ನಾಯಿಗೆ ಬಲೂನ್ ಕಟ್ಟಿ ಹಾರಿಸಿ ವಿಡಿಯೋ ಪೋಸ್ಟ್ ಮಾಡಿದ ಯೂಟ್ಯೂಬರ್ ಬಂಧನ

ಹೊಸದಿಲ್ಲಿ: ತನ್ನ ಮುದ್ದಿನ ನಾಯಿಯನ್ನು ಬಲೂನಿನೊಂದಿಗೆ ಹಾರಿಬಿಟ್ಟು ವಿಕೃತಿ ಪ್ರದರ್ಶಿಸಿದ ಮೂಲದ ಯೂಟ್ಯೂಬರ್‌ನನ್ನು ದಿಲ್ಲಿ ಪೊಲೀಸರು ಬಂಧಿಸಿದ್ದಾರೆ. ಬಲೂನುಗಳ ಗೊಂಚಲಿಗೆ ನಾಯಿಯನ್ನು ಕಟ್ಟಿ ಹಾರಿಸುವ ಪ್ರಯತ್ನ ಮಾಡಿದ್ದ ವಿರುದ್ಧ ಎನ್‌ಜಿಒ ಒಂದು ಪ್ರಾಣಿಯ ಮೇಲೆ ಕ್ರೌರ್ಯ ತೋರಿದ ಆರೋಪದಡಿ ದೂರು ನೀಡಿತ್ತು. ಯೂಟ್ಯೂಬ್‌ನಲ್ಲಿ ಗೌರವ್‌ಝೋನ್ ಎಂಬ ಚಾನೆಲ್ ಹೊಂದಿರುವ 27 ವರ್ಷದ ಗೌರವ್ ಶರ್ಮಾಗೆ 4.15 ಮಿಲಿಯನ್ ಫಾಲೋವರ್‌ಗಳಿದ್ದಾರೆ. ನಾಯಿಗೆ ಬಲೂನ್ ಕಟ್ಟಿ ಹಾರಿಸುವ ಅಮಾನವೀಯ ವಿಡಿಯೋ ಮಾಡಿದ್ದ ಗೌರವ್, ಅದನ್ನು ಸ್ವತಃ ಅಪ್‌ಲೋಡ್ ಮಾಡಿದ್ದ. ಈ ವಿಡಿಯೋ ವ್ಯಾಪಕ ಟೀಕೆಗೆ ಒಳಗಾದ ಬಳಿಕ ಅದನ್ನು ತೆಗೆದುಹಾಕಿದ್ದ ಆತ, ತನ್ನ ಕೃತ್ಯಕ್ಕೆ ಕ್ಷಮೆ ಕೋರುವ ಹಾಗೂ ಸಾಕು ನಾಯಿಯ ಸುರಕ್ಷತೆಗೆ ಅಗತ್ಯ ಮುನ್ನೆಚ್ಚರಿಕೆಗಳನ್ನು ತೆಗೆದುಕೊಳ್ಳಲಾಗಿತ್ತು ಎಂದು ವಿವರಿಸುವ ಮತ್ತೊಂದು ವಿಡಿಯೋವನ್ನು ಅಪ್‌ಲೋಡ್ ಮಾಡಿದ್ದ. ' ಅವರನ್ನು ವಿಪತ್ತು ನಿರ್ವಹಣಾ ಕಾಯ್ದೆ ಮತ್ತು ಪ್ರಾಣಿಗಳ ಮೇಲಿನ ಕ್ರೌರ್ಯ ತಡೆ ಕಾಯ್ದೆ ಅಡಿ ಪ್ರಕರಣ ದಾಖಲಿಸಿ ಬಂಧಿಸಲಾಗಿದೆ' ಎಂದು ದಿಲ್ಲಿ ದಕ್ಷಿಣ ವಿಭಾಗದ ಉಪ ಪೊಲೀಸ್ ಆಯುಕ್ತ ಅತುಲ್ ಕುಮಾರ್ ಠಾಕೂರ್ ತಿಳಿಸಿದ್ದಾರೆ. ಈ ಅಪರಾಧವು ಜಾಮೀನು ನೀಡುವಂತಹ ಕೃತ್ಯವಾಗಿರುವುದರಿಂದ ಬುಧವಾರ ಬಂಧನಕ್ಕೆ ಒಳಗಾದ ಕೂಡಲೇ ಗೌರವ್ ಶರ್ಮಾಗೆ ಜಾಮೀನು ದೊರಕಿದೆ. ಸಣ್ಣ ನಾಯಿಗಳನ್ನು ಹೀಲಿಯಂ ಬಲೂನುಗಳಿಗೆ ಕಟ್ಟಿ ಹಾರಿಸಿ ವಿಡಿಯೋ ಮಾಡುವ ಟ್ರೆಂಡ್ ಕೆಲವು ದೇಶಗಳಲ್ಲಿವೆ. ಇದು ವ್ಯಾಪಕ ಟೀಕೆ, ಖಂಡನೆಗಳಿಗೆ ಒಳಗಾಗಿದೆ. ವಿದೇಶಿ ವಿಡಿಯೋಗಳನ್ನು ನೋಡಿ ಪ್ರಭಾವಿತರಾಗಿ ಹೀಗೆ ಮಾಡಿದ್ದಾಗಿ ಶರ್ಮಾ ಹೇಳಿದ್ದಾನೆ. ಕಳೆದ ಶುಕ್ರವಾರ ಶರ್ಮಾ ಮತ್ತು ಆತನ ತಾಯಿ, 'ಡಾಲರ್' ಹೆಸರಿನ ಕಂದು ಬಣ್ಣದ ಪೊಮೆರಿಯನ್ ನಾಯಿಯೊಂದಿಗೆ ಹೈಡ್ರೋಜೆನ್ ಬಲೂನ್‌ಗಳನ್ನು ಖರೀದಿಸಲು ಅಂಗಡಿಗೆ ತೆರಳಿದ್ದ ವಿಡಿಯೋ ಹಂಚಿಕೊಂಡಿದ್ದ. ಹೀಲಿಯಂ ಬಲೂನ್‌ಗಳು ದುಬಾರಿಯಾಗಿದ್ದರಿಂದ ಹೈಡ್ರೋಜೆನ್ ಬಲೂನು ಖರೀದಿಸುತ್ತಿರುವುದಾಗಿ ತಿಳಿಸಿದ್ದ.