ಬೆಂಗಳೂರಿನಲ್ಲಿ ಕ್ಯಾನ್ಸರ್‌ಗೆ ಆಯುರ್ವೇದ ಮದ್ದಿನ ಸಲಹೆ ಕೊಟ್ಟವರ ವಿರುದ್ಧ ದೂರು..!

: ಕ್ಯಾನ್ಸರ್‌ನಿಂದ ಬಳಲುತ್ತಿದ್ದ ಮಹಿಳೆಗೆ ಆರ್ಯುವೇದ ನೀಡಿ ಸಾವಿಗೆ ಕಾರಣರಾದ ಮೂವರ ವಿರುದ್ಧ ಮೃತ ಮಹಿಳೆಯ ಪತಿ ಹಲಸೂರು ಗೇಟ್‌ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ. ಮೃತ ಮಹಿಳೆಯ ಪತಿ ಪ್ರೊ. ಅವಿನಾಶ್‌ ಶಂಕರ್‌ ಶೇಠ್‌ ನೀಡಿದ ದೂರಿನ ಮೇರೆಗೆ ಔಷಧ ಶಾಪ್‌ ಮಾಲೀಕ ಕುಮಾರ್‌, ಶಂಕರ್‌ ಯಾದವ್‌ ಹಾಗೂ ಸಂತೋಷ್‌ ವಿರುದ್ಧ ಎಫ್‌ಐಆರ್‌ ದಾಖಲಾಗಿದೆ. ಜೀವನ ಬಿಮಾ ನಗರದ ಅವಿನಾಶ್‌ ಅವರ ಪತ್ನಿ ಕ್ಯಾನ್ಸರ್‌ ರೋೕಗದಿಂದ ಬಳಲುತ್ತಿದ್ದರು. ಹೀಗಾಗಿ, ನವೆಂಬರ್ 12ರಂದು ಖಾಸಗಿ ಆಸ್ಪತ್ರೆಗೆ ದಾಖಲಿಸಿ ಆಕೆಗೆ ಚಿಕಿತ್ಸೆ ಕೊಡಿಸುತ್ತಿದ್ದರು. ಈ ವೇಳೆ ಆಸ್ಪತ್ರೆಯಲ್ಲೇ ಸಂತೋಷ್‌ ಎಂಬ ವ್ಯಕ್ತಿ ಅವಿನಾಶ್‌ ಅವರಿಗೆ ಪರಿಚಯವಾಗಿದ್ದು, ತನ್ನ ಸ್ನೇಹಿತ ಶಂಕರ್‌ ಯಾದವ್‌ ಎಂಬುವರ ಪತ್ನಿ ಇದೇ ರೀತಿ ಕ್ಯಾನ್ಸರ್‌ನಿಂದ ಬಳಲುತ್ತಿದ್ದರು. ಅವರು ಆರ್ಯುವೇದ ಔಷಧಿ ತೆಗೆದುಕೊಂಡಿದ್ದರಿಂದ ರೋಗದಿಂದ ಗುಣಮುಖರಾಗಿದ್ದರು. ಹೀಗಾಗಿ, ತಾವು ತಮ್ಮ ಪತ್ನಿಗೆ ಒಮ್ಮೆ ಕೊಡಿಸಬಹುದು ಎಂದು ಹೇಳಿ ಶಂಕರ್‌ ಅವರ ಮೊಬೈಲ್‌ ನಂಬರ್‌ ಸಹ ಅವಿನಾಶ್‌ಗೆ ಕೊಟ್ಟಿದ್ದರು. ಅವಿನಾಶ್‌ ಅವರು ಶಂಕರ್‌ಗೆ ಕರೆ ಮಾಡಿದ ವೇಳೆ ತನ್ನ ಪತ್ನಿಗೂ ಕ್ಯಾನ್ಸರ್‌ ಬಂದಿತ್ತು. ಗಿಡ ಮೂಲಿಕೆ ಔಷಧಿ ನೀಡಿದ್ದರಿಂದ ವಾಸಿಯಾಗಿದೆ. ನೀವೂ ಆರ್ಯುವೇದ ಔಷಧಿ ಖರೀದಿಸಿ ಪತ್ನಿಯ ದೇಹಕ್ಕೆ ಹಚ್ಚಿದರೆ ರೋಗ ಗುಣಮುಖವಾಗಲಿದೆ ಎಂದು ಹೇಳಿದ್ದಾರೆ. ಕಬ್ಬನ್‌ಪೇಟೆ ರಸ್ತೆಯಲ್ಲಿರುವ ಕುಮಾರ್‌ ಅವರ 'ಶಿವಶಂಕರ್‌ ಆರ್ಯುವೇದ ಶಾಪ್‌' ಶಾಪ್‌ಗೆ ಹೋಗಿ ಔಷಧಿ ಖರೀದಿಸುವಂತೆ ಶಂಕರ್‌ ಸೂಚಿಸಿದ್ದರು. ಅದರಂತೆ ಅವಿನಾಶ್‌ 2.20 ಲಕ್ಷ ರೂಪಾಯಿ ಮೌಲ್ಯದ ಔಷಧಿ ಖರೀದಿಸಿ ತಂದಿದ್ದರು. ಸಲಹೆ ನೀಡಿದ ಕೃತಜ್ಞತೆಗಾಗಿ ಶಂಕರ್‌ಗೂ 49 ಸಾವಿರ ರೂ.ಗಳನ್ನು ಆನ್‌ಲೈನ್‌ ಮೂಲಕ ಪಾವತಿಸಿದ್ದಾರೆ. ಇಷ್ಟೇ ಅಲ್ಲದೆ ತಿಪ್ಪಸಂದ್ರದಲ್ಲಿರುವ ಧನ ಲಕ್ಷ್ಮಿ ಚಿನ್ನಾಭರಣ ಅಂಗಡಿಯಲ್ಲಿ 1.70 ಲಕ್ಷ ಮೌಲ್ಯದ ಚಿನ್ನದ ಸರ ಖರೀದಿಸಿ ಕಾಣಿಕೆಯಾಗಿ ನೀಡಿದ್ದಾರೆ. ಸಂತೋಷ್‌ ಹಾಗೂ ಶಂಕರ್‌ ನೀಡಿದ ಸಲಹೆಯಂತೆ ಅವಿನಾಶ್‌ ತನ್ನ ಪತ್ನಿ ದೇಹಕ್ಕೆ ಆರ್ಯುವೇದ ಔಷಧಿ ಹಚ್ಚಿದ್ದಾರೆ. ಆದರೆ, ರೋಗ ನಿಯಂತ್ರಣವಾಗದೇ ಉಲ್ಬಣಗೊಂಡು ಆಕೆ ಸಾವನ್ನಪ್ಪಿದ್ದಾರೆ. ಹಾಗಾಗಿ, ತನ್ನ ಪತ್ನಿಯ ಸಾವಿಗೆ ಮೂವರು ವ್ಯಕ್ತಿಗಳೇ ಕಾರಣ ಎಂದು ಆರೋಪಿಸಿ ಹಲಸೂರು ಗೇಟ್‌ ಪೊಲೀಸ್‌ ಠಾಣೆಯಲ್ಲಿ ಅವಿನಾಶ್‌ ನೀಡಿದ್ದಾರೆ. ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.