ಲಂಚ ಪ್ರಕರಣ: ಸಿಬಿಐನಿಂದ ಜಿಎಐಎಲ್ ನಿರ್ದೇಶಕ ರಂಗನಾಥನ್ ಬಂಧನ

ಹೊಸದಿಲ್ಲಿ: ಉತ್ಪನ್ನಗಳನ್ನು ಖರೀದಿ ಮಾಡುವ ಖಾಸಗಿ ಕಂಪೆನಿಗಳಿಗೆ ರಿಯಾಯಿತಿ ನೀಡಲು 50 ಲಕ್ಷ ರೂ ಪಡೆದ ಆರೋಪದಲ್ಲಿ () ಮಾರುಕಟ್ಟೆ ವಿಭಾಗದ ನಿರ್ದೇಶಕ ಇಎಸ್ ರಂಗನಾಥನ್ ಅವರನ್ನು ಬಂಧಿಸಿದೆ. ರಂಗನಾಥನ್, ಮಧ್ಯವರ್ತಿಗಳು ಮತ್ತು ಉದ್ಯಮಿಗಳನ್ನು ಒಳಗೊಂಡಿರುವ ಲಂಚ ಹಗರಣ ಆರೋಪವನ್ನು ಸಿಬಿಐ ಭೇದಿಸಿದ್ದು, ಶನಿವಾರ ಐವರನ್ನು ಬಂಧಿಸಿದೆ ಎಂದು ಅಧಿಕಾರಿಗಳು ಭಾನುವಾರ ತಿಳಿಸಿದ್ದಾರೆ. ರಂಗನಾಥನ್ ಅವರ ಕಚೇರಿ ಮತ್ತು ಮನೆ ಸೇರಿದಂತೆ ಎಂಟು ಸ್ಥಳಗಳಲ್ಲಿ ಸಿಬಿಐ ಅಧಿಕಾರಿಗಳು ಪರಿಶೀಲನೆ ನಡೆಸಿದ್ದರು. ಆರೋಪಿ ರಂಗನಾಥನ್ ಅವರಿಗೆ ಸೇರಿದ ಸ್ಥಳಗಳಲ್ಲಿ ತಪಾಸಣೆ ವೇಳೆ ಅಂದಾಜು 1.29 ಕೋಟಿ ರೂ ನಗದು, ಅಂದಾಜು 1.25 ಕೋಟಿ ರೂ ಮೌಲ್ಯದ ಚಿನ್ನದ ಆಭರಣ ಹಾಗೂ ಇತರೆ ಮೌಲ್ಯಯುತ ವಸ್ತುಗಳನ್ನು ವಶಪಡಿಸಿಕೊಳ್ಳಲಾಗಿತ್ತು ಎಂದು ಸಿಬಿಐ ವಕ್ತಾರ ಆರ್‌ಸಿ ಜೋಶಿ ತಿಳಿಸಿದ್ದಾರೆ. ಮಹಾರತ್ನ ಪಿಎಸ್‌ಯುದಿಂದ ಮಾರ್ಕೆಟಿಂಗ್ ಆಗುವ ಪೆಟ್ರೋ ಕೆಮಿಕಲ್‌ಗಳನ್ನು ಖರೀದಿ ಮಾಡುವ ಖಾಸಗಿ ಕಂಪೆನಿಗಳಿಗೆ ರಿಯಾಯಿತಿ ನೀಡಲು ಅವರಿಂದ ಲಂಚ ಸಂಗ್ರಹಿಸುತ್ತಿದ್ದ ಆರೋಪ ರಂಗನಾಥನ್ ಮೇಲಿದೆ. ಮಧ್ಯವರ್ತಿಗಳಾದ ಪವಾರ್ ಗೌರ್ ಮತ್ತು ದಿಲ್ಲಿ ಮೂಲದ ರಿಷಬ್ ಪಾಲಿಕೆಮ್ ಪ್ರೈ. ಲಿ ನಿರ್ದೇಶಕ ರಾಜೇಶ್ ಕುಮಾರ್ ಅವರೊಂದಿಗೆ ಸೇರಿ ಭ್ರಷ್ಟಾಚಾರ ಹಾಗೂ ಅಕ್ರಮ ಚಟುವಟಿಕೆಗಳ ಅಪರಾಧ ಸಂಚಿನಲ್ಲಿ ತೊಡಗಿದ್ದರು ಎಂದು ಆರೋಪಿಸಲಾಗಿದೆ. ಕುಮಾರ್ ಮತ್ತು ಗೌರ್ ಇಬ್ಬರೂ ರಂಗನಾಥನ್ ಅವರಿಗೆ ಮಧ್ಯವರ್ತಿಗಳಾಗಿದ್ದು, ಭಾರತೀಯ ಅನಿಲ ಪ್ರಾಧಿಕಾರ ನಿಯಮಿತ (ಜಿಎಐಎಲ್) ಮಾರ್ಕೆಟಿಂಗ್ ಮಾಡುವ ಪೆಟ್ರೋ ಕೆಮಿಕಲ್ ಉತ್ಪನ್ನಗಳನ್ನು ಖರೀದಿ ಮಾಡುವ ಖಾಸಗಿ ಕಂಪೆನಿಗಳಿಂದ ಲಂಚ ಸಂಗ್ರಹಿಸುತ್ತಿದ್ದರು ಎಂದು ಎಫ್‌ಐಆರ್‌ನಲ್ಲಿ ಹೇಳಲಾಗಿದೆ. ಅಂತಹ ಲಂಚ ವಿನಿಮಿಯ ಕುರಿತಾದ ಮಾಹಿತಿ ಆಧಾರದಲ್ಲಿ ಸಿಬಿಐ ತಂಡಗಳು ಅವರನ್ನು ರೆಡ್ ಹ್ಯಾಂಡ್ ಆಗಿ ಹಿಡಿಯುವ ಯೋಜನೆ ರೂಪಿಸಿದ್ದರು. ಅದರಂತೆ ರಂಗನಾಥನ್ ಪರವಾಗಿ 10 ಲಕ್ಷ ರೂ ಲಂಡ ಪಡೆಯುವಾಗ ಕುಮಾರ್ ಮತ್ತು ಗೌರ್ ಇಬ್ಬರನ್ನೂ ಬಂಧಿಸಿದ್ದರು. ಬಳಿಕ ಎನ್, ರಾಮಕೃಷ್ಣನ್ ನಾಯರ್, ಆದಿತ್ಯ ಬನ್ಸಾಲ್, ಉದ್ಯಮಿ ಸೌರಬ್ ಗುಪ್ತಾ ಎಂಬುವವರನ್ನು ಬಂಧಿಸಲಾಗಿತ್ತು. ರಂಗನಾಥನ್ ಹಾಗೂ ಇತರರ ವಿರುದ್ಧ ಶುಕ್ರವಾರ ಪ್ರಕರಣ ದಾಖಲಿಸಿಕೊಂಡ ಬಳಿಕ ಸಿಬಿಐ ವಿವಿಧೆಡೆ ದಾಳಿ ನಡೆಸಿತ್ತು.