ಆಸ್ತಿ ಖರೀದಿ, ಮಾರಾಟಗಾರರಿಗೆ ಗುಡ್ ನ್ಯೂಸ್.. ಶೀಘ್ರದಲ್ಲೇ ಮಾರ್ಗಸೂಚಿ ದರ ಇಳಿಕೆ..!

ರಾಜ್ಯದ ಖರೀದಿದಾರರು ಮತ್ತು ಮಾರಾಟಗಾರರಿಗೆ ಬರಲಿರುವ ಹೊಸ ವರ್ಷ ಸಂಭ್ರಮ ತರುವ ನಿರೀಕ್ಷೆಯಿದೆ. ರಾಜ್ಯ ಸರಕಾರವು ಈ ಹಿಂದೆ ಪ್ರಕಟಿಸಿದಂತೆ ' ಮಾರ್ಗಸೂಚಿ ದರ'ವನ್ನು ಪರಿಷ್ಕರಿಸುತ್ತಿದ್ದು, ಸದ್ಯವೇ ಅಧಿಸೂಚನೆ ಹೊರಡಿಸಲಿದೆ. ಕೋವಿಡ್‌-19 ನಿಂದ ಆರ್ಥಿಕ ಚಟುವಟಿಕೆಗೆ ಹಿನ್ನಡೆಯಾಗಿರುವುದರಿಂದ , ಖರೀದಿ ಮತ್ತು ಆಸ್ತಿ ವರ್ಗಾವಣೆಗೆ ಉತ್ತೇಜನ ನೀಡಲು 'ಸ್ಥಿರಾಸ್ತಿ ' ಕಡಿಮೆ ಮಾಡುವ ತೀರ್ಮಾನವನ್ನೂ ಸರಕಾರ ತೆಗೆದುಕೊಂಡಿದೆ. ಈ ಮಾರ್ಗಸೂಚಿ ದರ 2022ರ ಜನವರಿಯಿಂದ ಜಾರಿಯಾಗುವ ನಿರೀಕ್ಷೆ ಇದೆ. 'ನಾನಾ ಸಂಘ ಸಂಸ್ಥೆಗಳು ಮಾರ್ಗಸೂಚಿ ದರ ಇಳಿಕೆ ಮಾಡುವಂತೆ ಮನವಿ ಸಲ್ಲಿಸಿವೆ. ಸಂಕಷ್ಟದಲ್ಲಿರುವ ಜನರ ಆರ್ಥಿಕ ಹೊರೆ ತಗ್ಗಿಸುವ ಸಲುವಾಗಿ ಸ್ಥಿರಾಸ್ತಿ ಮಾರ್ಗಸೂಚಿ ದರ ಪರಿಷ್ಕರಣೆಗೆ ತೀರ್ಮಾನಿಸಲಾಗಿದೆ' ಎಂದು ಕಳೆದ ಸೆಪ್ಟೆಂಬರ್‌ನಲ್ಲಿಯೇ ಕಂದಾಯ ಸಚಿವ ಆರ್‌. ಅಶೋಕ್‌ ಹೇಳಿದ್ದರು. ಈ ಪ್ರಕಾರ ಅಧಿಕಾರಿಗಳು ಕಾರ್ಯ ನಿರ್ವಹಿಸುತ್ತಿದ್ದು, ದರ ಪರಿಷ್ಕರಣೆಗೆ ಮಾಹಿತಿ ಸಂಗ್ರಹಿಸಲಾಗುತ್ತಿದೆ. 'ಎರಡು ವರ್ಷದ ನಂತರ 'ಸ್ಥಿರಾಸ್ತಿ ಮಾರ್ಗಸೂಚಿ ದರ' ಪರಿಷ್ಕರಣೆ ಪ್ರಕ್ರಿಯೆ ನಡೆಸಲಾಗುತ್ತಿದೆ. ನವೆಂಬರ್‌ ಕೊನೆಯೊಳಗೆ ಮಾಹಿತಿ ಮತ್ತು ಶಿಫಾರಸುಗಳನ್ನು ಕಳುಹಿಸುವಂತೆ ಜಿಲ್ಲಾ ರಿಜಿಸ್ಟ್ರಾರ್‌ಗಳಿಗೆ ಸೂಚಿಸಿದ್ದೇವೆ. ಸಂಪೂರ್ಣ ಮಾಹಿತಿ ಸಂಗ್ರಹಿಸಿದ ನಂತರ ಬೆಂಗಳೂರು ನಗರ ಸೇರಿದಂತೆ ಎಲ್ಲಾ ಜಿಲ್ಲೆಗಳ 'ಸ್ಥಿರಾಸ್ತಿ ಮಾರ್ಗಸೂಚಿ ದರ' ಅಂತಿಮಗೊಳಿಸಿ, ಕರಡು ಅಧಿಸೂಚನೆ ಹೊರಡಿಸಲಾಗುವುದು' ಎಂದು ನೋಂದಣಿ ವಿಭಾಗದ ಇನ್‌ಸ್ಪೆಕ್ಟರ್‌ ಜನರಲ್‌ ಮತ್ತು ಮುದ್ರಾಂಕ ವಿಭಾಗದ ಆಯುಕ್ತ ರವೀಂದ್ರ ಪಿ. ಎನ್‌. ಹೇಳಿದ್ದಾರೆ. ಆಸ್ತಿ ಇರುವ ಪ್ರದೇಶ ಮತ್ತು ಕಟ್ಟಡದ ಆಧಾರದಲ್ಲಿ ಸರಕಾರ ನಿಗದಿಪಡಿಸುವ ಕನಿಷ್ಠ ಮಾರಾಟ ದರವನ್ನು 'ಸ್ಥಿರಾಸ್ತಿ ಮಾರ್ಗಸೂಚಿ ದರ' ಎಂದು ಕರೆಯಲಾಗುತ್ತದೆ. ಸಾಮಾನ್ಯವಾಗಿ ಪ್ರತಿ ವರ್ಷ ಈ ದರವನ್ನು ಪರಿಷ್ಕರಿಸಲಾಗುತ್ತದೆ. ಆದರೆ, ಕಳೆದ ಎರಡು ವರ್ಷದಿಂದ ಕೊರೊನಾ ಕಾರಣದಿಂದ ದರ ಪರಿಷ್ಕರಣೆ ನಡೆದಿರಲಿಲ್ಲ. ಈ ಸಂಬಂಧ ಕಳೆದ ಸೆಪ್ಟೆಂಬರ್‌ನಲ್ಲಿ ಉನ್ನತ ಮಟ್ಟದ ಸಭೆ ನಡೆಸಿದ್ದ ಕಂದಾಯ ಸಚಿವ ಆರ್‌. ಆಶೋಕ್‌, ಸ್ಥಿರಾಸ್ತಿ ಮಾರ್ಗಸೂಚಿಯನ್ನು ಡಿಸೆಂಬರ್‌ ಹೊತ್ತಿಗೆ ಪರಿಷ್ಕರಿಸಲು ಸೂಚಿಸಿದ್ದರು. ನಿಯಮಗಳ ಪ್ರಕಾರ ಸರಕಾರವು ಪ್ರತಿ ವರ್ಷ ಸ್ಥಿರಾಸ್ತಿ ಮಾರ್ಗಸೂಚಿ ದರ ಪರಿಷ್ಕರಿಸಬೇಕು. ಜನವರಿ 2019ರಲ್ಲಿ ಮಾರ್ಗಸೂಚಿ ದರವನ್ನು ಶೇ. 5ರಿಂದ 24ರವರೆಗೆ ಪರಿಷ್ಕರಿಸಲಾಗಿತ್ತು. ಮೂಲಗಳ ಪ್ರಕಾರ, ಪ್ರಾಪರ್ಟಿ ದರ ಕಡಿಮೆ ಇರುವ ಮತ್ತು ಖರೀದಿ ಚಟುವಟಿಕೆ ಬೇಡಿಕೆ ಪಡೆಯುತ್ತಿರುವ ಗ್ರಾಮೀಣ ಪ್ರದೇಶಗಳಲ್ಲಿ ಮಾರ್ಗದರ್ಶಿ ಮೌಲ್ಯ ತುಸು ಏರಿಕೆ ಕಾಣುವ ನಿರೀಕ್ಷೆಯಿದೆ. ಈಗಾಗಲೇ ಅಧಿಕ ಮಾರ್ಗದರ್ಶಿ ಮೌಲ್ಯವಿರುವ ಬೆಂಗಳೂರಿನ ಕೆಲವು ಭಾಗಗಳಲ್ಲಿ ದರ ಇಳಿಕೆ ಮಾಡುವ ಸಾಧ್ಯತೆಯಿದೆ. 'ಸ್ಥಿರಾಸ್ತಿ ಮಾರ್ಗಸೂಚಿ ದರ' ವನ್ನು ಕಡಿಮೆ ಮಾಡಿದರೆ ಪ್ರಾಪರ್ಟಿ ದರಗಳು ಇಳಿಕೆ ಕಾಣುತ್ತವೆ. ಮಾರ್ಗಸೂಚಿ ದರಕ್ಕೆ ಶೇ.5 ಮುದ್ರಾಂಕ ಶುಲ್ಕ ಮತ್ತು ಶೇ.1 ನೋಂದಣಿ ಶುಲ್ಕವು ಲಿಂಕ್‌ ಆಗಿರುವುದರಿಂದ ಇದು ಕ್ಯಾಸ್ಕೇಡಿಂಗ್‌ ಪರಿಣಾಮ ಉಂಟು ಮಾಡಲಿದೆ. ಆಸ್ತಿ ತೆರಿಗೆ ಮತ್ತು ಯೋಜನೆ ಮಂಜೂರು ಶುಲ್ಕವೂ ಮಾರ್ಗದರ್ಶಿ ಮೌಲ್ಯದ ಆಧಾರದಲ್ಲಿಯೇ ನಿರ್ಣಯವಾಗಲಿದೆ. 'ಬೆಂಗಳೂರಿನ ವಿವಿಧ ಭಾಗಗಳಲ್ಲಿಅವಾಸ್ತವಿಕ ದರಗಳು ಇರುವುದರಿಂದ 'ಸ್ಥಿರಾಸ್ತಿ ಮಾರ್ಗಸೂಚಿ ದರ' ವನ್ನು ಕೆಳಮುಖವಾಗಿ ಪರಿಷ್ಕರಣೆ ಮಾಡಬೇಕೆನ್ನುವುದು ಬಹುಕಾಲದ ಬೇಡಿಕೆಯಾಗಿದೆ. ಇತ್ತೀಚೆಗೆ ಸರಕಾರವು 35 - 45 ಲಕ್ಷ ರೂ.ನ ಫ್ಲ್ಯಾಟ್‌ಗಳಿಗೆ ಮುದ್ರಾಂಕ ಶುಲ್ಕ ಶೇ. 3ಕ್ಕೆ ಇಳಿಕೆ ಮಾಡಿದೆ. ಮಾರ್ಗದರ್ಶಿ ಮೌಲ್ಯ ಇಳಿಕೆ ಮಾಡುವುದು ಮಾತ್ರವಲ್ಲದೆ ಎಲ್ಲಾ ಬಗೆಯ ಪ್ರಾಪರ್ಟಿಗಳಿಗೂ ಮುದ್ರಾಂಕ ಶುಲ್ಕವನ್ನು ಶೇ. 3ಕ್ಕೆ ಇಳಿಕೆ ಮಾಡಬೇಕೆಂಬುದು ನಮ್ಮ ಒತ್ತಾಯವಾಗಿದೆ' ಎಂದು ಕ್ರೆಡಾಯ್‌ ಬೆಂಗಳೂರಿನ ಅಧ್ಯಕ್ಷರಾದ ಭಾಸ್ಕರ್‌ ಟಿ. ನಾಗೇಂದ್ರಪ್ಪ ಹೇಳಿದ್ದಾರೆ. 'ಇನ್‌ಸ್ಪೆಕ್ಟರ್‌ ಜನರಲ್‌ ಆಫ್‌ ರಿಜಿಸ್ಪ್ರೇಷನ್‌ (ಐಜಿಆರ್‌) ನೇತೃತ್ವದ ಮೌಲ್ಯಮಾಪನ ಸಮಿತಿಯು 'ಸ್ಥಿರಾಸ್ತಿ ಮಾರ್ಗಸೂಚಿ ದರ'ವನ್ನು ತರ್ಕಬದ್ಧವಾಗಿ ಪರಿಷ್ಕರಿಸಿದ ಬಳಿಕ ಸರಕಾರವು ಅಂತಿಮ ತೀರ್ಮಾನ ತೆಗೆದುಕೊಳ್ಳಲಿದೆ' ಎಂದು ಕಂದಾಯ ಸಚಿವ ಆರ್‌.ಅಶೋಕ್‌ ಹೇಳಿದ್ದಾರೆ.