1,850 ಕೋಟಿ ರೂ. ಮೊತ್ತದ ಕ್ರಿಪ್ಟೋ ಕರೆನ್ಸಿ ಜಪ್ತಿ ಮಾಡಿದ ಬ್ರಿಟನ್‌ ಪೊಲೀಸರು
180 ಮಿಲಿಯನ್‌ ಪೌಂಡ್‌ ಮೌಲ್ಯದ ಕ್ರಿಪ್ಟೋ ಕರೆನ್ಸಿಗಳನ್ನು ಜಪ್ತಿ ಮಾಡಲಾಗಿದೆ ಎಂದು ಬ್ರಿಟನ್‌ ಪೊಲೀಸರು ಮಂಗಳವಾರ ಹೇಳಿದ್ದು, ಅಪರಾಧ ಚಟುವಟಿಕೆಗಳಲ್ಲಿ ಬಳಸುತ್ತಿರುವ ಅನುಮಾನದ ಮೇಲೆ ಇದನ್ನು ಜಪ್ತಿ ಮಾಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
Admin
0
3
ಲಂಡನ್‌: ಭಾರತದಲ್ಲಿನ್ನೂ ಕ್ರಿಫ್ಟೋ ಕರೆನ್ಸಿ ತನ್ನ ಬೇರುಗಳನ್ನು ಬಿಡಲು ಆರಂಭಿಸಿದೆ ಅಷ್ಟೆ. ಆದರೆ ಅದಾಗಲೇ ಇದು ಹಲವು ದೇಶಗಳಲ್ಲಿ ಎಲ್ಲಾ ಸ್ವರೂಪಗಳನ್ನು ಪಡೆದುಕೊಂಡು ಮುನ್ನುಗ್ಗುತ್ತಿದೆ. ಅದಕ್ಕೆ ಉದಾಹರಣೆಯೇ ಬ್ರಿಟನ್‌ನಲ್ಲಿ ನಡೆದ ಈ ಬೆಳವಣಿಗೆ.
180 ಮಿಲಿಯನ್‌ ಪೌಂಡ್‌ (ಅಂದಾಜು 1,850 ಕೋಟಿ ರೂ.) ಮೌಲ್ಯದ ಕ್ರಿಪ್ಟೋ ಕರೆನ್ಸಿಗಳನ್ನು ಜಪ್ತಿ ಮಾಡಲಾಗಿದೆ ಎಂದು ಪೊಲೀಸರು ಮಂಗಳವಾರ ಹೇಳಿದ್ದಾರೆ. ಅಪರಾಧ ಚಟುವಟಿಕೆಗಳಲ್ಲಿ ಬಳಸುತ್ತಿರುವ ಅನುಮಾನದ ಮೇಲೆ ಇದನ್ನು ಜಪ್ತಿ ಮಾಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಅಂತಾರಾಷ್ಟ್ರೀಯ ಅಕ್ರಮ ಹಣಕಾಸು ವರ್ಗಾವಣೆ ಬಗ್ಗೆ ನಡೆಯುತ್ತಿರುವ ತನಿಖೆಯ ಭಾಗವಾಗಿ ಮತ್ತು ಕ್ರಿಮಿನಲ್ ಆಸ್ತಿಗಳ ವರ್ಗಾವಣೆಯ ಬಗ್ಗೆ ಗುಪ್ತಚರ ಸಂಸ್ಥೆಗಳು ನೀಡಿದ ಮಾಹಿತಿಯನ್ನು ಆಧರಿಸಿ ಪೊಲೀಸರು ದೇಶದಲ್ಲೇ ಅತಿ ದೊಡ್ಡ ಜಪ್ತಿಯನ್ನು ಮಾಡಿದ್ದಾರೆ.
ಕಳೆದ ತಿಂಗಳೂ ಇದೇ ರೀತಿ ಕ್ರಿಪ್ಟೋ ಕರೆನ್ಸಿ ಜಪ್ತಿ ಮಾಡಲಾಗಿತ್ತು. ಇದಕ್ಕೂ ಈಗ ವಶಪಡಿಸಿಕೊಂಡಿರುವ ಕ್ರಿಪ್ಟೋ ಕರೆನ್ಸಿಗೂ ಸಂಬಂಧವಿದೆ ಎಂದು ಪೊಲೀಸರು ಅಂದುಕೊಂಡಿದ್ದಾರೆ.
ಡಿಜಿಟಲ್‌ ಪ್ಲಾಟ್‌ಫಾರ್ಮ್‌ಗಳು ಅಭಿವೃದ್ಧಿ ಹೊಂದುತ್ತಿದ್ದರೂ ಸದ್ಯ ಅಪರಾಧ ಚಟುವಟಿಕೆಗಳಲ್ಲಿ ನಗದೇ ಪ್ರಮುಖ ಪಾತ್ರ ವಹಿಸಿದೆ. ಹೀಗಿದ್ದೂ ಸಂಘಟಿತ ಅಪರಾಧಿಗಳು ತಮ್ಮ ಕೊಳಕು ಹಣವನ್ನು ವರ್ಗಾವಣೆ ಮಾಡಲು ಕ್ರಿಪ್ಟೋ ಕರೆನ್ಸಿಯನ್ನು ಬಳಸುತ್ತಿರುವುದನ್ನು ನಾವು ಹೆಚ್ಚಾಗಿ ನೋಡುತ್ತಿದ್ದೇವೆ ಎಂದು ಬ್ರಿಟನ್‌ನ ಡೆಪ್ಯುಟಿ ಅಸಿಸ್ಟೆಂಟ್‌ ಕಮಿಷನರ್‌ ಗ್ರಹಾಮ್‌ ಮೆಕ್‌ನಲ್ಟಿ ಹೇಳಿದ್ದಾರೆ.
