ಲಸಿಕೆ ಹಾಕಿಸಿಕೊಳ್ಳಲು ಜನರೇ ಬರುತ್ತಿಲ್ಲ! ಜನರಿಲ್ಲದೆ ಅನೇಕ ಕಡೆ ಲಸಿಕಾ ಕೇಂದ್ರಗಳು ಖಾಲಿ ಖಾಲಿ
ಲಸಿಕೆ ಪಡೆಯುವುದಕ್ಕೆ ಸರದಿಯಲ್ಲಿ ನಿಲ್ಲುತ್ತಿದ್ದ ಜನ, ಇಂದು ಕರೆದರೂ ಬರುತ್ತಿಲ್ಲ. ವಿಶೇಷವಾಗಿ ಎರಡನೇ ಡೋಸ್‌ ಪಡೆಯಬೇಕಾದವರ ಮನೆ ಮನೆಗೆ ಹೋಗಿ, ಮೊಬೈಲ್‌ಗೆ ಕರೆ ಮಾಡಿ ಹೇಳಿದರೂ ಲಸಿಕೆ ಪಡೆಯುವುದಕ್ಕೆ ಹಿಂದೇಟು ಹಾಕುತ್ತಿದ್ದಾರೆ. ಕೋವಿಡ್‌ ಸೋಂಕು ತಹಬದಿಗೆ ಬರುತ್ತಿದ್ದಂತೆ ಜನರು ಲಸಿಕೆಯ ಬಗ್ಗೆ ಅಲಕ್ಷ್ಯ ವಹಿಸುತ್ತಿದ್ದಾರೆ. ಕೋವಿಡ್‌ ನಿಯಮಗಳನ್ನು ಗಾಳಿಗೆ ತೂರಿ ತಮ್ಮಿಷ್ಟದಂತೆ ನಡೆದುಕೊಳ್ಳುತ್ತಿದ್ದಾರೆ.
Admin
0
8
ಬೆಂಗಳೂರು: ನಗರದಲ್ಲಿ ಮೂರು ತಿಂಗಳ ಹಿಂದೆ ಕೊರೊನಾ ಲಸಿಕೆ ಹಾಕಿಸಿಕೊಳ್ಳಲು ನೂಕು ನುಗ್ಗಲು ಇತ್ತು. ಜನ ಸಾಲುಗಟ್ಟಿ ನಿಂತರೂ ಲಸಿಕೆ ಇಲ್ಲ ಎಂದು ಬೋರ್ಡ್‌ ಹಾಕಲಾಗುತ್ತಿತ್ತು. ಬೆಳಗ್ಗಿನಿಂದಲೇ ಸರತಿಯ ಸಾಲಿನಲ್ಲಿ ನಿಂತು ಕಾಯಬೇಕಾಗಿತ್ತು. ಲಸಿಕೆ ಎಲ್ಲಿ ಸಿಗುತ್ತದೆ ಎಂದು ಅಲೆದಾಡಬೇಕಿತ್ತು. ಪ್ರಭಾವ ಬಳಸಿ ಲಸಿಕೆ ಹಾಕಿಸಿಕೊಳ್ಳಬೇಕಿತ್ತು. ಆದರೆ ಈಗ ಪರಿಸ್ಥಿತಿ ಬದಲಾಗಿದೆ. ಕೋವಿಡ್‌ ಎರಡನೇ ಡೋಸ್‌ ಅವಧಿ ಮುಗಿದರೂ ಜನರು ಲಸಿಕೆ ಹಾಕಿಸಿಕೊಳ್ಳುವುದಕ್ಕೆ ಲಸಿಕಾ ಕೇಂದ್ರಕ್ಕೆ ಬರುತ್ತಿಲ್ಲ. ಇದರಿಂದ ಲಸಿಕಾ ಅಭಿಯಾನಕ್ಕೆ ಹಿನ್ನೆಡೆ ಉಂಟಾಗಿದೆ.
ಲಸಿಕೆ ಪಡೆಯುವುದಕ್ಕೆ ಸರದಿಯಲ್ಲಿ ನಿಲ್ಲುತ್ತಿದ್ದ ಜನ, ಇಂದು ಕರೆದರೂ ಬರುತ್ತಿಲ್ಲ. ವಿಶೇಷವಾಗಿ ಎರಡನೇ ಡೋಸ್‌ ಪಡೆಯಬೇಕಾದವರ ಮನೆ ಮನೆಗೆ ಹೋಗಿ, ಮೊಬೈಲ್‌ಗೆ ಕರೆ ಮಾಡಿ ಹೇಳಿದರೂ ಲಸಿಕೆ ಪಡೆಯುವುದಕ್ಕೆ ಹಿಂದೇಟು ಹಾಕುತ್ತಿದ್ದಾರೆ. ಕೋವಿಡ್‌ ಸೋಂಕು ತಹಬದಿಗೆ ಬರುತ್ತಿದ್ದಂತೆ ಜನರು ಲಸಿಕೆಯ ಬಗ್ಗೆ ಅಲಕ್ಷ್ಯ ವಹಿಸುತ್ತಿದ್ದಾರೆ. ಕೋವಿಡ್‌ ನಿಯಮಗಳನ್ನು ಗಾಳಿಗೆ ತೂರಿ ತಮ್ಮಿಷ್ಟದಂತೆ ನಡೆದುಕೊಳ್ಳುತ್ತಿದ್ದಾರೆ. ಕೋವಿಡ್‌ ತಾಂತ್ರಿಕ ಸಲಹಾ ಸಮಿತಿ ಸದಸ್ಯರು ಡಿಸೆಂಬರ್‌ ಅಂತ್ಯದವರೆಗೂ ಅಥವಾ ಶೇ.70ರಷ್ಟು ಎರಡೂ ಡೋಸ್‌ ಆಗುವವರೆಗೂ ಕೋವಿಡ್‌ ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕು. ಇಲ್ಲದಿದ್ದರೆ ಅಪಾಯ ತಪ್ಪಿದ್ದಲ್ಲ ಎಂದು ಎಚ್ಚರಿಕೆ ನೀಡಿದ್ದರೂ ಜನರು ನಿಯಮಗಳನ್ನು ಪಾಲಿಸದೇ ಇರುವುದು ಆಘಾತ ತಂದಿದೆ.
‘ಮನೆ ಮನೆಗೆ ಹೋಗಿ, ಮೊದಲ ಡೋಸ್‌ ಪಡೆದವರ ಮೊಬೈಲ್‌ ನಂಬರ್‌ಗೆ ಕರೆ ಮಾಡಿ ಹೇಳಿದರೂ ಜನರು ಲಸಿಕೆ ಪಡೆಯುವುದಕ್ಕೆ ಬರುತ್ತಿಲ್ಲ. ಕೋವಿಡ್‌ ಕಡಿಮೆಯಾಗುತ್ತಿರುವುದರಿಂದ ಕೆಲವರಿಗೆ ಎರಡನೇ ಡೋಸ್‌ ಪಡೆಯುವ ಅಗತ್ಯವಿಲ್ಲ ಎನ್ನುವ ಮನೋಭಾವನೆಯಲ್ಲಿದ್ದಾರೆ. ಕೆಲವರಿಗೆ ಇನ್ನೂ ಲಸಿಕೆಯ ಮೇಲಿನ ಅಪನಂಬಿಕೆ ಹೋಗಿಲ್ಲ’ ಎನ್ನುತ್ತಾರೆ ಬೃಂದಾವನ ನಗರದ ಬಿಬಿಎಂಪಿ ಪ್ರಾಥಮಿಕ ಆರೋಗ್ಯ ಕೇಂದ್ರ ಸಿಬ್ಬಂದಿ.
ಎರಡು ವಾರದಿಂದ ಜನ ಬರುತ್ತಿಲ್ಲ:ಕಳೆದ ಎರಡು ವಾರಗಳಿಂದ ಎರಡನೇ ಡೋಸ್‌ ಲಸಿಕೆ ಪಡೆಯುವವರ ಸಂಖ್ಯೆ ಕಡಿಮೆಯಾಗಿದೆ. ಆರಂಭದಲ್ಲಿ 300ರಿಂದ 400 ದ್ವಿತೀಯ ಡೋಸ್‌ ಲಸಿಕೆ ನೀಡಲಾಗುತ್ತಿತ್ತು. ಈ ಸಂಖ್ಯೆ 60ರಿಂದ 70ಕ್ಕೆ ಬಂದು ತಲುಪಿದೆ. ಸದ್ಯ ಮೊದಲ ಡೋಸ್‌ ಪಡೆಯುವವರ ಸಂಖ್ಯೆ ತೀರಾ ಕಡಿಮೆ ಇದೆ. ಎರಡನೇ ಡೋಸ್‌ ಆದ್ಯತೆಯ ಮೇರೆಗೆ ನೀಡುತ್ತಿದ್ದರೂ ಜನರು ಬರುತ್ತಿಲ್ಲ ಎನ್ನುತ್ತಾರೆ ಗವಿಪುರಂ ಗುಟ್ಟಹಳ್ಳಿ ಬಿಬಿಎಂಪಿ ಪ್ರಾಥಮಿಕ ಆರೋಗ್ಯ ಕೇಂದ್ರದ ಸಿಬ್ಬಂದಿ. ಮೊದಲ ಡೋಸ್‌ ಲಸಿಕೆ ಪಡೆದುಕೊಂಡಿರುವ ಕೆಲವರಲ್ಲಿ ತಲೆನೋವು, ಜ್ವರ ಕಾಣಿಸಿಕೊಂಡಿತ್ತು. ಇದರಿಂದ ಎರಡನೇ ಡೋಸ್‌ ಬರುವುದಕ್ಕೆ ಹೆದರುತ್ತಿದ್ದಾರೆ ಎಂದು ಆರೋಗ್ಯ ಸಿಬ್ಬಂದಿ ಹೇಳಿದರು. ಬಿಬಿಎಂಪಿ ಕಾಲ್‌ ಸೆಂಟರ್‌ ಮೂಲಕ ಕೂಡ ಎರಡನೇ ಡೋಸ್‌ ಪಡೆಯುವವರಿಗೆ ಕರೆ ಮಾಡಿ ತಿಳಿಸಲಾಗುತ್ತಿದೆ. ಲಸಿಕೆ ಕೇಂದ್ರಗಳಲ್ಲಿ ಜನರ ಬರುವಿಕೆಗಾಗಿ ಸಿಬ್ಬಂದಿ ಕಾದು ಕುಳಿತುಕೊಳ್ಳಬೇಕಿದೆ.
ವಲಯವಾರು ಅಂಕಿ-ಅಂಶವಲಯ 2ನೇ ಡೋಸ್‌ ಪಡೆಯದವರ ಸಂಖ್ಯೆ
| ಬೊಮ್ಮನಹಳ್ಳಿ | 71,567 |
| ದಾಸರಹಳ್ಳಿ | 19,906 |
| ಪೂರ್ವ ವಲಯ | 1,32,482 |
| ಮಹಾದೇವಪುರ | 70,322 |
| ಆರ್‌ಆರ್‌ ನಗರ | 59,912 |
| ದಕ್ಷಿಣ ವಲಯ | 1,52,051 |
| ಪಶ್ಚಿಮ ವಲಯ | 1,14,000 |
| ಯಲಹಂಕ | 46,251 |
