'ಪೊಯೆಸ್‌ ಗಾರ್ಡನ್‌' ಸ್ವಾಧೀನಕ್ಕೆ ಪಡೆದ ಜಯಾ ಸೊಸೆ ದೀಪಾ ಜಯಕುಮಾರ್‌, ಎಐಎಡಿಎಂಕೆಗೆ ಹಿನ್ನಡೆ

ಚೆನ್ನೈ: ತಮಿಳುನಾಡಿನ ಮಾಜಿ ಮುಖ್ಯಮಂತ್ರಿ ಜೆ. ಜಯಲಲಿತಾ ಅವರ ಚೆನ್ನೈನ ಪೊಯೆಸ್‌ ಗಾರ್ಡನ್‌ನಲ್ಲಿರುವ ನಿವಾಸ ಕೊನೆಗೂ ಜಯಾ ಅವರ ಏಕೈಕ ಸಹೋದರನ ಮಕ್ಕಳಿಗೆ ದಕ್ಕಿದೆ. ಸುದೀರ್ಘ ಕಾನೂನು ಹೋರಾಟದ ಬಳಿಕ ತಮ್ಮ ಪಾಲಿಗೆ ಬಂದ ಪೊಯೆಸ್‌ ಗಾರ್ಡನ್‌ನಲ್ಲಿನ ನಿವಾಸ ‘ವೇದ ನಿಲಯಂ’ ಅನ್ನು ಜಯಾ ಅವರ ಸಹೋದರ ಜಯಕುಮಾರ್‌ ಅವರ ಮಕ್ಕಳಾದ ದೀಪಾ ಮತ್ತು ದೀಪಕ್‌ ಅವರು ಶುಕ್ರವಾರ ತಮ್ಮ ಸ್ವಾಧೀನಕ್ಕೆ ಪಡೆದಿದ್ದಾರೆ. ಈ ಮೂಲಕ ಜಯಾಲಲಿತಾ ಅವರ ಆಸ್ತಿ ವಿವಾದಕ್ಕೆ ತೆರೆ ಬಿದ್ದಿದೆ. ಚೆನ್ನೈನ ಜಿಲ್ಲಾಧಿಕಾರಿ ಜೆ. ವಿಜಯ್‌ ರಾಣಿ ಅವರು ಅಧಿಕೃತವಾಗಿ ಬಂಗಲೆಯ ಕೀಲಿಕೈ ಅನ್ನು ದೀಪಾ ಮತ್ತು ದೀಪಕ್‌ ಅವರಿಗೆ ಒಪ್ಪಿಸಿದ್ದಾರೆ. ಮದ್ರಾಸ್‌ ಹೈಕೋರ್ಟ್‌ನ ಏಕ ಸದಸ್ಯ ಪೀಠವು ನ. 24ರಂದು ನೀಡಿದ ಆದೇಶದನ್ವಯ, ಕಾನೂನುಬದ್ಧ ವಾರಸುದಾರರಿಗೆ ಜಯಲಲಿತಾ ಅವರ ಆಸ್ತಿಯ ಒಡೆತನ ನೀಡಲಾಗಿದೆ. ಈ ನಿವಾಸ ಜಯಕುಮಾರ್‌ ಅವರ ಮಕ್ಕಳಿಗೆ ಸೇರಬೇಕೆಂದು ಕೋರ್ಟ್‌ ತನ್ನ ಆದೇಶದಲ್ಲಿ ಹೇಳಿತ್ತು. ಆ ಮೂಲಕ ಈ ಮನೆಗಳನ್ನು ವಶಕ್ಕೆ ಪಡೆಯುವ ಎಐಎಡಿಎಂಕೆ ಪ್ರಯತ್ನಕ್ಕೆ ನ್ಯಾಯಾಲಯ ತಡೆ ಹಾಕಿತ್ತು. ‘‘ಇದು ಸಾಧಾರಣ ಗೆಲುವಲ್ಲ, ಅತಿದೊಡ್ಡ ಗೆಲುವು. ನಮ್ಮ ಬಾಲ್ಯದ ನೆನಪುಗಳು ಹಾಗೂ ಜಯಲಲಿತಾ ಅವರೊಂದಿಗಿನ ಕ್ಷಣಗಳ ನೆನಪುಗಳನ್ನು ಹೊಂದಿರುವ ಸ್ಥಳವು ಕೊನೆಗೂ ನಮಗೆ ಸೇರಿತು. ಇದು ಅತ್ಯಂತ ಸಂತಸದ ಕ್ಷಣ,’’ ಎಂದು ದೀಪಾ ಹಾಗೂ ದೀಪಕ್‌ ಹೇಳಿದ್ದಾರೆ. "ನನ್ನ ಅತ್ತೆಯ ಅನುಪಸ್ಥಿತಿಯಲ್ಲಿ ನಾನು ಇದೇ ಮೊದಲ ಬಾರಿಗೆ ಮನೆಗೆ ಭೇಟಿ ನೀಡುತ್ತಿದ್ದೇನೆ. ಈಗ ಮನೆ ಬರಡಾಗಿದ್ದು, ಖಾಲಿ ಖಾಲಿಯಾಗಿದೆ. ನನ್ನ ಅತ್ತೆ ಬಳಸುತ್ತಿದ್ದ ಪೀಠೋಪಕರಣಗಳನ್ನು ತೆಗೆದುಹಾಕಲಾಗಿದೆ,” ತಿಳಿಸಿದ್ದಾರೆ. ನಿವಾಸವನ್ನು ಸ್ಮಾರಕ ಮಾಡಲು ಹೊರಟಿತ್ತು ಎಐಎಡಿಎಂಕೆ ಸರಕಾರ! ರಾಜ್ಯದಲ್ಲಿ ಈ ಹಿಂದೆ ಅಧಿಕಾರದಲ್ಲಿದ್ದ ಎಐಎಡಿಎಂಕೆ ಸರಕಾರವು ಜಯಲಲಿತಾ ಅವರ ಕುಟುಂಬವನ್ನು ಸಂಪರ್ಕಿಸದೆ ಮನೆಯನ್ನು ಸ್ವಾಧೀನಪಡಿಸಿಕೊಂಡಿತ್ತು. ಜತೆಗೆ ಕಟ್ಟಡವನ್ನು ಸ್ಮಾರಕವನ್ನಾಗಿ ಪರಿವರ್ತಿಸಲು ಆರಂಭಿಸಿತ್ತು. ಆದರೆ ಸರಕಾರದ ಈ ನಿರ್ಧಾರವನ್ನು ಪ್ರಶ್ನಿಸಿ ದೀಪಾ ಮತ್ತು ಅವರ ಸಹೋದರ ದೀಪಕ್‌ ನ್ಯಾಯಾಲಯದ ಮೆಟ್ಟಿಲೇರಿದ್ದರು. ಈ ವೇಳೆ ಮದ್ರಾಸ್‌ ಹೈಕೋರ್ಟ್‌ ಆಸ್ತಿ ಅವರಿಬ್ಬರಿಗೆ ಸೇರಬೇಕು ಎಂದು ಹೇಳಿದ್ದಲ್ಲದೆ, ಕುಟುಂಬಸ್ಥರಿಗೆ ಪರಿಹಾರ ನೀಡಲು ಬ್ಯಾಂಕ್‌ನಲ್ಲಿ ಠೇವಣಿ ಇಟ್ಟಿದ್ದ ಹಣವನ್ನು ವಾಪಸ್‌ ಪಡೆಯುವಂತೆ ಸರಕಾರಕ್ಕೆ ಸೂಚಿಸಿತ್ತು. ಪೊಯೆಸ್‌ ಗಾರ್ಡನ್‌ ನಿವಾಸವನ್ನು ವಶಕ್ಕೆ ಪಡೆದುಕೊಂಡ ಸರಕಾರದ ನಿರ್ಧಾರ ಅಕ್ರಮ ಎಂದು ಹೇಳಿದ್ದ ನ್ಯಾಯಾಲಯ, “ಈ ಸ್ವಾಧೀನದಲ್ಲಿ ಯಾವುದೇ ಸಾರ್ವಜನಿಕ ಹಿತಾಸಕ್ತಿ ಕಾಣುತ್ತಿಲ್ಲ... ಕೆಲವು ಕಿಲೋಮೀಟರ್ ದೂರದಲ್ಲಿರುವ ಮರೀನಾ (ಕಡಲತೀರ) ಉದ್ದಕ್ಕೂ ಜಯಲಲಿತಾ ಅವರಿಗೆ ಈಗಾಗಲೇ 80 ಕೋಟಿ ರೂ. ಸ್ಮಾರಕ ನಿರ್ಮಿಸಲಾಗಿದೆ. 80 ಕೋಟಿ ರೂ.ನ ಮರೀನಾ ಸ್ಮಾರಕವು ಒದಗಿಸದ ಯಾವ ಸ್ಪೂರ್ತಿದಾಯಕ ಕಥೆಯನ್ನು ವೇದ ನಿಲಯಂ ಒದಗಿಸುತ್ತದೆ?," ಎಂದು ಪ್ರಶ್ನಿಸಿತ್ತು. ಆದರೆ ನ್ಯಾಯಾಲಯದ ಆದೇಶದ ಬಳಿಕ ಪ್ರತಿಕ್ರಿಯೆ ನೀಡಿರುವ ಎಐಎಡಿಎಂಕೆ, ಕೋರ್ಟ್‌ ಆದೇಶದ ವಿರುದ್ಧ ಪಕ್ಷ ಮೇಲ್ಮನವಿ ಸಲ್ಲಿಸಲಿದೆ ಎಂದು ಹೇಳಿದೆ.