Sa Ra Govindu: ಅಣ್ಣಾವ್ರ ಸಿನಿಮಾ ಟೈಟಲ್ ಮರು ಬಳಕೆ: ನಾಳೆ ವಿಷ್ಣು, ಅಂಬರೀಷ್ ಫ್ಯಾನ್ಸ್ ಬರಬಹುದು ಎಂದ ಸಾರಾ ಗೋವಿಂದು
'ನಟ ಸಾರ್ವಭೌಮ' ಡಾ ರಾಜ್‌ಕುಮಾರ್ ನಟನೆಯ ಸಿನಿಮಾಗಳ ಶೀರ್ಷಿಕೆಗಳನ್ನು ಮತ್ತೆ ಮರುಬಳಕೆ ಮಾಡಬಾರದು ಎಂದು ಅವರ ಅಭಿಮಾನಿಗಳು ಕರ್ನಾಟಕ ಫಿಲ್ಮ್ ಛೇಂಬರ್‌ಗೆ ಮನವಿ ಮಾಡಿದ್ದಾರೆ. ಅದಕ್ಕೆ ಸಾ ರಾ ಗೋವಿಂದು ಪ್ರತಿಕ್ರಿಯೆ ನೀಡಿದ್ದಾರೆ.
Admin
0
5
ವರನಟ ಡಾ ಅಭಿನಯದ ಸಿನಿಮಾಗಳ ಶೀರ್ಷಿಕೆಗಳನ್ನು ಮತ್ತೆ ಮರುಬಳಕೆ ಮಾಡಬಾರದು ಎಂದು ಅವರ ಅಭಿಮಾನಿಗಳು ಇಂದು (ಆಗಸ್ಟ್ 30) ಕರ್ನಾಟಕ ಫಿಲ್ಮ್ ಛೇಂಬರ್ ಮುಂದೆ ಘೋಷಣೆ ಕೂಗಿ ಮನವಿ ಮಾಡಿದ್ದಾರೆ. ಈ ತಪ್ಪು ಮರುಕಳಿಸಿದರೆ ಉಗ್ರ ಹೋರಾಟ ಮಾಡುವುದಾಗಿ ಎಚ್ಚರಿಕೆ ಕೂಡ ನೀಡಿದ್ದಾರೆ. ಈ ಬಗ್ಗೆ ಸಾರಾ ಗೋವಿಂದು ಪ್ರತಿಕ್ರಿಯೆ ನೀಡಿದ್ದಾರೆ.
ಹೇಳಿದ್ದೇನು?
ಡಾ ರಾಜ್‌ಕುಮಾರ್ ಅವರ 4-5 ಅಭಿಮಾನಿ ಸಂಘಟನೆಗಳು ಬಂದು ರಾಜ್‌ಕುಮಾರ್ ಅಭಿನಯಿಸಿದ ಚಿತ್ರಗಳ ಶೀರ್ಷಿಕೆಗಳನ್ನು ಬೇರೆಯವರಿಗೆ ಕೊಡಬಾರದು, ಅವರೊಬ್ಬ ಸಾಂಸ್ಕೃತಿಕ ರಾಯಭಾರಿ. ಅಣ್ಣಾವ್ರ ಸಿನಿಮಾ ನೋಡಿ ಬೆಳೆದವರು ಇದ್ದಾರೆ. ಹೀಗಾಗಿ ನಮಗೆಲ್ಲರಿಗೂ ನೋವಾಗತ್ತೆ. ಸತ್ಯ ಹರಿಶ್ಚಂದ್ರ ಸಿನಿಮಾ ಶೀರ್ಷಿಕೆ ಇಟ್ಟುಕೊಂಡು ಸಿನಿಮಾ ಮಾಡಲಾಗಿತ್ತು. ಹೊಸ ಸಿನಿಮಾ ನೋಡಿದಾಗ ಅಭಿಮಾನಿಗಳು ಬೇಜಾರು ಮಾಡಿಕೊಂಡಿದ್ರು ಅಂತ ಅವರು ಹೇಳಿದರು. ನನಗೂ ಹೊಸ ಸಿನಿಮಾ ನೋಡಿ ಬೇಸರ ಆಗಿತ್ತು.
ಈ ಬಗ್ಗೆ ಚಲನಚಿತ್ರ ವಾಣಿಜ್ಯ ಮಂಡಳಿಯಲ್ಲಿ ಚರ್ಚೆ ಆಗಿದೆ, ಕೆಲವರು ಅಭಿಮಾನ ಇಟ್ಟುಕೊಂಡು, ಇನ್ನು ಕೆಲವರು ಉಡಾಫೆ ಇಟ್ಟುಕೊಂಡು ಸಿನಿಮಾ ಶೀರ್ಷಿಕೆ ಇಡುವುದಾಗಿ ಹೇಳಿಕೊಂಡು ಬರುತ್ತಾರೆ. ಅಣ್ಣಾವ್ರ ಸಿನಿಮಾಗಳು ಇತಿಹಾಸ ಸೇರುವುದರಿಂದ ಅದನ್ನು ಮರು ಸೃಷ್ಟಿ ಮಾಡೋದು ಬೇಡ ಅಂತ ನಾವು ಕೂಡ ತೀರ್ಮಾನ ತೆಗೆದುಕೊಂಡಿದ್ದೇವೆ.
ರಾಜ್‌ಕುಮಾರ್ ಅಭಿಮಾನಿಗಳು, ಆತ್ಮೀಯರು ಅವರ ಹೆಸರು ಇಟ್ಟುಕೊಂಡು ಸಿನಿಮಾ ಮಾಡಿದರೆ ಒಳ್ಳೆಯದಾಗತ್ತೆ ಅಂತ ಅಂದುಕೊಂಡು ಬರುತ್ತಾರೆ. ನಾನು ಕೂಡ 'ಮಿಂಚಿನ ಓಟ' ಸಿನಿಮಾ ಮಾಡಿದೆ. 'ನಾಗರ ಹಾವು' ಸಿನಿಮಾ ಬಂದಿದೆ. ರಾಜ್‌ಕುಮಾರ್ ಸಿನಿಮಾಗಳು ಸಮಾಜಕ್ಕೆ ಸಂದೇಶ ನೀಡುವುದರಿಂದ ಅವರ ಸಿನಿಮಾಗಳ ಟೈಟಲ್ ಇಟ್ಟುಕೊಂಡು ಮತ್ತೆ ಸಿನಿಮಾ ಮಾಡೋದು ಬೇಡ, ಆ ಸಿನಿಮಾಗಳಿಗೆ ಕಳಂಕ ಬರೋದು ಬೇಡ ಎಂದು ಅಣ್ಣಾವ್ರ ಅಭಿಮಾನಿಗಳು ಮನವಿ ಮಾಡಿಕೊಂಡಿದ್ದಾರೆ.
'ಬಹದ್ದೂರ್ ಗಂಡು' ಎಂದು ಹೊಸ ಸಿನಿಮಾ ಘೋಷಣೆ ಮಾಡಲಾಗಿದೆ, ಆ ಸಿನಿಮಾ ತಂಡದವರಿಗೆ ಕಿವಿಮಾತು ಹೇಳಲಾಗುವುದು. ನಾಳೆ ಅಂಬರೀಷ್, ವಿಷ್ಣುವರ್ಧನ್, ಶಂಕರ್ ನಾಗ್ ಅಭಿಮಾನಿಗಳು ಇದೇ ರೀತಿ ಮನವಿ ಮಾಡಬಹುದು. ನಾಳೆ ಕೋರ್ಟ್-ಕಚೇರಿ ಎಂದರೆ ಕಷ್ಟ ಆಗತ್ತೆ, ಹೀಗಾಗಿ ನಿರ್ಮಾಪಕರು ಈ ಬಗ್ಗೆ ಎಚ್ಚರಿಕೆಯಿಂದಿರಬೇಕು.
