ಮುಂದಿನ ವಾರ ಮತ್ತೆ ಎಲ್‌ಪಿಜಿ ಸಿಲಿಂಡರ್‌ ದರ ಏರಿಕೆ ಸಾಧ್ಯತೆ, 100 ರೂ. ಹೆಚ್ಚಳ?
ಸದ್ಯ ತೈಲ ಕಂಪನಿಗಳು ಪ್ರತಿ ಎಲ್‌ಪಿಜಿ ಸಿಲಿಂಡರ್‌ ಮಾರಾಟದಲ್ಲಿ 100 ರೂ.ಗೂ ಹೆಚ್ಚು ನಷ್ಟ ಅನುಭವಿಸುತ್ತಿದ್ದು, ದರ ಏರಿಕೆಗೆ ಮುಂದಾಗಿವೆ. ಆದರೆ ಎಲ್‌ಪಿಜಿ ಸಿಲಿಂಡರ್‌ ದರಗಳ ನಿಯಂತ್ರಣ ಇನ್ನೂ ಸರಕಾರದ ಕೈಯಲ್ಲೇ ಇದ್ದು, ಕೇಂದ್ರದ ತೀರ್ಮಾನ ಅಂತಿಮವಾಗಿದೆ.
Admin
0
6
ಹೊಸದಿಲ್ಲಿ: ಮುಂದಿನ ಒಂದು ವಾರದ ಅವಧಿಯಲ್ಲಿ ಸಿಲಿಂಡರ್‌ ಬೆಲೆ ಮತ್ತೆ ಏರಿಕೆಯಾಗುವ ಸಾಧ್ಯತೆ ಇದೆ. ಆಮದು ಮತ್ತು ಮಾರಾಟ ಬೆಲೆಗಳ ನಡುವೆ ರೂ. 100ಕ್ಕಿಂತ ಹೆಚ್ಚು ಅಂತರ ಇದ್ದು, ದರ ಏರಿಕೆ ಮಾಡುವ ಸಂಭವವಿದೆ ಎಂದು ಮೂಲಗಳು ತಿಳಿಸಿವೆ.
ಸದ್ಯ ತೈಲ ಕಂಪನಿಗಳಿಗೆ ಪ್ರತಿ ಎಲ್‌ಪಿಜಿ ಸಿಲಿಂಡರ್‌ ಮಾರಾಟದಲ್ಲಿ 100 ರೂ.ಗೂ ಹೆಚ್ಚು ನಷ್ಟವಾಗುತ್ತಿದೆ. ಆದರೆ ಪೆಟ್ರೋಲ್ ಮತ್ತು ಡೀಸೆಲ್‌ನ ಬೆಲೆ ನಿಯಂತ್ರಣವನ್ನು ಸರಕಾರ ಈಗಾಗಲೇ ರದ್ದುಗೊಳಿಸಿದ್ದು, ಎಲ್‌ಪಿಜಿ ಸಿಲಿಂಡರ್‌ ದರಗಳ ನಿಯಂತ್ರಣ ಇನ್ನೂ ಸರಕಾರದ ಕೈಯಲ್ಲೇ ಇದೆ. ಹೀಗಾಗಿ ಸರಕಾರದ ನಿರ್ಧಾರದ ಮೇಲೆ ದರ ಏರಿಕೆ ಆಗಲಿದೆಯೇ ಇಲ್ಲವೇ ಎಂಬುದು ತೀರ್ಮಾನವಾಗಲಿದೆ.
ಅಡುಗೆ ಅನಿಲ ದರ ಏರಿಕೆಗೆ ಅನುಮತಿ ಸಿಕ್ಕಿದರೆ ಇದು ಈ ವರ್ಷದ 5ನೇ ದರ ಹೆಚ್ಚಳ ಎನ್ನಿಸಲಿದೆ. ಮತ್ತು ಸಬ್ಸಿಡಿ ಮತ್ತು ಸಬ್ಸಿಡಿ ರಹಿತ ಸೇರಿ ಎಲ್ಲಾ ಮಾದರಿಯ ಎಲ್‌ಪಿಜಿ ಗ್ಯಾಸ್‌ ದರವೂ ಏರಿಕೆಯಾಗಲಿದೆ. ಕಳೆದ ಅಕ್ಟೋಬರ್‌ 6ರಂದು ಕೊನೆಯ ಬಾರಿಗೆ ಎಲ್‌ಪಿಜಿ ದರದಲ್ಲಿ 15 ರೂ. ಹೆಚ್ಚಳವಾಗಿತ್ತು. ಜುಲೈನಿಂದ ಇಲ್ಲಿಯವರೆಗೆ 14.2 ಕೆ.ಜಿ ಸಿಲಿಂಡರ್‌ ದರದಲ್ಲಿ 90 ರೂ. ಹೆಚ್ಚಳವಾಗಿದೆ.
ಸರ್ಕಾರಿ ಸ್ವಾಮ್ಯದ ತೈಲ ಮಾರುಕಟ್ಟೆ ಕಂಪನಿಗಳಿಗೆ ಚಿಲ್ಲರೆ ಮಾರಾಟದ ಬೆಲೆಯನ್ನು ವೆಚ್ಚದೊಂದಿಗೆ ಹೊಂದಿಸಲು ಅವಕಾಶವಿಲ್ಲ. ಆದರೆ ನಷ್ಟದ ಅಂತರವನ್ನು ಕಡಿಮೆ ಮಾಡಲು ಇದುವರೆಗೆ ಸರ್ಕಾರ ಯಾವುದೇ ಸಬ್ಸಿಡಿಯನ್ನೂ ನೀಡಿಲ್ಲ ಎಂದು ಈ ವಿಚಾರದ ಬಗ್ಗೆ ಅರಿವಿರುವ ಮೂಲಗಳು ಹೇಳಿವೆ.
ಅಂತರರಾಷ್ಟ್ರೀಯ ಇಂಧನ ಬೆಲೆಗಳು ಸುದೀರ್ಘ ಅವಧಿಯ ಬಳಿಕ ಗರಿಷ್ಠ ಮಟ್ಟಕ್ಕೆ ಏರಿಕೆಯಾಗಿದೆ. ಸೌದಿ ಎಲ್‌ಪಿಜಿ ದರ ಟನ್‌ಗೆ 800 ಡಾಲರ್‌ ತಲುಪಿದ್ದು, ಶೇ. 60ರಷ್ಟು ಏರಿಕೆ ಕಂಡಿದೆ. ಪರಿಣಾಮ ಎಲ್‌ಪಿಜಿ ಮಾರಾಟದಲ್ಲಿ ಕಂಪನಿಗಳಿಗೆ ಆಗುತ್ತಿರುವ ನಷ್ಟ 100 ರೂ.ಗಳ ಗಡಿ ದಾಟಿದೆ.
"ಎಲ್‌ಪಿಜಿ ಸದ್ಯಕ್ಕೆ ಇನ್ನೂ ನಿಯಂತ್ರಿತ ವಸ್ತುವಾಗಿದೆ. ಆದ್ದರಿಂದ, ತಾಂತ್ರಿಕವಾಗಿ ಸರ್ಕಾರವು ಚಿಲ್ಲರೆ ಮಾರಾಟದ ಬೆಲೆಯನ್ನು ನಿಯಂತ್ರಿಸಬಹುದು. ಆದರೆ ಹಾಗೆ ಮಾಡಿದಲ್ಲಿ ತೈಲ ಕಂಪನಿಗಳಿಗೆ ನಷ್ಟದ ಮೊತ್ತವನ್ನು ಸರಕಾರ ಭರಿಸಬೇಕಾಗುತ್ತದೆ,” ಎಂದು ಮೂಲಗಳು ಪ್ರತಿಪಾದಿಸಿವೆ.
ಸರ್ಕಾರವು ಕಳೆದ ವರ್ಷ, ನಿರಂತರವಾಗಿ ಎಲ್‌ಪಿಜಿ ಬೆಲೆ ಏರಿಕೆ ಮಾಡುವ ಮೂಲಕ ಚಿಲ್ಲರೆ ಮಾರಾಟ ದರವನ್ನು ವೆಚ್ಚಕ್ಕೆ ಸಮನಾಗಿಸಿ ಸಬ್ಸಿಡಿಯನ್ನು ತೆಗೆದುಹಾಕಿತ್ತು. ಆದರೆ ಪೆಟ್ರೋಲ್, ಡೀಸೆಲ್‌ನಂತೆ ಎಲ್‌ಪಿಜಿ ಬೆಲೆ ಏರಿಕೆಯ ತೀರ್ಮಾನವನ್ನು ಸಂಪೂರ್ಣವಾಗಿ ತೈಲ ಕಂಪನಿಗಳ ಕೈಗೆ ಒಪ್ಪಿಸಿಲ್ಲ.
ಆದರೆ, "ಇದುವರೆಗೆ, ವೆಚ್ಚ ಮತ್ತು ಚಿಲ್ಲರೆ ಬೆಲೆಯ ನಡುವಿನ ಅಂತರವನ್ನು ಸಬ್ಸಿಡಿ ಮೂಲಕ ಭರಿಸುವ ಸೂಚನೆಯನ್ನು ಸರಕಾರ ನೀಡಿಲ್ಲ," ಎಂದು ಮೂಲಗಳು ತಿಳಿಸಿವೆ.
ಒಂದೊಮ್ಮೆ ಸರ್ಕಾರವು ಸಬ್ಸಿಡಿ ಮೊತ್ತವನ್ನು ಭರಿಸಲು ಸಿದ್ಧವಿಲ್ಲದಿದ್ದರೆ, ತೈಲ ಮಾರಾಟ ಕಂಪನಿಗಳು ಅನಿವಾರ್ಯವಾಗಿ ಎಲ್‌ಪಿಜಿ ಸಿಲಿಂಡರ್‌ ಮಾರಾಟ ಬೆಲೆಗಳನ್ನು ಏರಿಕೆ ಮಾಡಬೇಕಾಗುತ್ತದೆ. ಆದರೆ ಗ್ರಾಹಕರಿಗೆ ಹೊರೆಯಾಗುವುದನ್ನು ತಪ್ಪಿಸಲು ಕಂಪನಿಗಳು ಒಂದೇ ಬಾರಿ ಬೆಲೆ ಏರಿಕೆ ಮಾಡದೇ ಇರಬಹುದು ಎಂದು ಮೂಲಗಳು ಅಂದಾಜಿಸಿವೆ. ಹೀಗಾಗಿ ಮುಂದೆ ಏನಾಗಲಿದೆ ಎಂಬುದು ಕುತೂಹಲ ಮೂಡಿಸಿದೆ.
ಸದ್ಯಕ್ಕೆ 14.2 ಕೆಜಿ ತೂಕದ ಅಡುಗೆ ಅನಿಲ ಸಿಲಿಂಡರ್‌ ಮುಂಬಯಿ ಮತ್ತು ದಿಲ್ಲಿಯಲ್ಲಿ 899.50 ರೂ.ಗೆ ಮಾರಾಟವಾಗುತ್ತಿದೆ. ಬೆಂಗಳೂರಿನಲ್ಲಿ ಪ್ರತಿ ಸಿಲಿಂಡರ್‌ಗೆ 902.50 ರೂ. ದರವಿದೆ.
