಯ್ದಿದ್ದರು. ಯುವಕನ ತಂದೆ ಶ್ರೀನಿವಾಸ್ ಅವರು ಆತನಿಗೆ ಕಾನೂನು ನೆರವು ನೀಡಲು ಮುಂಬಯಿಗೆ ತೆರಳಿದ್ದಾರೆ. 'ಆತ ತಪ್ಪು ಮಾಡಿದ್ದಾನೆ. ಅವನು ಕ್ಷಮೆ ಕೋರಲು ಸಿದ್ಧನಿದ್ದಾನೆ. ಪೊಲೀಸರು ನಮ್ಮ ಮನೆಗೆ ಬರುವವರೆಗೂ ನನಗೆ ಇದರ ಬಗ್ಗೆ ಏನೂ ತಿಳಿದಿರಲಿಲ್ಲ. ಟ್ವಿಟ್ಟರ್ ಎಂಬುದೊಂದು ಇದೆ ಎಂದೂ ನನಗೆ ಗೊತ್ತಿರಲಿಲ್ಲ. ಅಂತರ್ಜಾಲದಲ್ಲಿ ನನ್ನ ಮಗ ಈ ರೀತಿ ನಿಂದನೆಗಳನ್ನು ಮಾಡುತ್ತಿದ್ದಾನೆ ಎಂದು ತಿಳಿದಿದ್ದರೆ ಆತನನ್ನು ಸರಿದಾರಿಗೆ ತರಲು ಪ್ರಯತ್ನಿಸುತ್ತಿದ್ದೆ' ಎಂದು ಅವರು ಹೇಳಿದ್ದಾರೆ.
ತಮ್ಮ ಮಗ ಈ ರೀತಿ ಸಂದೇಶ ಟೈಪ್ ಮಾಡಲು ಸಾಧ್ಯವಿಲ್ಲ. ಉದ್ದೇಶಪೂರ್ವಕವಾಗಿಲ್ಲದೆ ಈ ಸಂದೇಶ ಆಕಸ್ಮಿಕವಾಗಿ ರವಾನೆಯಾಗಿರಬಹುದು ಎಂದು ಅವರು ಮೊದಲು ಹೇಳಿದ್ದರು.
ಬೆಂಗಳೂರಿನಲ್ಲಿ ಟೆಕ್ಕಿಯಾಗಿದ್ದ ರಾಮನಾಗೇಶ್, ವರ್ಷಕ್ಕೆ 24 ಲಕ್ಷ ರೂ ವೇತನದ ಉತ್ತಮ ಸಂಬಳದ ಕೆಲಸಕ್ಕೆ ಸೇರಿದ್ದ. ಆತ ಆಗ ಆನ್‌ಲೈನ್‌ನಲ್ಲಿ ಹೆಚ್ಚು ಸಕ್ರಿಯವಾಗಿ ಇರುತ್ತಿರಲಿಲ್ಲ. ಅಂತರ್ಮುಖಿಯಾಗಿರುವ ಆತ, ಕಳೆದ ವರ್ಷ ಕೆಲಸ ತೊರೆದಿದ್ದ. ಮನೆಯಲ್ಲಿಯೇ ಇದ್ದು ಉನ್ನತ ವ್ಯಾಸಂಗಕ್ಕೆ ಸಿದ್ಧತೆ ಮಾಡಿಕೊಳ್ಳುತ್ತಿದ್ದ. ಕೆಲಸ ಬಿಟ್ಟ ನಂತರ ಸ್ನೇಹಿತರ ಜತೆಗೆ ಹೆಚ್ಚು ಬೆರೆಯುತ್ತಿರಲಿಲ್ಲ. ಇದರಿಂದ ಆನ್‌ಲೈನ್‌ನಲ್ಲಿ ಹೆಚ್ಚು ತೊಡಗಿಕೊಂಡಿರುತ್ತಿದ್ದ. ನಮಗೆ ಇದರ ಅಪಾಯಗಳು ಗೊತ್ತಿರಲಿಲ್ಲ. ಈಗ ನಡೆದಿರುವುದು ಖಂಡಿತಾ ತಪ್ಪು ಎಂದು ಅವರು ಹೇಳಿದ್ದಾರೆ.
