ಗಗನಕ್ಕೇರಿದ ಪಶು ಆಹಾರ ಬೆಲೆ! ಹೈರಾಣಾದ ಹೈನುಗಾರರು!

ತಿ.ನಾ. ಪದ್ಮನಾಭ ಮಾಗಡಿ ಗ್ರಾಮಾಂತರ ಪೆಟ್ರೋಲ್‌, ಡೀಸೆಲ್‌ ವಾಹನ ಸವಾರರಿಗೆ ಮಾತ್ರವಲ್ಲ ಹೈನುಗಾರರನ್ನು ಹೈರಾಣಾಗಿಸಿದೆ. ಪಶು ಆಹಾರದ ಬೆಲೆ ಮೂಟೆಯೊಂದಕ್ಕೆ 50 ರೂ. ಏರಿಸಿಕೊಂಡ ಅಂಗಡಿಗಳು ಹೈನುಗಾರರಿಂದಲೂ ಸಲೀಸಾಗಿ ಸುಲಿಗೆಗಿಳಿದಿದೆ. ಲಾಕ್‌ಡೌನ್‌ ನೆಪದಿಂದ ಕಳೆದ 2020 ರಿಂದೀಚೆಗೆ 3 ಬಾರಿ ಪಶು ಆಹಾರದ ಬೆಲೆಯನ್ನು ಅಂಗಡಿಗಳವರೇ ಏರಿಸಿಕೊಂಡಿರುವುದು ಹೈನುಗಾರರಿಗೆ ತಲೆಬಿಸಿಯಾಗಿಸಿದೆ. ಎಂಆರ್‌ಪಿಗಿಂತ ಹೆಚ್ಚು ಬೆಲೆ: ಜಿಲ್ಲೆಯಲ್ಲಿ ಎಂಆರ್‌ಪಿ ದರಕ್ಕಿಂತ ಹೆಚ್ಚಿನ ಬೆಲೆಗೆ ಮಾರಾಟ ಮಾಡುತ್ತಿರುವುದರಿಂದ ಹೈನುಗಾರಿಕೆಯಲ್ಲಿ ತೊಡಗಿಕೊಂಡಿದ್ದ ಮಂದಿಗೆ ಆರ್ಥಿಕ ನಷ್ಟ ಅನುಭವಿಸುವಂತಾಗಿದೆ. ಅಂಗಡಿ ಮಾಲೀಕರು ಸರಕಾರ ನಿಗದಿಪಡಿಸಿದ ಬೆಲೆಗಿಂತ ಹೆಚ್ಚಿನ ಬೆಲೆಗೆ ಮಾರಾಟ ಮಾಡುತ್ತಿದ್ದಾರೆ. 30 ಕೆಜಿ ಬೂಸದ ಬ್ಯಾಗು 550 ರಿಂದ 600 ರೂ.ಗೆ ಏರಿಕೆಯಾದರೆ, 45 ಕೆಜಿ ಬೂಸಾ ಬ್ಯಾಗು 850 ರಿಂದ 900 ರೂ. ಜಿಗಿತವಾಗಿದೆ. 1200 ರೂ. ಬೆಲೆಯ 50 ಕೆಜಿ ತೂಕದ ಬೂಸಾದ ಚೀಲವನ್ನು 1300 ರೂ.ಗೆ ಮಾರಾಟ ಮಾಡುತ್ತಿದ್ದರೆ 30 ರಿಂದ 50 ಕೆಜಿಯ ಹಿಂಡಿಯನ್ನು ಎಂಆರ್‌ಪಿ ದರಕ್ಕಿಂತ ಇನ್ನೂರು, ಮುನ್ನೂರು ರೂ.ಗೆ ಹೆಚ್ಚಿನ ಬೆಲೆಗೆ ಮಾರಾಟ ಮಾಡಲಾಗುತ್ತಿದೆ. ಅಂಗಡಿ ಮುಂದೆ ದರ ಪ್ರಕಟಿಸುತ್ತಿಲ್ಲ: ಮಳಿಗೆ ಮುಂದೆ ದರ ಪಟ್ಟಿ ಕೂಡಾ ಪ್ರದರ್ಶಿಸುತ್ತಿಲ್ಲ. ಇದರಿಂದ ಲಾಕ್‌ಡೌನ್‌ ಬಳಿಕ ಹೈನುಗಾರರು ತೀವ್ರ ಸಂಕಷ್ಟ ಅನುಭವಿಸುವಂತಾಗಿದೆ. ಈ ಬಗ್ಗೆ ಕ್ರಮ ಕೈಗೊಳ್ಳಬೇಕು ಎಂದು ಕೃಷಿ ಸಚಿವರು ಮತ್ತು ಪಶು ಸಂಗೋಪನಾ ಸಚಿವರಿಗೆ ನಾನಾ ಹಾಲು ಒಕ್ಕೂಟದ ರೈತರು ಮನವಿ ಸಲ್ಲಿಸಲು ಚಿಂತನೆ ನಡೆಸಿದ್ದಾರೆ. ಹೆಚ್ಚು ಹಸು ಇರುವವರಿಗೆ ಕಷ್ಟ: ಮೂರ್ನಾಲ್ಕು ಹಸುಗಳನ್ನು ಹೊಂದಿರುವವರಿಗೆ 50 ಕೆಜಿ ಚೀಲ ಒಂದು ವಾರ ಕೂಡಾ ಬರುವುದಿಲ್ಲ. ಹೀಗಿರುವಾಗ ದುಬಾರಿ ಹಣ ಕೊಟ್ಟು ಪಶುಗಳಿಗೆ ಆಹಾರ ಒದಗಿಸುವುದು ಹೇಗೆ ಎಂದು ಹೈನುಗಾರಿಕೆಯಲ್ಲಿತೊಡಗಿರುವ ಮಂದಿ ಅಳಲು ತೋಡಿಕೊಂಡಿದ್ದಾರೆ. ಹಿಂಡಿ, ಧಾನ್ಯದ ನುಚ್ಚು ದುಬಾರಿಯಾಯ್ತು ! ಹಿಂದೆ 45 ಕೆಜಿ ತೂಗುವ ಹತ್ತಿಕಾಳಿನ ಹಿಂಡಿಯ ಚೀಲಕ್ಕೆ 1,400 ಇತ್ತು. ಈಗ ಏಕಾಏಕಿ 1,800 ಆಗಿದೆ. ಜೋಳ, ಮೆಕ್ಕೆಜೋಳ, ಕಡಲೆಹೊಟ್ಟು ಮತ್ತು ಅಕ್ಕಿ ತವಡು, ಸೂರ್ಯಕಾಂತಿ, ಕಡಲೆಕಾಯಿ ಹಿಂಡಿ ಅಭಾವ ಶುರುವಾಗಿದೆ ಮತ್ತು ಬೆಲೆಯೂ ಏರಿದೆ. ಪರವಾನಿಗೆ ರದ್ದು ಮಾಡಲಿ ಯಾವ ಮಳಿಗೆಯವರು ಎಂಆರ್‌ಪಿ ದರಕ್ಕಿಂತ ಹೆಚ್ಚಿನ ಬೆಲೆಗೆ ಮಾರಾಟ ಮಾಡುತ್ತಿದ್ದಾರೆ ಎಂದು ದೂರು ಪಡೆದು ಅಂತಹ ಅಂಗಡಿಗಳ ಪರವಾನಿಗೆ ರದ್ದು ಗೊಳಿಸಿ ಕೂಡಲೇ ಅಂಗಡಿಗಳ ವಿರುದ್ಧ ಕ್ರಮ ಕೈ ಗೊಳ್ಳಬೇಕು ಎಂದು ರೈತ ಸಂಘ ತಿಳಿಸಿದೆ. ರೈತರು ನಂಬಿ ಸ್ವಾಭಿಮಾನದಿಂದ ಬದುಕುತ್ತಿದ್ದಾರೆ. ಲಾಕ್‌ಡೌನ್‌ ಬಳಿಕ ಅಂಗಡಿಗಳು ಮಾಡುತ್ತಿರುವ ಮೋಸದ ವ್ಯಾಪಾರದಿಂದ ರೈತರಿಗೆ ಆರ್ಥಿಕ ಹೊಡೆತ ಬೀಳುತ್ತಿದೆ. ಇನ್ನಾದರೂ ಜಿಲ್ಲಾಡಳಿತ ಅಂಗಡಿಗಳ ಮೋಸದ ವ್ಯಾಪಾರಕ್ಕೆ ಕಡಿವಾಣ ಹಾಕಲಿ. ಗೋವಿಂದರಾಜು, ರೈತ ಸಂಘದ ಅಧ್ಯಕ್ಷ