ಮಾಸ್ಕ್ ಇಲ್ಲದೆ ಸೈಕಲ್ ತುಳಿದ ಸಂಸದ ತೇಜಸ್ವಿ ಸೂರ್ಯ: ಸಾಮಾಜಿಕ ಜಾಲತಾಣದಲ್ಲಿ ಟೀಕೆ

ಬೆಂಗಳೂರು: ರಾಜ್ಯಾದ್ಯಂತ ಕೋವಿಡ್ 19 ಪ್ರಕರಣಗಳಲ್ಲಿ ಇಳಿಕೆಯಾದ ಹಿನ್ನೆಲೆಯಲ್ಲಿ ನಿರ್ಬಂಧಗಳನ್ನು ಸಡಿಲಗೊಳಿಸಲಾಗಿದೆ. ಆದರೆ, ಧರಿಸುವುದು, ಸಾಮಾಜಿಕ ಅಂತರ ಕಾಪಾಡುವುದು, ಗುಂಪುಗೂಡದೆ ಇರುವುದು ಮುಂತಾದ ನಿಯಮಗಳನ್ನು ಪಾಲಿಸುವ ನಿಯಮ ಕಡ್ಡಾಯ ಪಾಲನೆಯಾಗಬೇಕಿದೆ. ಮಾಸ್ಕ್ ಧರಿಸದೆ ಓಡಾಡುವ ಅನೇಕರು ದಂಡನೆಗೂ ಒಳಗಾಗುತ್ತಿದ್ದಾರೆ. ಒಲಿಂಪಿಕ್ಸ್ ಕ್ರೀಡಾಕೂಟದ ಹಿನ್ನೆಲೆಯಲ್ಲಿ ಭಾರತದ ಕ್ರೀಡಾಪಟುಗಳಿಗೆ ಪ್ರೋತ್ಸಾಹ ನೀಡುವ ಸಲುವಾಗಿ ಯುವ ಘಟಕ 'ಚಿಯರ್ ಫಾರ್ ಇಂಡಿಯಾ' ಅಭಿಯಾನ ನಡೆಸುತ್ತಿದೆ. ಯುವ ಘಟಕದ ಅಧ್ಯಕ್ಷ, ಬಿಜೆಪಿ ಸಂಸದ ಪ್ರತಿ ದಿನವೂ ತಮ್ಮ ಚಟುವಟಿಕೆಯ ವಿವರಗಳನ್ನು ಹಂಚಿಕೊಳ್ಳುತ್ತಿದ್ದಾರೆ. ಆದರೆ ಭಾನುವಾರ ಈ ಚಟುವಟಿಕೆಯ ಭಾಗವಾಗಿ ತೇಜಸ್ವಿ ಸೂರ್ಯ ಅವರು ಮಾಸ್ಕ ಧರಿಸದೆ ಸಾರ್ವಜನಿಕ ಸ್ಥಳದಲ್ಲಿ ತುಳಿಯುವ ಮೂಲಕ ಟೀಕೆಗೆ ಒಳಗಾಗಿದ್ದಾರೆ. 'ಬಿ ಲೈಕ್ ಆನ್ ಒಲಿಂಪಿಯನ್' ಸವಾಲನ್ನು ಸ್ವೀಕರಿಸಿರುವ ತೇಜಸ್ವಿ ಸೂರ್ಯ, ಮೂರನೇ ದಿನ ಚಟುವಟಿಕೆಯ ವಿವರ ಹಂಚಿಕೊಂಡಿದ್ದರು. 12 ಸೂರ್ಯ ನಮಸ್ಕಾರ, 25.96 ಕಿಮೀ ಸೈಕ್ಲಿಂಗ್, ಸುಮಾರು 600 ಕ್ಯಾಲರಿ ಕರಗಿಸುವುದು. ಮಹಾಭಾರತ ಅಧ್ಯಯನ ಮುಂದುವರಿಸುವುದು ಎಂದು ದಿನದ ಕೆಲಸಗಳ ಮಾಹಿತಿ ಹಂಚಿಕೊಂಡಿದ್ದಾರೆ. ಜತೆಗೆ ನಗರದಲ್ಲಿ ಸೈಕಲ್ ತುಳಿಯುವಾಗ ಮಾರ್ಗಮಧ್ಯೆ ಬಸ್ ನಿರ್ವಾಹಕರು, ವಾಹನ ಸವಾರರನ್ನು ಮಾತಾಡಿಸಿಕೊಂಡು ಹೋಗುವ ಫೋಟೊಗಳನ್ನು ಕೂಡ ಸಾಮಾಜಿಕ ಜಾಲತಾಣಗಳಲ್ಲಿ ಪೋಸ್ಟ್ ಮಾಡಿದ್ದಾರೆ. ತೇಜಸ್ವಿ ಸೂರ್ಯ ಅವರ ಉತ್ಸಾಹ ಮತ್ತು ಉದ್ದೇಶಗಳನ್ನು ಅನೇಕರು ಶ್ಲಾಘಿಸಿದ್ದಾರೆ. ಆದರೆ, ಹೆಲ್ಮೆಟ್ ಹಾಗೂ ಮಾಸ್ಕ್ ಇಲ್ಲದೆ ಸಾರ್ವಜನಿಕ ಸ್ಥಳದಲ್ಲಿ ಓಡಾಡುತ್ತಿರುವುದನ್ನು ಪ್ರಶ್ನಿಸುತ್ತಿದ್ದಾರೆ. 'ನಮ್ಮಂತಹ ಸಾಮಾನ್ಯ ನಾಗರಿಕರಿಗೊಂದು ನ್ಯಾಯ, ನಿಮ್ಮಂತಹ ಪ್ರಭಾವಿ ಜನಪ್ರತಿನಿಧಿಗಳಿಗೆ ಒಂದು ನ್ಯಾಯವೇ?' ಎಂದು ಕೆಲವರು ಪ್ರಶ್ನಿಸಿದ್ದಾರೆ. 'ಯುವ ಪೀಳಿಕೆಗೆ ಉತ್ತೇಜನ ನೀಡುವ ನಿಮ್ಮ ಪ್ರಯತ್ನವನ್ನು ಮೆಚ್ಚುತ್ತೇನೆ. ಆದರೆ ನೀವು ಕೋವಿಡ್ ನಿಯಮಗಳನ್ನು ಪಾಲಿಸಬೇಕಿದೆ. ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡುವಾಗ ಎಚ್ಚರವಹಿಸಿ. ಅನೇಕ ಯುವಜನರು ನಿಮ್ಮನ್ನು ಅನುಸರಿಸುತ್ತಿದ್ದಾರೆ. ನೀವು ಕೆಟ್ಟ ಉದಾಹರಣೆ ನೀಡುವುದನ್ನು ನಾವು ಬಯಸುವುದಿಲ್ಲ' ಎಂದು ನಾಗಶ್ರೀ ಎಂಬುವವರು ಹೇಳಿದ್ದಾರೆ. 'ನೀವೊಬ್ಬ ಸಂಸದರಾಗಿ ಮಾಸ್ಕ್ ಧರಿಸುವುದನ್ನು ಮರೆಯಬೇಡಿ. ನೀವು ಲಸಿಕೆ ಪಡೆದಿದ್ದರೂ ಸೋಂಕು ಹರಡಿಸಬಹುದು. ಕೋವಿಡ್ ನಿಯಮಗಳನ್ನು ಪಾಲಿಸಿ. ಜತೆಗೆ ಸೈಕಲ್ ಓಡಿಸುವಾಗ ಹೆಲ್ಮೆಟ್ ಧರಿಸಿ ಸುರಕ್ಷತಾ ನಿಯಮಗಳನ್ನು ಪಾಲಿಸಿ' ಎಂದು ಕೆಲವರು ಸಲಹೆ ನೀಡಿದ್ದಾರೆ. ಇನ್ನು ಕೆಲವರು, ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆ ಏರಿಕೆ ವಿರುದ್ಧ ಸಿಡಿದೆದ್ದಿರುವ ತೇಜಸ್ವಿ ಸೂರ್ಯ, ಸೈಕಲ್ ಏರಿ ಕೇಂದ್ರ ಸರಕಾರದ ನೀತಿ ವಿರುದ್ಧ ಪ್ರತಿಭಟನೆ ನಡೆಸುತ್ತಿದ್ದಾರೆ ಎಂದೂ ವ್ಯಂಗ್ಯವಾಡಿದ್ದಾರೆ.