ಅಪರೂಪದ ಘಟನೆ: ಮತದಾರರಿಗೆ ಲಂಚ ನೀಡಿದ್ದಕ್ಕಾಗಿ ಸಂಸದೆ ಮಲೋತ್ ಕವಿತಾಗೆ ಶಿಕ್ಷೆ
ಅಪರೂಪದ ಪ್ರಕರಣದಲ್ಲಿ ತೆಲಂಗಾಣದ ಟಿಆರ್‌ಎಸ್ ಸಂಸದೆ ಮಲೋತ್ ಕವಿತಾ ಅವರಿಗೆ ಮತದಾರರಿಗೆ ಲಂಚ ನೀಡಿದ ಆರೋಪದಲ್ಲಿ ಆರು ತಿಂಗಳ ಶಿಕ್ಷೆ ವಿಧಿಸಲಾಗಿದೆ. ಹಾಲಿ ಸಂಸದರಿಗೆ ಈ ರೀತಿ ಶಿಕ್ಷೆ ನೀಡಿರುವುದು ವಿರಳ.
Admin
0
10
ಹೈದರಾಬಾದ್: ಅತ್ಯಂತ ಅಪರೂಪದ ಪ್ರಕರಣದಲ್ಲಿ, ಮತದಾರರಿಗೆ ನೀಡಿದ್ದಕ್ಕಾಗಿ ಹಾಲಿ ಸಂಸದರೊಬ್ಬರು ಜೈಲು ಶಿಕ್ಷೆಗೆ ಗುರಿಯಾಗಿದ್ದಾರೆ. ಭಾರತದ ಇತಿಹಾಸದಲ್ಲಿಯೇ ಹಾಲಿ ಸಂಸದರೊಬ್ಬರು ಈ ರೀತಿಗೆ ಶಿಕ್ಷೆಗೆ ಗುರಿಯಾಗಿರುವುದಕ್ಕೆ ಇದು ವಿರಳ ನಿದರ್ಶನವಾಗಿದೆ.
2019ರ ಲೋಕಸಭೆ ಚುನಾವಣೆಯಲ್ಲಿ ಮತದಾರರಿಗೆ ಲಂಚ ನೀಡಿದ ಆರೋಪದಲ್ಲಿ ಟಿಆರ್‌ಎಸ್ ಪಕ್ಷದ ಸಂಸದೆ ಮತ್ತು ಅವರ ಸಹವರ್ತಿಗೆ ನಂಪಳ್ಳಿಯ ಜನಪ್ರತಿನಿಧಿಗಳ ವಿಶೇಷ ಸೆಷನ್ಸ್ ನ್ಯಾಯಾಲಯ ಶನಿವಾರ ಶಿಕ್ಷೆ ವಿಧಿಸಿ ತೀರ್ಪು ನೀಡಿದೆ.
ಆದರೆ, ಅವರಿಗೆ ಹೈಕೋರ್ಟ್‌ಗೆ ಮೇಲ್ಮನವಿ ಸಲ್ಲಿಸಲು ನ್ಯಾಯಾಧೀಶರು ಜಾಮೀನು ಮಂಜೂರು ಮಾಡಿದ್ದಾರೆ. ಕವಿತಾ ಅವರು ಲೋಕಸಭೆಯಲ್ಲಿ ಮಹಾಬುಬಾದ್ ಕ್ಷೇತ್ರವನ್ನು ಪ್ರತಿನಿಧಿಸುತ್ತಿದ್ದಾರೆ.
ಸಂಸದರು ಮತ್ತು ಶಾಸಕರ ಪ್ರಕರಣಗಳಿಗಾಗಿ ಇರುವ ವಿಶೇಷ ಸೆಷನ್ಸ್ ಕೋರ್ಟ್, ಇತ್ತೀಚಿನ ದಿನಗಳಲ್ಲಿ ಸಾರ್ವಜನಿಕ ಪ್ರತಿನಿಧಿಗಳನ್ನು ಶಿಕ್ಷೆಗೆ ಒಳಪಡಿಸಿದ ಮೂರನೇ ಪ್ರಕರಣ ಇದಾಗಿದೆ. ಆದರೆ ಇದೇ ಮೊದಲ ಬಾರಿಗೆ ಲೋಕಸಭೆಯ ಹಾಲಿ ಸಂಸದರು ಶಿಕ್ಷೆಗೆ ಗುರಿಯಾಗಿದ್ದಾರೆ. ಅದರಲ್ಲಿಯೂ ಚುನಾವಣೆಯಲ್ಲಿ ಗೆಲ್ಲಲು ಮತದಾರರಿಗೆ ಲಂಚ ನೀಡಿದ ಪ್ರಕರಣದಲ್ಲಿ ಶಿಕ್ಷೆಗೊಳಗಾಗಿದ್ದು ವಿರಳ ಸಂಗತಿಯಾಗಿದೆ.
2019ರ ಸಾರ್ವತ್ರಿಕ ಚುನಾವಣೆ ಸಂದರ್ಭದಲ್ಲಿ ಬುರ್ಗಂಪಹಾದ್ ಪೊಲೀಸ್ ಠಾಣೆಯ ವ್ಯಾಪ್ತಿಯಲ್ಲಿ ಕವಿತಾ ಅವರ ಪರವಾಗಿ ಮತಗಳನ್ನು ನೀಡುವಂತೆ ಜನರಿಗೆ ತಲಾ 500 ರೂಪಾಯಿ ವಿತರಿಸುತ್ತಿದ್ದಾಗ ಸಂಸದೆಯ ಸಹಾಯಕ ಶೌಕತ್ ಅಲಿಯನ್ನು ಚುನಾವಣಾ ವಿಚಕ್ಷಣ ದಳದ ಕಂದಾಯ ಅಧಿಕಾರಿಗಳು ರೆಡ್ ಹ್ಯಾಂಡ್ ಆಗಿ ಹಿಡಿದಿದ್ದರು.
ನ್ಯಾಯಾಧೀಶ ವಿಆರ್‌ಆರ್‌ ವರಪ್ರಸಾದ್ ಅವರು ಐಪಿಸಿ ಸೆಕ್ಷನ್ 171-ಇ ಅಡಿಯಲ್ಲಿ (ಲಂಚಕ್ಕಾಗಿ ಶಿಕ್ಷೆ) ಇಬ್ಬರಿಗೂ ಆರು ವರ್ಷ ಸಾದಾ ಸಜೆ ಮತ್ತು ತಲಾ 10,000 ರೂಪಾಯಿ ದಂಡ ವಿಧಿಸಿದರು.
