ದೀಪಾವಳಿ ವೇಳೆ ಪಟಾಕಿ ಸಿಡಿತಕ್ಕೆ 45 ಮಂದಿಯ ಕಣ್ಣಿಗೆ ಗಾಯ; 11 ಜನ ಅಮಾಯಕರ ಕಣ್ಣಿಗೂ ಘಾಸಿ

ಬೆಂಗಳೂರು: ಬೆಳಕಿನ ಹಬ್ಬವಾದ ದೀಪಾವಳಿಯಂದು ನಗರದಾದ್ಯಂತ 45ಕ್ಕೂ ಹೆಚ್ಚು ಮಂದಿ ಪಟಾಕಿ ಸ್ಫೋಟದಿಂದ ಗಾಯಗೊಂಡಿದ್ದಾರೆ. ಈ ಪೈಕಿ ಇಬ್ಬರು ಮಕ್ಕಳು ಹಾಗೂ ಓರ್ವ ಮಹಿಳೆಗೆ ಗಂಭೀರ ಗಾಯವಾಗಿದೆ. ಕೆಲವರು ತಾವೇ ಪಟಾಕಿ ಹೊಡೆಯುವಾಗ ಕಣ್ಣಿಗೆ ಪೆಟ್ಟು ಮಾಡಿಕೊಂಡರೆ, ಇನ್ನೂ ಕೆಲವರು ಬೇರೆಯವರು ಪಟಾಕಿ ಹೊಡೆಯುತ್ತಿರುವಾಗ ಕಿಡಿ ತಾಗಿ ಕಣ್ಣಿಗೆ ಹಾನಿಯಾಗಿದೆ. ಕಳೆದ ವರ್ಷ ನಗರದಲ್ಲಿ ಮೂರು ಜನರು ಪಟಾಕಿಯಿಂದ ಕಣ್ಣು ಕಳೆದುಕೊಂಡಿದ್ದರು. ನಗರದ ಮಿಂಟೋ ಕಣ್ಣಿನ ಆಸ್ಪತ್ರೆಯಲ್ಲಿ 23 ಜನರಿಗೆ ಚಿಕಿತ್ಸೆ ನೀಡಲಾಗಿದ್ದು, ಇದರಲ್ಲಿ 16 ಜನ ಮಕ್ಕಳಿಗೆ ಚಿಕಿತ್ಸೆ ನೀಡಲಾಗಿದೆ. ಕಲಾಸಿಪಾಳ್ಯದ 10 ವರ್ಷದ ಬಾಲಕ ನರೇಶ್‌, ಪಟಾಕಿ ಹಚ್ಚುತ್ತಿರುವುದನ್ನು ನೋಡುತ್ತಿರುವಾಗ ಕಿಡಿಯೊಂದು ಕಣ್ಣಿಗೆ ತಾಗಿ ಗಾಯವಾಗಿದೆ. ಸಾರಕ್ಕಿ ಗೊಲ್ಲಹಳ್ಳಿಯ ಬಾಲಕ ಬಾಲಾಜಿ (14) ಬಿಜಿಲಿ ಪಟಾಕಿ ಹೊಡೆಯುತ್ತಿರುವಾಗ ಎಡಗಣ್ಣಿಗೆ ಗಾಯ ಮಾಡಿಕೊಂಡಿದ್ದಾನೆ. ಜೋಗುಪಾಳ್ಯದ ಹಿತೇಶ್‌ ಗೌಡ (5) ಪಟಾಕಿ ಸಿಡಿಯುವುದನ್ನು ನೋಡುತ್ತಿರುವಾಗ ಎರಡೂ ಕಣ್ಣುಗಳಿಗೂ ಕಿಡಿ ತಾಗಿ ಗಾಯವಾಗಿದೆ ಎಂದು ಮಿಂಟೋ ಆಸ್ಪತ್ರೆಯ ನಿರ್ದೇಶಕಿ ಡಾ. ಸುಜಾತಾ ರಾಥೋಡ್‌ ಹೇಳಿದ್ದಾರೆ. ಚಾಮರಾಜಪೇಟೆಯ ಕೆಜಿ ನಗರದ 16 ವರ್ಷದ ಬಾಲಕ ಅಭಯ್‌, ಹೂಕುಂಡ (ಪ್ಲವರ್‌ ಪಾಟ್‌) ಹಚ್ಚುವಾಗ ಕಣ್ಣಿಗೆ ಸಿಡಿದು ಹಾನಿಯಾಗಿದ್ದು, ಆತನಿಗೆ ಚಿಕಿತ್ಸೆ ನೀಡಲಾಗುತ್ತಿದೆ. ನಾಗರಬಾವಿಯ 9 ವರ್ಷ ಪ್ರಜ್ವಲ್‌, ಬಿಜಿಲಿ ಪಟಾಕಿ ಹಚ್ಚುವಾಗ ಎರಡೂ ಕಣ್ಣಿಗೆ ಹಾನಿ ಮಾಡಿಕೊಂಡಿದ್ದು ಆತನಿಗೂ ಚಿಕಿತ್ಸೆ ನೀಡಲಾಗಿದೆ. ಚಿಂತಾಮಣಿಯ 11 ವರ್ಷ ಬಾಲಕ ಚರಣ್‌, ಆಟಂ ಬಾಂಬ್‌ ಹೊಡೆಯುತ್ತಿರುವಾಗ ಕಿಡಿಯೊಂದು ಎಡ್ಣಗಣ್ಣಿಗೆ ತಾಗಿ ಗಂಭೀರ ಗಾಯವಾಗಿದೆ ಎಂದು ಡಾ. ಸುಜಾತಾ ತಿಳಿಸಿದ್ದಾರೆ. ಗೋರಿಪಾಳ್ಯದ ಹಾರ್ಮೈನ್‌ ಎಂಬ 5 ವರ್ಷದ ಬಾಲಕ ಭೂಚಕ್ರ ಹಚ್ಚುವಾಗ ಬಲಗಣ್ಣಿಗೆ ಹಾನಿ ಮಾಡಿಕೊಂಡಿದ್ದಾನೆ. ಅಂಜನಪ್ಪ ಗಾರ್ಡನ್‌ನ 37 ವರ್ಷದ ಶ್ರೀರಾಮ್‌ ಹಾಗೂ ಶಿವಾಜಿನಗರದ ಕಾಮರಾಜ ರಸ್ತೆಯ ಹರಿಪ್ರಸಾದ್‌ (37) ಸರ ಪಟಾಕಿ ಹಚ್ಚುವಾಗ ಕಣ್ಣಿನ ರೆಪ್ಪೆಗೆ ಹಾನಿಮಾಡಿಕೊಂಡಿದ್ದು, ಈ ಇಬ್ಬರ ಕಣ್ಣಿನ ಪರೀಕ್ಷೆ ನಡೆಸಿ ಚಿಕಿತ್ಸೆ ನೀಡಲಾಗುತ್ತಿದ್ದು ದೃಷ್ಟಿಗೆ ಯಾವುದೇ ಹಾನಿಯಾಗಿಲ್ಲಎಂದು ಡಾ. ಸುಜಾತಾ ತಿಳಿಸಿದ್ದಾರೆ. ಅಗ್ರಹಾರ ದಾಸರಹಳ್ಳಿಯ 50 ವರ್ಷದ ಕೃಷ್ಣಮೂರ್ತಿ ಅವರು ಆಟಂಬಾಂಬ್‌ ಸಿಡಿಸುವಾಗ ಕಣ್ಣಿಗೆ ಹಾನಿ ಮಾಡಿಕೊಂಡಿದ್ದಾರೆ, ಇದಲ್ಲದೆ ಎಲೆಕ್ಟ್ರಾನಿಕ್‌ ಸಿಟಿಯ ಸಮತಾ (15) ಭೂ ಚಕ್ರ ಹಚ್ಚುವಾಗ ಕಣ್ಣಿನ ಕೆಳಭಾಗದ ಚರ್ಮಕ್ಕೆ ಹಾನಿ ಮಾಡಿಕೊಂಡಿದ್ದು, ಆಕೆಗೂ ಚಿಕಿತ್ಸೆ ನೀಡಲಾಗಿದೆ. ಶ್ರೀವಿವೇಕಾನಂದ ಸೇವಾಶ್ರಮದ 70 ವರ್ಷದ ಭಾಗ್ಯಮ್ಮ ಎನ್ನುವವರು ರಸ್ತೆಯಲ್ಲಿ ಹೋಗುತ್ತಿರುವಾಗ ಪಟಾಕಿಯೊಂದು ಸಿಡಿದ ಪರಿಣಾಮ ಎಡಗಣ್ಣಿಗೆ ಗಂಭಿರ ಗಾಯವಾಗಿದ್ದು, ಮಿಂಟೋ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ನಾರಾಯಣ ನೇತ್ರಾಲಯದಲ್ಲಿ 20 ಜನರಿಗೆ ಚಿಕಿತ್ಸೆನಾರಾಯಣ ನೇತ್ರಾಲಯದಲ್ಲಿ 20 ಜನರಿಗೆ ಚಿಕಿತ್ಸೆ ನೀಡಲಾಗಿದೆ. ಇದರಲ್ಲಿ 12 ಜನ ಮಕ್ಕಳು ಹಾಗೂ 8 ಜನ ದೊಡ್ಡವರಿದ್ದಾರೆ. ಯಾರಿಗೂ ಗಂಭೀರ ಗಾಯಗಳಾಗಿಲ್ಲ. ಇದರಲ್ಲಿ 11 ಜನ ಅಮಾಯಕರ ಕಣ್ಣಿಗೆ ಗಾಯವಾಗಿದೆ ಎಂದು ಆಸ್ಪತ್ರೆಯ ಮುಖ್ಯಸ್ಥ ಡಾ.ಭುಜಂಗ ಶೆಟ್ಟಿ ತಿಳಿಸಿದ್ದಾರೆ. ಇನ್ನುಳಿದಂತೆ ಡಾ.ಅಗರ್ವಾಲ್‌ ಕಣ್ಣಿನ ಆಸ್ಪತ್ರೆಯಲ್ಲಿ ಇಬ್ಬರು ಬಾಲಕರಿಗೆ ಚಿಕಿತ್ಸೆ ನೀಡಲಾಗಿದೆ. ಕಳೆದ ಐದು ವರ್ಷದಲ್ಲಿ ಮಿಂಟೋ ಅಸ್ಪತ್ರೆಯಲ್ಲಿ ದಾಖಲಾದ ಪಟಾಕಿ ಪ್ರಕರಣಗಳು2016- 33 2017- 45 2018- 46 2019- 49 2020 -23