Bitcoin Case: ವಿಪಕ್ಷಗಳಲ್ಲಿ ದಾಖಲೆಗಳಿದ್ದರೆ ಬಿಡುಗಡೆ ಮಾಡಲಿ; ಅಶ್ವತ್ಥ್‌ ನಾರಾಯಣ್‌ ಸವಾಲು

ಬೆಂಗಳೂರು: ಬಿಟ್ ಕಾಯಿನ್ ಹಗರಣ ವಿಚಾರಕ್ಕೆ ಸಂಬಂಧಿಸಿದಂತೆ ಪ್ರತಿಪಕ್ಷಗಳು ದಾಖಲೆ ಇದ್ದರೆ ಬಿಡುಗಡೆ ಮಾಡಲಿ ಎಂದು ಸಚಿವ ಡಾ. ಅಶ್ವತ್ಥ ನಾರಾಯಣ ಸವಾಲು ಹಾಕಿದ್ದಾರೆ. ಬೆಂಗಳೂರಿನಲ್ಲಿ ಶುಕ್ರವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಪ್ರಕರಣದ ಬಗ್ಗೆ ಈಗಾಗಲೇ ಸಿಸಿಬಿ ವಿಚಾರಣೆ ನಡೆಯುತ್ತಿದೆ. ಕೇಂದ್ರದ ಏಜೆನ್ಸಿಗಳು, ಜಾರಿ ನಿರ್ದೇಶನಾಲಯ ತನಿಖೆ ನಡೆಸುತ್ತಿದೆ. ತನಿಖೆ ನಡೆಯುತ್ತಾ ಇರುವುದರಿಂದ ಹೆಚ್ಚಾಗಿ ಏನು ಹೇಳೊಕೆ ಆಗಲ್ಲ. ಪ್ರತಿಪಕ್ಷಗಳು ದಾಖಲೆ ಇದ್ದರೆ ಹೊರಗಡೆ ತರಬಹುದು ಎಂದರಲ್ಲದೇ ರಾಜ್ಯ ಬಿಜೆಪಿ ಸರ್ಕಾರಕ್ಕೆ ಏನೂ ತೊಂದರೆ ಇಲ್ಲ, ಸರ್ಕಾರ ಭದ್ರವಾಗಿದೆ ಎಂದರು. ಕಾಂಗ್ರೆಸ್‌ ಮುಖಂಡ ರಣ್‌ದೀಪ್‌ ಸಿಂಗ್ ಸುರ್ಜೆವಾಲಾ ಅವರಿಂದ ದಾಖಲೆ ಬಿಡುಗಡೆ ವಿಚಾರಕ್ಕೆ ಸಂಬಂಧಿಸಿದಂತೆ ಪ್ರತಿಕ್ರಿಯಿಸಿದ , ಇನ್ನು ವಿರೋಧ ಪಕ್ಷಗಳು ಏನೇ ದಾಖಲೆ ಇದ್ದರೂ ಹೊರಗೆ ತರಬಹುದು. ಭಾನುವಾರ ಏನು ದಾಖಲೆ ಬಿಡುಗಡೆ ಮಾಡ್ತಾರೆ ಅಂತ ಕಾದು ನೋಡೋಣ. ಅದು ಫ್ಲಾಪ್‌ಶೋ ಎಂದು ವ್ಯಂಗ್ಯವಾಡಿದರು. ಅಲ್ಲದೇ ನಾವು ಭಾನುವಾರವನ್ನು ಎದುರು ನೋಡೋಣ. ತನಿಖೆ ಪಾರದರ್ಶಕವಾಗಿ ನಡೆಯಲಿದೆ. ಸಾರ್ವಜನಿಕವಾಗಿ ಏನೇನು ಒದಗಿಸಬೇಕು ಅದನ್ನೆಲ್ಲ ಒದಗಿಸಿದ್ದೇವೆ. ಯಾರಾದರೂ ಇರಲಿ ನ್ಯಾಯ ಸಮ್ಮತವಾಗಿ ತನಿಖೆ ‌ನಡೆಯುತ್ತದೆ ಎಂದರು. ಸರ್ಕಾರದಿಂದ ಪ್ರಕರಣ ಮುಚ್ಚಿಹಾಕುವ ಪ್ರಯತ್ನ ಇದಕ್ಕೂ ಮೊದಲು ಬಿಟ್‌ಕಾಯಿನ್ ವಿಚಾರಕ್ಕೆ ಸಂಬಂಧಿಸಿದಂತೆ ಪ್ರತಿಕ್ರಿಯೆ ನೀಡಿದ್ದ ಕೆಪಿಸಿಸಿ ಅಧ್ಯಕ್ಷ ಡಿಕೆ ಶಿವಕುಮಾರ್, ಬಿಟ್ ಕಾಯಿನ್ ಹಗರಣ ವಿಚಾರವಾಗಿ ಸರ್ಕಾರದಿಂದ ಪ್ರಕರಣ ಮುಚ್ಚಿಹಾಕುವ ಪ್ರಯತ್ನ ನಡೆಯುತ್ತಿದೆ ಎಂದು ಆರೋಪ ಮಾಡಿದ್ದರು. ಬಿಟ್ ಕಾಯಿನ್ ಬಿಟ್ ಹಾಕಿ ಬಿಡಿ ಅಂದರೆ ಬಿಟ್ ಹಾಕೊಳ್ಳಲಿ. ಎಂಟೈರ್ ಎಪಿಸೋಡ್ ಮುಚ್ಚಿ ಹಾಕೋ ಕೆಲಸ ಮಾಡುತ್ತಿದ್ದಾರೆ. ಅಲ್ಲದೇ, ಪ್ರಕರಣದಲ್ಲಿ ಬಿಜೆಪಿಯವರೇ ಆಗಲಿ, ಕಾಂಗ್ರೆಸ್‌ನವರೇ ಆಗಲಿ, ನಾಗರೀಕರೇ ಇರಲಿ. ಈ ಪ್ರಕರಣವನ್ನು ತನಿಖೆ ಮಾಡಬೇಕು. ಏನೇನು ಆಗಿದೆ ಅಂತ ಪ್ರಕರಣದ ತನಿಖೆಯ ವರದಿಯನ್ನು ಜನರ ಮುಂದೆ ಇಡಬೇಕು ಎಂದು ಡಿಕೆಶಿ ಒತ್ತಾಯಿಸಿದ್ದರು. ಜನರ ಮುಂದಿಡೋದು ಸರ್ಕಾರದ ಕೆಲಸ. ನಾವು ಸುಮ್ಮನೆ ಕುಳಿತುಕೊಳ್ಳೋದಿಲ್ಲ ಎಂದ ಡಿಕೆ ಶಿವಕುಮಾರ್, ಐ ವಿಲ್ ಕಂ ಬ್ಯಾಕ್ ಎಂದು ಇದೇ ಸಂದರ್ಭದಲ್ಲಿ ಸರ್ಕಾರಕ್ಕೆ ಎಚ್ಚರಿಕೆ ನೀಡಿದರು. ಈಗ ಪಕ್ಷದ ಕೆಲಸ ಇಂದು ಸಂಜೆ ನಮ್ಮ ಪ್ರಿಯಾರಿಟಿ ಏನಾಗುತ್ತೋ ಗೊತ್ತಿಲ್ಲ. ಈಗ ನವೆಂಬರ್ 14 ರಿಂದ ಸದಸ್ಯತ್ವ ಅಭಿಯಾನ ಆರಂಭವಾಗಿದೆ. ಅದನ್ನ ನಾವು ಮಾಡಬೇಕಿದೆ. ಇದು ಐತಿಹಾಸಿಕ ಅಭಿಯಾನ. 12 ವರ್ಷ ಆದ ಮೇಲೆ ಈ ಅಭಿಯಾನ ಮತ್ತೆ ಆರಂಭವಾಗುತ್ತಿದೆ ಎಂದು ಹೇಳಿದ್ದರು.