ದೇಶಾದ್ಯಂತ ವ್ಯಾಪಿಸಿದ ನೈಋುತ್ಯ ಮುಂಗಾರು: ವಾಡಿಕೆಗಿಂತ ಐದು ದಿನ ವಿಳಂಬ

: 'ಐದು ದಿನಗಳ ವಿಳಂಬದ ಬಳಿಕ ನೈಋುತ್ಯ ದೇಶಾದ್ಯಂತ ವ್ಯಾಪಿಸಿದೆ' ಎಂದು ಹವಾಮಾನ ಇಲಾಖೆ ಮಂಗಳವಾರ ಘೋಷಿಸಿದೆ. ಸಾಮಾನ್ಯವಾಗಿ ಜುಲೈ 8ರ ವೇಳೆಗೆ ನೈಋುತ್ಯ ಮುಂಗಾರು ಇಡೀ ದೇಶವನ್ನು ಆವರಿಸುತ್ತದೆ. ಈ ಬಾರಿ ಐದು ದಿನ ವಿಳಂಬವಾಗಿದೆ. ದೇಶದ ಬಹುತೇಕ ರಾಜ್ಯಗಳಲ್ಲಿ ಸುರಿದು ಕೊನೆಯದಾಗಿ ದಿಲ್ಲಿಗೆ ನೈಋುತ್ಯ ಮುಂಗಾರು ಪ್ರವೇಶಿಸುವುದು ವಾಡಿಕೆಯಾಗಿದೆ. ಸೋಮವಾರ ರಾಜಸ್ಥಾನದ ಜೈಸಲ್ಮೇರ್‌ ಹಾಗೂ ಗಂಗಾ ನಗರಕ್ಕೆ ಮುಂಗಾರು ಪ್ರವೇಶಿಸಿದರೂ, ದಿಲ್ಲಿಯಲ್ಲಿ ಮಳೆಯಾಗಿರಲಿಲ್ಲ. ಆದರೆ, ಮಂಗಳವಾರ ದಿಲ್ಲಿಯಲ್ಲಿ ಭಾರಿ ಸುರಿದಿದೆ. 'ಕಳೆದ ನಾಲ್ಕು ದಿನಗಳಿಂದ ತೇವಾಂಶದಿಂದ ಕೂಡಿದ ಗಾಳಿಯು ಬಂಗಾಳ ಕೊಲ್ಲಿಯಿಂದ ಪೂರ್ವದ ಕಡೆ ಬೀಸುತ್ತಿದ್ದು, ಮೋಡಗಳು ವ್ಯಾಪಿಸಿ ಉತ್ತಮ ಮಳೆಯಾಗುತ್ತಿದೆ. ಹೀಗೆಯೇ ವ್ಯಾಪಿಸುತ್ತಾ , ಉತ್ತರ ಪ್ರದೇಶ, ಪಂಜಾಬ್‌, ಹರಿಯಾಣ ಹಾಗೂ ರಾಜಸ್ಥಾನದಲ್ಲಿ ಉತ್ತಮ ಮಳೆಯಾಗುತ್ತದೆ' ಎಂದು ಹವಾಮಾನ ಇಲಾಖೆ ತಿಳಿಸಿದೆ. ಎರಡು ದಿನ ವಿಳಂಬವಾಗಿ, ಅಂದರೆ ಜೂನ್‌ ಒಂದರ ಬದಲಾಗಿ ಜೂನ್‌ ಮೂರರಂದು ಮುಂಗಾರು ಕೇರಳ ಪ್ರವೇಶಿಸಿತ್ತು. ದಿಲ್ಲಿ ಹಾಗೂ ಅದರ ಸುತ್ತಮುತ್ತಲಿನ ರಾಜ್ಯಗಳಲ್ಲಿ ಜೂನ್‌ 15ರಂದು ಮಳೆಯಾಗುತ್ತದೆ ಎಂದು ಜೂನ್‌ ಮೂರರಂದು ಹವಾಮಾನ ಇಲಾಖೆ ತಿಳಿಸಿತ್ತು. ಆದರೂ ಮುಂಗಾರು ಪ್ರವೇಶಿಸಿರಲಿಲ್ಲ. ಅಲ್ಲದೆ, ಜುಲೈ 10ರಂದು ದಿಲ್ಲಿಗೆ ಮುಂಗಾರು ಪ್ರವೇಶಿಸಲಿದೆ ಎಂದು ಜುಲೈ 5ರಂದು ತಿಳಿಸಿತ್ತಾದರೂ ಮೂರು ದಿನ ವಿಳಂಬವಾಗಿ ಪ್ರವೇಶಿಸಿದೆ. ಮಧ್ಯಪ್ರದೇಶದಲ್ಲಿಸಿಡಿಲಿಗೆ ಇನ್ನೂ ಮೂವರ ಬಲಿ: ಮಧ್ಯಪ್ರದೇಶದಲ್ಲಿ ಸಿಡಿಲಿನ ಅಬ್ಬರಕ್ಕೆ ಮತ್ತೆ ಮೂವರು ಬಲಿಯಾಗಿದ್ದು, ಇಬ್ಬರು ಗಾಯಗೊಂಡಿದ್ದಾರೆ. ಆ ಮೂಲಕ ರಾಜ್ಯದಲ್ಲಿ ಸಿಡಿಲು ಬಡಿದು ಮೃತಪಟ್ಟವರ ಸಂಖ್ಯೆ 15ಕ್ಕೆ ಏರಿಕೆಯಾಗಿದ್ದು, 13 ಜನ ಗಾಯಗೊಂಡಿದ್ದಾರೆ. ಮೂರು ದಿನದಲ್ಲಿ ಉತ್ತರ ಪ್ರದೇಶ, ರಾಜಸ್ಥಾನ ಹಾಗೂ ಮಧ್ಯಪ್ರದೇಶ ಸೇರಿ ಇದುವರೆಗೆ 79 ಜನ ಸಿಡಿಲಿಗೆ ಬಲಿಯಾಗಿದ್ದಾರೆ. ಹಿಮಾಚಲದಲ್ಲಿ ಮೂವರ ಸಾವು: ಹಿಮಾಚಲ ಪ್ರದೇಶದಲ್ಲಿ ಮಳೆ ಅಬ್ಬರ ಹೆಚ್ಚಾಗುತ್ತಿದ್ದು, ಕಾಂಗ್ರಾ ಜಿಲ್ಲೆಯಲ್ಲಿ ಮಂಗಳವಾರ ಮೂವರು ಮೃತಪಟ್ಟಿದ್ದಾರೆ. ನಾಲ್ವರು ಮಹಿಳೆಯರು ಸೇರಿ ಒಂಬತ್ತು ಜನ ನಾಪತ್ತೆಯಾಗಿದ್ದು, ರಾಷ್ಟ್ರೀಯ ವಿಪತ್ತು ನಿರ್ವಹಣಾ ಪಡೆ (ಎನ್‌ಡಿಆರ್‌ಎಫ್‌) ರಕ್ಷಣಾ ಕಾರ್ಯಾಚರಣೆಯಲ್ಲಿ ತೊಡಗಿದೆ. ಭಾರಿ ಮಳೆಯಿಂದಾಗಿ ಮನೆಗಳಿಗೆ ಹಾನಿಯಾಗಿದ್ದು, ವಾಹನಗಳು ಕೊಚ್ಚಿಹೋಗಿವೆ. ಇನ್ನೂ ಎರಡು ಮೂರು ದಿನ ಭಾರಿ ಮಳೆಯಾಗಲಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದ್ದು, 'ಅರೆಂಜ್‌ ಅಲರ್ಟ್‌' ಘೋಷಿಸಲಾಗಿದೆ. ಉತ್ತರಾಖಂಡ ಹಾಗೂ ಜಮ್ಮುವಿನಲ್ಲೂ ಮಳೆಯಾಗಿದ್ದು, ಹಲವೆಡೆ ಭೂಕುಸಿತ ಉಂಟಾಗಿದೆ ಎಂದು ತಿಳಿದುಬಂದಿದೆ.