ಬಂಗಾರದ ಬೆಲೆಯಿದ್ದರೂ ಹತ್ತಿ ಖರೀದಿಗೆ ಮುಂದಾಗದ ಸರಕಾರ: ದಲ್ಲಾಳಿಗಳ ಹೆಚ್ಚಳ

ಶಹಾಪುರ: ತಾಲೂಕಿನಾದ್ಯಂತ ಹೆದ್ದಾರಿಗಳ ಅಕ್ಕಪಕ್ಕದಲ್ಲಿ ಅನಧಿಕೃತ ಖರೀದಿಸುವ ದಲ್ಲಾಳಿಗಳ ಸಂಖ್ಯೆ ಹೆಚ್ಚಳವಾಗಿದ್ದು, ತೂಕದಲ್ಲಿ ಮೋಸ ಹಾಗೂ ಇನ್ನಿತರ ವೆಚ್ಚಗಳಿಂದ ರೈತರಿಗೆ ಸಂಕಷ್ಟಕ್ಕೀಡು ಮಾಡಿದೆ. ಹೆಚ್ಚಿನ ದರಕ್ಕೆ ಹತ್ತಿ ಖರೀದಿಸುತ್ತಿರುವುದು ರೈತರಿಗೆ ಸಂತಸ ತಂದಿದ್ದರೂ ಕೆಲವಡೆ ತೂಕ ಹಾಗೂ ಭದ್ರತೆಯ ಗ್ಯಾರಂಟಿ ಇಲ್ಲದಂತಾಗಿ ಅನುಮಾನಗಳಿಗೆಡೆ ಮಾಡಿದೆ. ಪ್ರಕೃತಿ ವಿಕೋಪ, ಅನಾವೃಷ್ಟಿಯಿಂದಾಗಿ ಈ ಬಾರಿ ಸಾಕಷ್ಟು ರೈತರು ಹತ್ತಿ ಬೆಳೆ ಬೆಳೆಯದಂತಾಗಿದೆ. ಬೆಳೆದಿರೋ ಅಲ್ಪಸ್ವಲ್ಪ ರೈತರ ಹತ್ತಿಗೆ ಬಂಗಾರದಂತಹ ಬೆಲೆ ಬಂದಿದೆ. ಪ್ರತಿ ಕ್ವಿಂಟಾಲ್‌ ಹತ್ತಿಗೆ ರೂ.8,500ದರದಲ್ಲಿ ಖಾಸಗಿಯವರು ಖರೀದಿಸುತ್ತಿದ್ದಾರೆ. ಸರಕಾರ ಮಾತ್ರ ರೂ.6,500 ಬೆಲೆ ನಿಗದಿಗೊಳಿಸಿದೆ. ಹೀಗಾಗಿ ಕೃಷಿ ಮಾರುಕಟ್ಟೆ ಉತ್ಪನ್ನ ಸಮಿತಿಗಳಲ್ಲಿ ಯಾವೊಬ್ಬ ರೈತರು ಹತ್ತಿ ಮಾರಾಟ ಮಾಡಲು ಹೋಗುತ್ತಿಲ್ಲ. ಇದನ್ನೆ ಬಂಡವಾಳವಾಗಿಸಿಕೊಂಡ ಹೊರ ರಾಜ್ಯಗಳಾದ ಮಹಾರಾಷ್ಟ್ರ, ಆಂಧ್ರ, ಗುಜರಾತ ರಾಜ್ಯಗಳಿಂದ ಕೆಲವು ದಲ್ಲಾಳಿಗಳು ಹೆದ್ದಾರಿಗಳಲ್ಲಿಯೇ ಹತ್ತಿ ಖರೀದಿ ಸ್ಥಾಪಿಸಿ ಹಗಲಿರುಳು ಲಾರಿಗಟ್ಟಲೆ ಖರೀದಿ ನಡೆಸಿದ್ದಾರೆ. ಕೆಲವು ರೈತರು ಈ ಅನಧಿಕೃತ ಖರೀದಿ ಕೇಂದ್ರಗಳಲ್ಲಿ ತೂಕದ ಕುರಿತು ಅನುಮಾನ ವ್ಯಕ್ತ ಪಡಿಸುತ್ತಿದ್ದಾರೆ. ಖರೀದಿಸಿದ ಹತ್ತಿಯ ಹಣವನ್ನು ರೈತರಿಗೆ ನೀಡಲು ಯಾವುದೇ ಗ್ಯಾರಂಟಿ ಇಲ್ಲದಂತಾಗಿದ್ದು ಆತಂಕಕ್ಕೀಡು ಮಾಡಿದೆ. ಸರಕಾರ ಕಳೆದ ವರ್ಷದಿಂದ ಕೃಷಿ ಮಾರುಕಟ್ಟೆ ಉತ್ಪನ್ನಗಳ ಮೇಲೆ ನಿಯಮಾವಳಿಗಳನ್ನು ಮಾರ್ಪಾಡು ಮಾಡಿದ್ದರಿಂದ ಖರೀದಿ ಕೇಂದ್ರಗಳನ್ನು ಸ್ಥಾಪನೆ ಮಾಡಿಲ್ಲ. ಸಹಜವಾಗಿ ಖಾಸಗಿಯವರು ಸರಕಾರಕ್ಕಿಂತಲೂ ಹೆಚ್ಚುವರಿ ದರಕ್ಕೆ ಹತ್ತಿ ಖರೀದಿಗೆ ಮುಂದಾಗಿದ್ದಾರೆ. ಹೀಗಾಗಿ ನಾವು ಯಾವೊಬ್ಬ ರೈತರಿಗೆ ಖಾಸಗಿಯವರಿಗೆ ಹತ್ತಿ ಮಾರಾಟ ಮಾಡಬೇಡಿ ಎಂದು ಹೇಳಲು ಸಾಧ್ಯವಿಲ್ಲ ಎನ್ನುತ್ತಾರೆ ನಗರದ ಕೃಷಿ ಉತ್ಪನ್ನ ಮಾರುಕಟ್ಟೆ ಸಮಿತಿ ಕಾರ್ಯದರ್ಶಿ ಶಿವುಕುಮಾರ ದೇಸಾಯಿ. ತತ್‌ಕ್ಷಣವೇ ಸರಕಾರ ಹತ್ತಿ ಖರೀದಿ ಕೇಂದ್ರಗಳನ್ನು ಸ್ಥಾಪಿಸಿ ಖಾಸಗಿಯವರು ನೀಡುವ ದರದಂತೆ ನೀಡಿ ಹತ್ತಿ ಖರೀದಿಸಿದರೆ ರೈತರಿಗೆ ಅನುಕೂಲವಾಗುತ್ತದೆ ಎನ್ನುವುದು ರೈತ ಸಮುದಾಯದ ಅಭಿಪ್ರಾಯವಾಗಿದೆ. ದಲ್ಲಾಳಿಗಳು ಹೆದ್ದಾರಿಗಳ ಪಕ್ಕದಲ್ಲಿ ಭರದಿಂದ ಖರೀದಿಸುತ್ತಿರುವ ಹತ್ತಿ ಕೇಂದ್ರಗಳಿಗೆ ಸಂಬಂಧಿಸಿದ ಅಧಿಕಾರಿಗಳು ತಪಾಸಣೆ ನಡೆಸುವ ಮೂಲಕ ರೈತರಿಗೆ ಆಗಬಹುದಾದ ಮೋಸವನ್ನು ತಪ್ಪಿಸಬೇಕಾದ ಅನಿವಾರ್ಯತೆ ಇದೆ. ಹೊರ ರಾಜ್ಯಗಳಿಂದ ಬಂದ ದಲ್ಲಾಳಿಗಳು ತಾಲೂಕಿನಾದ್ಯಂತ ಹೆದ್ದಾರಿಗಳ ಪಕ್ಕದಲ್ಲಿ ಅನಧಿಕೃತ ಹತ್ತಿ ಖರೀದಿಸುತ್ತಿದ್ದಾರೆ. ಆದರೆ ಬಂಗಾರದಂತಹ ಬೆಲೆ ಇರುವ ಹತ್ತಿಗೆ ಸ್ವಲ್ಪವೇ ತೂಕದಲ್ಲಿ ವ್ಯತ್ಯಾಸವಾದರೂ ರೈತರು ಮೋಸ ಹೋಗಲಿದ್ದಾರೆ. ಜಿಲ್ಲಾಡಳಿತ ಕೊನೆಯ ಪಕ್ಷ ದಲ್ಲಾಳಿಗಳ ಖರೀದಿ ಕೇಂದ್ರದ ಮೇಲೆ ನಿಗಾವಹಿಸುವುದು ಅಗತ್ಯ. -ಶರಣರೆಡ್ಡಿ ಹತ್ತಿಗೂಡುರು, ದಲಿತ ಯುವ ಮುಖಂಡರು.