ಬ್ಲ್ಯಾಕ್‌ ಫಂಗಸ್‌ ಪತ್ತೆ ಪರೀಕ್ಷೆ ತುಂಬಾನೇ ದುಬಾರಿ: ಎಂಆರ್‌ಐ ಸ್ಕ್ಯಾನ್‌ ಹೆಸರಲ್ಲಿ ಸುಲಿಗೆ..!

: ರಾಜ್ಯದಲ್ಲಿ ಬ್ಲ್ಯಾಕ್‌ ಫಂಗಸ್‌ ಸೋಂಕು ತೀವ್ರಗೊಳ್ಳುತ್ತಿದೆ. ಚಿಕಿತ್ಸೆಗೆ ಸೋಂಕಿತರು ಪರದಾಡುತ್ತಿದ್ದಾರೆ. ಇದರ ಜತೆಗೆ ಬ್ಲ್ಯಾಕ್‌ ಫಂಗಸ್‌ ಪರೀಕ್ಷೆ ನಡೆಸಲು ಶುಲ್ಕ ವಿಧಿಸಲಾಗುತ್ತಿದೆ. ದರಕ್ಕೆ ಕಡಿವಾಣ ಹಾಕದ ಕುರಿತು ಜನಸಾಮಾನ್ಯರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಪ್ಯಾರಾ ನೇಸಲ್‌ ಸೈನಸ್‌ (ಮೂಗಿನ ಪಕ್ಕದ ಜಾಗ), ಆರ್ಬಿಟ್‌ (ಕಣ್ಣು ಸುತ್ತುವರಿದ ಜಾಗ) ಹಾಗೂ ಮೆದುಳಿಗೆ ಬ್ಲ್ಯಾಕ್‌ ಫಂಗಸ್‌ ತಗುಲಿದ್ದನ್ನು ಎಂಆರ್‌ಐ ಸ್ಕ್ಯಾ‌ನ್‌ ನಡೆಸುವ ಮೂಲಕ ಪತ್ತೆ ಹಚ್ಚಲಾಗುತ್ತಿದೆ. ಈ ಪರೀಕ್ಷಾ ವಿಧಾನಗಳಿಗೆ ಖಾಸಗಿ ಲ್ಯಾಬ್‌ಗಳು 7 ರಿಂದ 12 ಸಾವಿರ ದರ ವಿಧಿಸುತ್ತಿವೆ. ಈ ಸ್ಕ್ಯಾ‌ನ್‌ಗಳಲ್ಲಿ ಬಳಸುವ ಕಾಂಟ್ರಾಸ್‌ ಔಷಧಕ್ಕೂ 2500 ರಿಂದ 4 ಸಾವಿರ ರೂ.ವರೆಗೂ ಸೋಂಕಿತರು ಪಾವತಿಸಬೇಕಾದ ಅನಿವಾರ್ಯತೆ ಸೃಷ್ಟಿಯಾಗಿದೆ. ಬ್ಲ್ಯಾಕ್‌ ಫಂಗಸ್‌ ಆರಂಭಕ್ಕೂ ಮೊದಲು ಅಂದಾಜು 25 ಸಾವಿರದಿಂದ 30 ಸಾವಿರ ರೂ.ವರೆಗೆ ಹಣ ವ್ಯಯಿಸಬೇಕು. ಇದು ಬಡ ಮತ್ತು ಮಧ್ಯಮ ವರ್ಗದ ಕುಟುಂಬಗಳಿಗೆ ಹೊರೆಯಾಗಿದೆ. ದುಬಾರಿ ಏಕೆ ?: ಪರೀಕ್ಷಾ ವಿಧಾನ ಹಾಗೂ ಕಾಂಟ್ರಾಸ್‌ ಔಷಧಕ್ಕೆ ಬೇಡಿಕೆ ಹೆಚ್ಚಾದಂತೆ ಶುಲ್ಕವೂ ಹೆಚ್ಚಾಗುತ್ತಿದೆ. ಸರಕಾರಿ ಆಸ್ಪತ್ರೆಗಳಲ್ಲಿ ಪರೀಕ್ಷಾ ಮತ್ತು ಚಿಕಿತ್ಸಾ ಸೇವೆಯನ್ನು ಸರಕಾರವೇ ಭರಿಸುತ್ತಿದೆ. ಆದರೆ, ಖಾಸಗಿ ಆಸ್ಪತ್ರೆಗಳಲ್ಲಿ ಎಂಆರ್‌ಐ ಉಪಕರಣಕ್ಕೆ 5 ಕೋಟಿ ಬಂಡವಾಳ, ಎಂಆರ್‌ಐನಲ್ಲಿ ಬಳಸುವ ಇತರೆ ಉಪಕರಣ, ವಿದ್ಯುತ್‌, ಸ್ಥಳ, ಎಸಿ ಹಾಗೂ ವೈದ್ಯರ ಸೇವಾ ಶುಲ್ಕವು ಹೆಚ್ಚುತ್ತಿದ್ದು, ಪರ್ಯಾಯವಾಗಿ ಸ್ಕ್ಯಾ‌ನ್‌ ದರವು ಏರಿಕೆ ಕಾಣುತ್ತಿದೆ ಎಂಬುದನ್ನು ಖಾಸಗಿ ಆಸ್ಪತ್ರೆಗಳ ವೈದ್ಯಾಧಿಕಾರಿಗಳು ಹೇಳುತ್ತಾರೆ. ಶುಲ್ಕ ಕಡಿಮೆ ಮಾಡಿ: ಖಾಸಗಿ ಆಸ್ಪತ್ರೆಗಳು ವಿಧಿಸುತ್ತಿರುವ ದರಗಳನ್ನು ಕಡಿಮೆಗೊಳಿಸಿ ಎಂದು ಸಾರ್ವಜನಿಕ ವಲಯದಲ್ಲಿ ಒತ್ತಾಯ ಕೇಳಿ ಬರುತ್ತಿದೆ. ಕೊರೊನಾ ಚಕಿತ್ಸೆಗೂ ಮೊದಲು ಎಕ್ಸ್‌ರೇ, ಸ್ಕ್ಯಾ‌ನಿಂಗ್‌, ಸಿಟಿ ಸ್ಕ್ಯಾ‌ನ್‌ಗಳಿಗೆ ಸರಕಾರ ದರ ನಿಗದಿ ಮಾಡಿರುವಂತೆ ಪಿಎನ್‌ಎಸ್‌, ಆರ್ಬಿಟ್‌ ಹಾಗೂ ಮೆದುಳಿನ ಸ್ಕ್ಯಾ‌ನಿಂಗ್‌, ಕಾಂಟ್ರಾಸ್‌ ಔಷಧಕ್ಕೂ ದರ ಕಡಿಮೆಗೊಳಿಸಬೇಕು ಎಂಬ ಒತ್ತಾಯ ಬರುತ್ತಿದೆ. ಕೊರೊನಾ ಸಂದರ್ಭದಲ್ಲಿ ಎಕ್ಸ್‌ ರೇ, ಸ್ಕ್ಯಾ‌ನಿಂಗ್‌, ಸಿಟಿ ಸ್ಕ್ಯಾ‌ನ್‌ ಗಳಿಗೆ ಮಿತಿ ಮೀರಿ ದರ ವಿಧಿಸುವುದನ್ನು ಸರಕಾರ ನಿಯಂತ್ರಿಸಿ ದರ ನಿಗದಿ ಮಾಡಿದೆ. ಬಿಪಿಎಲ್‌ ಹೊಂದಿದವರಿಗೆ 1,500 ರೂ. ಇತರರಿಗೆ 2,500 ಹಾಗೂ ಎಕ್ಸ್‌ ರೇ ಪರೀಕ್ಷೆಗೆ ಎಲ್ಲ ವರ್ಗದ ಜನರಿಂದ 250 ರೂ. ಪಡೆಯಲು ಸರಕಾರ ದರ ಮಿತಿಗೊಳಿಸಿದೆ. ಪರೀಕ್ಷೆ ಹೇಗೆ?: ಸೋಂಕಿತರಿಗೆ ಪಿಎನ್‌ಎಸ್‌, ಆರ್ಬಿಟ್‌ ಹಾಗೂ ಮೆದುಳಿನ ಎಂಆರ್‌ಐ ಸ್ಕ್ಯಾ‌ನ್‌ ನಡೆಸಲಾಗುತ್ತದೆ. ಈ ಪ್ರಕ್ರಿಯೆಯಲ್ಲಿ ಫಂಗಸ್‌ ಪತ್ತೆ ಆಗದೇ ಇದ್ದರೆ ಕಾಂಟ್ರಾಸ್‌ ಔಷಧ ನೀಡುವ ಮೂಲಕ ಮತ್ತೊಮ್ಮೆ ಸ್ಕ್ಯಾ‌ನ್‌ ನಡೆಸಿ ವರದಿ ಸಿದ್ಧಪಡಿಸಲಾಗುವುದು. ಕಾಂಟ್ರಾಸ್‌ ಔಷಧ ಬಳಸುವುದರಿಂದ ರಕ್ತಕಣ, ರಕ್ತನಾಳಗಳು ಸ್ಪಷ್ವಾಗಿ ಗೋಚರಿಸುತ್ತದೆ. ಸ್ಕ್ಯಾ‌ನ್‌ ಮಾಡಲು ಕನಿಷ್ಠ ಪಕ್ಷ 40 ನಿಮಿಷಗಳ ಅವಧಿ ಬೇಕು. ಹಲವು ಪ್ರಕರಣಗಳಲ್ಲಿ ಎರಡು ಬಾರಿ ಸ್ಕ್ಯಾ‌ನ್‌ ನಡೆಸಬೇಕಿದ್ದು, ಎರಡು ಬಾರಿ ಶುಲ್ಕ ಪಾವತಿಸಬೇಕಾಗುತ್ತಿದೆ. 'ಬ್ಲ್ಯಾಕ್‌ ಫಂಗಸ್‌ ಕೊರೊನಾಗಿಂತಲೂ ಜನಸಾಮಾನ್ಯರಿಗೆ ತುಂಬಾ ಹೊರೆಯಾಗಿದೆ. ಸೋಂಕಿತರು ಗುಣಮುಖರಾಗಿ ಮನೆಗೆ ಬಂದ ಬಳಿಕ ಮತ್ತೆ ಅನಾರೋಗ್ಯ ಕಾಣಿಸಿಕೊಳ್ಳುತ್ತಿದೆ. ಅಂಥವರು ಪುನಃ ಆಸ್ಪತ್ರೆಗೆ ಹೋದಾಗ ಬ್ಲ್ಯಾಕ್‌ ಹಾಗೂ ವೈಟ್‌ ಫಂಗಸ್‌ ಶಂಕೆ ವ್ಯಕ್ತಪಡಿಸುವ ವೈದ್ಯರು, ನಾನಾ ಪರೀಕ್ಷೆಗಳನ್ನು ಮಾಡಿಸುವಂತೆ ಸೂಚಿಸುತ್ತಿದ್ದಾರೆ. ಲ್ಯಾಬ್‌ಗಳು ಪರಿಸ್ಥಿತಿಯನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿವೆ. ದುಬಾರಿ ದರಕ್ಕೆ ಕಡಿವಾಣ ಹಾಕಲು ಸರಕಾರವೇ ಪ್ರತಿ ಪರೀಕ್ಷೆಗೆ ಇಂತಿಷ್ಟು ದರ ನಿಗದಿಪಡಿಸಿದರೆ ಹೆಚ್ಚಿನ ಅನುಕೂಲವಾಗುತ್ತದೆ' ಎನ್ನುತ್ತಾರೆ, ನಗರ ಜಿಲ್ಲೆ ಬಿಜೆಪಿ ಅಧ್ಯಕ್ಷ ಎನ್‌.ಆರ್‌.ರಮೇಶ್‌.