Kavya Shetty: ಲೂಸ್ ಮಾದ ಯೋಗಿ ಅವರ 'ಲಂಕೆ'ಯಲ್ಲಿ ಲೇಡಿ ವಿಲನ್ ಆದ ನಟಿ ಕಾವ್ಯಾ ಶೆಟ್ಟಿ

(ಪದ್ಮಾ ಶಿವಮೊಗ್ಗ) 'ಲಂಕೆ' ಚಿತ್ರದಲ್ಲಿ ಯೋಗಿ ಜತೆ ಮುಖ್ಯ ಪಾತ್ರದಲ್ಲಿ ಕೃಷಿ ತಾಪಂಡ ಮತ್ತು ನಟಿಸಿದ್ದಾರೆ. ಈ ಮಾಸ್‌ ಎಂಟರ್‌ಟೇನರ್‌ ಚಿತ್ರವನ್ನು ರಾಮ್‌ಪ್ರಸಾದ್‌ ನಿರ್ದೇಶನ ಮಾಡಿದ್ದಾರೆ. ಕಾವ್ಯಾ ಶೆಟ್ಟಿ ಹಲವು ಸಿನಿಮಾಗಳಲ್ಲಿ ನಾಯಕಿಯಾಗಿ ನಟಿಸಿದ್ದರೂ ನೆಗೆಟಿವ್‌ ಶೇಡ್‌ನ ಪಾತ್ರದಲ್ಲಿ ನಟಿಸಿರಲಿಲ್ಲ. ಮೊದಲ ಬಾರಿಗೆ ಅಂಥದ್ದೊಂದು ಪಾತ್ರದಲ್ಲಿ ನಟಿಸಿದ್ದು, ಮತ್ತೆ ಇಂಥ ಪಾತ್ರದಲ್ಲಿ ನಟಿಸೋದು ಕಷ್ಟ ಎಂದಿದ್ದಾರೆ ಅವರು. ಡಬಲ್‌ ಶೇಡ್‌ ಪಾತ್ರದಲ್ಲಿ ಅವರು ನಟಿಸಿದ್ದಾರೆ. 'ಸಾಮಾನ್ಯವಾಗಿ ಸಿನಿಮಾಗಳಲ್ಲಿ ಪುರುಷರನ್ನು ವಿಲನ್‌ ಆಗಿ ನೋಡಬಹುದು. ಈ ಚಿತ್ರದಲ್ಲಿ ನಾನು ಲೇಡಿ ವಿಲನ್‌ ಆಗಿ ನಟಿಸಿದ್ದೇನೆ. ಯೋಗಿಗೆ ಆಪೊಸಿಟ್‌ ಆಗಿ ನಟಿಸಿದ್ದೇನೆ. ಮೊದಲು ನಿರ್ದೇಶಕರು ಈ ಚಿತ್ರದಲ್ಲಿ ಬೇರೆ ಪಾತ್ರಕ್ಕೆ ಆಯ್ಕೆ ಮಾಡಿದ್ದರು. ಒಂದು ವಾರದ ನಂತರ ನೆಗೆಟಿವ್‌ ರೋಲ್‌ ಮಾಡಿದರೆ ಉತ್ತಮವಾಗಿರುತ್ತೆ ಎಂದರು. ಇದುವರೆಗೆ ನಾನು ಇಂಥ ಪಾತ್ರದಲ್ಲಿ ನಟಿಸಿಲ್ಲ. ಹಾಗಾಗಿ ಕಷ್ಟ ಆಗಬಹುದು ಎಂದೆ. ಒಂದು ವಾರದ ನಂತರ ಒಪ್ಪಿಕೊಂಡೆ. ನನ್ನ ನಡಿಗೆ, ಹಾವಭಾವ, ಡೈಲಾಗ್‌ ಡೆಲಿವರಿ ಎಲ್ಲವೂ ಬೇರೆ ಥರ ಇವೆ. ನಿರ್ದೇಶಕ ರಾಮ್‌ಪ್ರಸಾದ್‌ ನನಗೆ ಬಹಳ ಹೆಲ್ಪ್‌ ಮಾಡಿದರು. ಪ್ರೇಕ್ಷಕರಿಗೆ ನಾವು ಪೂರ್ಣ ಬೇರೆ ರೀತಿ ಕಾಣಿಸುತ್ತೇನೆ. ನನಗೇ ನಾನು ಬೇರೆ ಥರ ಕಾಣಿಸ್ತಿದ್ದೀನಿ ಎನ್ನಿಸಿತು. ರೊಮ್ಯಾಂಟಿಕ್‌ ರೋಲ್‌ಗಳಲ್ಲಿನಟಿಸುವುದು ಸುಲಭ. ಇಂಥ ಪಾತ್ರ ನನ್ನಿಂದ ಮಾಡೋಕೆ ಸಾಧ್ಯವಾ ಅಂತ ಭಯ ಆಯ್ತು. ಪ್ರೇಕ್ಷಕರು ಹೇಗೆ ಸ್ವೀಕರಿಸಬಹುದು ಎಂಬ ಭಯವೂ ಇದೆ. ನಟನೆ ಚಾಲೆಂಜಿಂಗ್‌ ಆಗಿಯೂ ಇತ್ತು. ಇದೇ ರೀತಿಯ ಪಾತ್ರವನ್ನು ಮತ್ತೆ ಮಾಡಬಲ್ಲೆಎಂಬ ವಿಶ್ವಾಸ ನನಗೆ ಇಲ್ಲ' ಎಂದಿದ್ದಾರೆ ಕಾವ್ಯಾ. ಚಿತ್ರದಲ್ಲಿಯೋಗಿ ಮತ್ತು ಶರತ್‌ ಲೋಹಿತಾಶ್ವ ಅವರ ಜತೆ ಹೆಚ್ಚಾಗಿ ಕಾಣಿಸಿಕೊಳ್ಳಲಿದ್ದಾರೆ ಕಾವ್ಯ. 'ಚಿತ್ರದಲ್ಲಿಆ್ಯಕ್ಷನ್‌ ಸೀನ್‌ನಲ್ಲೂ ಕಾಣಿಸಿಕೊಂಡಿದ್ದೇನೆ. ನಾನು ಗಂಡಸರು ಮತ್ತು ಹೆಂಗಸರ ಜತೆ ಫೈಟ್‌ ಮಾಡಬೇಕಿತ್ತು. ಮೊದಲೇ ಫೈಟ್‌ ಸೀನ್‌ ಇರುತ್ತೆ ಅಂತ ಹೇಳಿದ್ದರು. ಆದರೆ, ಇಷ್ಟೊಂದು ದೊಡ್ಡದಾಗಿರುತ್ತೆ ಅಂತ ಗೊತ್ತಿರಲಿಲ್ಲ. ಅಲ್ಲದೆ, ನಾನು ಹುಡುಗಿಯರ ಕಾಸ್ಟ್ಯೂಮ್‌ನಲ್ಲಿ ಫೈಟ್‌ ಮಾಡಬೇಕಿತ್ತು. ಇದು ಬಹಳ ಕಷ್ಟ ಆಯ್ತು. ಆದರೆ, ತುಂಬಾ ಚೆನ್ನಾಗಿ ಮೂಡಿಬಂದಿದೆ' ಎಂದಿದ್ದಾರೆ ಅವರು. 70ರ ದಶಕದಲ್ಲಿ ನಡೆದ ಘಟನೆಯನ್ನಾಧರಿಸಿ ಈ ಸಿನಿಮಾ ಕಥೆ ಬರೆದಿರುವ ನಿರ್ದೇಶಕ ರಾಮ್‌ಪ್ರಸಾದ್‌ ಎಲ್ಲಾ ಪಾತ್ರಗಳಿಗೂ ನೈಜ ಘಟನೆಯ ಹಿನ್ನೆಲೆ ಇದೆ ಎಂದಿದ್ದಾರೆ. ಪಕ್ಕಾ ಮಾಸ್‌ ಚಿತ್ರ ಇದು ಎನ್ನುತ್ತಾರೆ ಕಾವ್ಯಾ. 'ಚಿತ್ರದಲ್ಲಿ ಎಲ್ಲಾ ಇವೆ. ಒಳ್ಳೆಯ ಹಾಡುಗಳ ಜೊತೆಗೆ ಭರ್ಜರಿಯಾಗಿ ಚಿತ್ರೀಕರಿಸಿದ್ದಾರೆ ಕೂಡ. ನನ್ನ ಮತ್ತು ಯೋಗಿ ಕಾಂಬಿನೇಷನ್‌ನ ಡ್ರೀಮ್‌ ಸಾಂಗ್‌ನಲ್ಲಿ ಫೈರ್‌, ರೈನ್‌ ಎಲ್ಲವನ್ನೂ ಬಳಸಿಕೊಂಡು ರಿಚ್‌ ಆಗಿ, ಗ್ಲಾಮರಸ್‌ ಆಗಿ ಚಿತ್ರೀಕರಿಸಿದ್ದಾರೆ. ಎಮೋಷನಲ್‌ ದೃಶ್ಯಗಳಿವೆ. ಕಂಪ್ಲೀಟ್‌ ಪ್ಯಾಕೇಜ್‌ ಸಿನಿಮಾ ಎನ್ನಬಹುದು. ಎಲ್ಲಾ ಎಲಿಮೆಂಟ್ಸ್‌ ಇವೆ' ಎನ್ನುತ್ತಾರೆ ಕಾವ್ಯಾ. 'ಲಂಕೆ' ಚಿತ್ರ ಸೆ.10ರಂದು ರಾಜ್ಯದಾದ್ಯಂತ ರಿಲೀಸ್‌ ಆಗಲಿದೆ. ಇಲ್ಲಿಯವರೆಗೆ ರೊಮ್ಯಾಂಟಿಕ್‌ ಹಿರೋಯಿನ್‌ ಆಗಿ ನಟಿಸಿದ್ದೆ. 'ಲಂಕೆ' ಚಿತ್ರದಲ್ಲಿ ನಾನು ಬೇರೆ ಥರಾನೇ ಕಾಣಿಸಿಕೊಳ್ಳುತ್ತೇನೆ. ಈ ಪಾತ್ರದಲ್ಲಿ ನಟಿಸೋಕೆ ಮೊದಲು ಹಿಂಜರಿಕೆ ಇತ್ತು. ನಂತರ ವಿಭಿನ್ನವಾದ ಪಾತ್ರ, ಸಿನಿಮಾ ಕಥೆ ಇದೆ ಎಂಬ ಕಾರಣಕ್ಕೆ ಒಪ್ಪಿಕೊಂಡೆ. ನನ್ನ ಪಾತ್ರ ಜನರ ಮನಸ್ಸಲ್ಲಿಉಳಿದುಬಿಡುತ್ತೆ ಎಂದುಕೊಂಡಿದ್ದೇನೆ ಎಂದಿದ್ದಾರೆ ನಟಿ ಕಾವ್ಯಾ