'ತಮಿಳ್ ತಾಯ್ ವಳ್ತು' ನಾಡಗೀತೆಯಾಗಿ ಘೋಷಿಸಿದ ತಮಿಳುನಾಡು: ಹಾಡುವಾಗ ಎದ್ದು ನಿಲ್ಲುವುದು ಕಡ್ಡಾಯ

ಚೆನ್ನೈ: 'ತಮಿಳ್ ತಾಯ್ ವಳ್ತು' ಗೀತೆಯನ್ನು ನಾಡಗೀತೆಯಾಗಿ ಸರ್ಕಾರ ಶುಕ್ರವಾರ ಘೋಷಣೆ ಮಾಡಿದೆ. ಶೈಕ್ಷಣಿಕ ಸಂಸ್ಥೆಗಳು ಮತ್ತು ಸರ್ಕಾರಿ ಕಚೇರಿಗಳಲ್ಲಿನ ಎಲ್ಲ ಸಾರ್ವಜನಿಕ ಕಾರ್ಯಕ್ರಮಗಳಲ್ಲಿ ಅದನ್ನು ಕಡ್ಡಾಯವಾಗಿ ಹಾಡುವಂತೆ ಆದೇಶಿಸಿದೆ. ಶಾಲೆಗಳು, ಕಾಲೇಜುಗಳು, ವಿಶ್ವವಿದ್ಯಾಲಯಗಳು ಮತ್ತು ಸರ್ಕಾರಿ ಕಚೇರಿಗಳಲ್ಲಿ ನಡೆಯುವ ಎಲ್ಲ ಸಾರ್ವಜನಿಕ ಕಾರ್ಯಕ್ರಮಗಳ ಆರಂಭದಲ್ಲಿ ಹಾಡಬೇಕು. ಅಂಗವೈಕಲ್ಯವುಳ್ಳವರನ್ನು ಹೊರತುಪಡಿಸಿ ಪ್ರತಿಯೊಬ್ಬರೂ ನಾಡಗೀತೆ ಮೊಳಗುವಾಗ ಎದ್ದು ನಿಲ್ಲಬೇಕು ಎಂದು ತಮಿಳುನಾಡು ಸರ್ಕಾರ ತನ್ನ ಆದೇಶದಲ್ಲಿ ತಿಳಿಸಿದೆ. ಮಾತೆಯನ್ನು ಕೊಂಡಾಡುವ ತಮಿಳ್ ತಾಯ್ ವಳ್ತು ಗೀತೆಯು 55 ಸೆಕೆಂಡ್‌ಗಳಷ್ಟು ದೀರ್ಘವಿದೆ. ಇದನ್ನು ಹಾಡುವಾಗ ವಿಶೇಷ ಸಾಮರ್ಥ್ಯದ ವ್ಯಕ್ತಿಗಳನ್ನು ಹೊರತುಪಡಿಸಿ ಎಲ್ಲರೂ ಎದ್ದು ನಿಂತು ಗೌರವಿಸುವುದು ಕಡ್ಡಾಯ ಎಂದು ಮುಖ್ಯಮಂತ್ರಿ ಎಂಕೆ ಸ್ಟಾಲಿನ್ ತಿಳಿಸಿದ್ದಾರೆ. ಪ್ರಕರಣ ಒಂದರ ವಿಚಾರಣೆ ವೇಳೆ, 'ತಮಿಳ್ ತಾಯ್ ವಳ್ತು' ಗೀತೆಯು ಕೇವಲ ಒಂದು ಪ್ರಾರ್ಥನೆ ಹಾಡು ಎಂದು ಹೇಳಿತ್ತು. ಸಾರ್ವಜನಿಕ ಸಮಾರಂಭಗಳಲ್ಲಿ ಈ ಹಾಡು ಹಾಡುವಾಗ ಯಾರೂ ಎದ್ದು ನಿಲ್ಲಬೇಕು ಎಂದು ಯಾವುದೇ ಸರ್ಕಾರಿ ಆದೇಶ ಇಲ್ಲ ಎಂಬುದನ್ನು ಅದು ಗಮನಿಸಿತ್ತು. 'ತಮಿಳ್ ತಾಯ್ ವಳ್ತು' ಒಂದು ರಾಷ್ಟ್ರಗೀತೆ ಅಲ್ಲ. ಹೀಗಾಗಿ ಅದನ್ನು ಹಾಡುವಾಗ ಪ್ರತಿಯೊಬ್ಬರೂ ಎದ್ದು ನಿಲ್ಲುವ ಅಗತ್ಯವಿಲ್ಲ ಎಂದು ಅದು ತನ್ನ ತೀರ್ಪಿನಲ್ಲಿ ಹೇಳಿತ್ತು. ಈ ಹಿನ್ನೆಲೆಯಲ್ಲಿ ತಮಿಳುನಾಡು ಸರ್ಕಾರ ಹೊಸ ಆದೇಶ ಹೊರಡಿಸಿದೆ. ಇದೇ ವರ್ಷ ನಡೆದ ಐಐಟಿ ಮದ್ರಾಸ್‌ನ ಘಟಿಕೋತ್ಸವದಲ್ಲಿ 'ತಮಿಳ್ ತಾಯ್ ವಳ್ತು' ಗೀತೆಯನ್ನು ಹಾಡಿರಲಿಲ್ಲ. ಇದು ವ್ಯಾಪಕ ಚರ್ಚೆಗೆ ಗ್ರಾಸವಾಗಿತ್ತು. ಈ ಸಂಬಂಧ ತಮಿಳುನಾಡು ಉನ್ನತ ಶಿಕ್ಷಣ ಸಚಿವರು ಸಂಸ್ಥೆಯ ನಿರ್ದೇಶಕರಿಗೆ ಪತ್ರ ಬರೆದು ಅಸಮಾಧಾನ ವ್ಯಕ್ತಪಡಿಸಿದ್ದರು. 'ತಮಿಳು ಮಾತೆಗೆ ಪ್ರಾರ್ಥನೆ' ಎಂಬ ಗೀತೆಯನ್ನು ಮನೋಮಣಿಯಮ್ ಸುಂದರಮ್ ಪಿಳ್ಳೈ ರಚಿಸಿದ್ದು, ಎಂಎಸ್ ವಿಶ್ವನಾಥನ್ ಅದಕ್ಕೆ ರಾಗ ಸಂಯೋಜನೆ ಮಾಡಿದ್ದರು. ಈ ಗೀತೆ 1956ರಿಂದ ಸರ್ಕಾರದ ವಿಧಾನಸಭೆ ಕಲಾಪ, ಶಾಲೆಗಳ ಪ್ರಾರ್ಥನೆ ಸೇರಿದಂತೆ ಸರ್ಕಾರಿ ಚಟುವಟಿಕೆಗಳಲ್ಲಿ ಬಳಕೆಯಲ್ಲಿ ಇದ್ದರೂ, ಗೀತೆ ಹಾಡುವುದನ್ನು ಕಡ್ಡಾಯ ಮಾಡಿರಲಿಲ್ಲ. ಪ್ರಕರಣತಮಿಳುನಾಡು ಸರ್ಕಾರದ ಈ ಘೋಷಣೆಗೆ ಕಾರಣವಾದ ಘಟನೆ ಕುತೂಹಲಕಾರಿಯಾಗಿದೆ. ರಾಮನಾಥಪುರಂ ಜಿಲ್ಲೆಯಲ್ಲಿ 2018ರ ಕಾರ್ಯಕ್ರಮವೊಂದರಲ್ಲಿ ಈ ಗೀತೆ ಹಾಡುವಾಗ ಕಂಚಿ ಮಠದ ಸ್ವಾಮೀಜಿ ಪೀಠದಿಂದ ಎದ್ದಿರಲಿಲ್ಲ. ನಾಮ್ ತಮಿಳರ್ ಕಚ್ಚಿ ಸಂಘಟನೆಯ ಕಾನ್ ಇಳಂಗೊ ಹಾಗೂ ಇತರೆ ಪದಾಧಿಕಾರಿಗಳು ರಾಮೇಶ್ವರಂನ ಕಂಚಿ ಮಠದ ಶಾಖೆಗೆ ನುಗ್ಗಿ ಶಂಕರಾಚಾರ್ಯರ ವಿರುದ್ಧ ಘೋಷಣೆಗಳನ್ನು ಕೂಗಿ ಅವರ ನಡೆಯನ್ನು ಖಂಡಿಸಿದ್ದರು. ಇದಕ್ಕೆ ಮಠದ ವ್ಯವಸ್ಥಾಪಕರು ವಿರೋಧ ವ್ಯಕ್ತಪಡಿಸಿದಾಗ ಅವರಿಗೆ ಜೀವ ಬೆದರಿಕೆ ಒಡ್ಡಲಾಗಿತ್ತು. ಈ ಹಿನ್ನೆಲೆಯಲ್ಲಿ ಇಳಂಗೊ ಮತ್ತು ಇತರರ ವಿರುದ್ಧ ವಿವಿಧ ಸೆಕ್ಷನ್‌ಗಳ ಅಡಿ ಪ್ರಕರಣ ದಾಖಲಾಗಿತ್ತು. ಈ ಪ್ರಕರಣದ ವಿಚಾರಣೆ ವೇಳೆ ಮದ್ರಾಸ್ ಹೈಕೋರ್ಟ್ ನ್ಯಾಯಮೂರ್ತಿ ಜಿಆರ್ ಸ್ವಾಮಿನಾಥನ್ ಅವರು ಗೀತೆ ಹಾಡುವಾಗ ಎದ್ದು ನಿಲ್ಲುವ ಅಗತ್ಯವಿಲ್ಲ ಎಂದು ತೀರ್ಪು ನೀಡಿದ್ದರು. ಎದ್ದು ನಿಲ್ಲುವುದು ಮಾತ್ರವೇ ಅದಕ್ಕೆ ಗೌರವ ನೀಡುವ ರೀತಿಯೇ? ಎಂದು ಪ್ರಶ್ನಿಸಿದ್ದರು. ಆದರೆ ಈ ಗೀತೆಗೆ ಅಧಿಕ ಗೌರವ ಮತ್ತು ಮನ್ನಣೆ ನೀಡಬೇಕು ಎಂದು ಒಪ್ಪಿಕೊಂಡಿದ್ದರು. ರಾಷ್ಟ್ರಗೀತೆ ಕುರಿತೂ ಇದೇ ರೀತಿಯ ವಿವಾದಗಳು ಇರುವುದನ್ನು ಅವರು ಪ್ರಸ್ತಾಪಿಸಿದ್ದರು. ಈ ಹಾಡು ಪ್ರಾರ್ಥನೆಯೇ ವಿನಾ ನಾಡಗೀತೆಯಲ್ಲ. ರಾಷ್ಟ್ರಗೀತೆಯ ರೀತಿ ಈ ಹಾಡು ಹಾಡುವಾಗ ಎದ್ದು ನಿಲ್ಲಬೇಕು ಎಂದು ಯಾವುದೇ ಶಾಸನಬದ್ಧ ಅಥವಾ ಕಾರ್ಯಾಂಗದ ಆದೇಶ ಇಲ್ಲ ಎಂದು ಅವರು ಹೇಳಿದ್ದರು.