ಗ್ರಾಮೀಣ ಭಾಗದಲ್ಲಿ ಕೊರೊನಾ ನಿಗ್ರಹಕ್ಕೆ ಕೇಂದ್ರದ ಸೂತ್ರ: ರ‍್ಯಾಪಿಡ್ ಆ್ಯಂಟಿಜೆನ್‌ ಟೆಸ್ಟ್‌ ಹೆಚ್ಚಿಸುವ ತಂತ್ರ..

: ಕೊರೊನಾ ಸೋಂಕು ಗ್ರಾಮೀಣ ಭಾಗಕ್ಕೂ ವ್ಯಾಪಿಸುತ್ತಿರುವ ಹಿನ್ನೆಲೆಯಲ್ಲಿ ಅಲ್ಲಿ ತಪಾಸಣೆ ತ್ವರಿತಗೊಳಿಸುವ ನಿಟ್ಟಿನಲ್ಲಿ ಕೇಂದ್ರ ಸರಕಾರವು ಆರ್‌ಟಿ-ಪಿಸಿಆರ್‌ ಟೆಸ್ಟ್‌ಗಿಂತಲೂ (ರ‍್ಯಾಟ್) ಹೆಚ್ಚಿಸುವತ್ತ ಗಮನಹರಿಸಿದೆ. ಜೂನ್‌ ಅಂತ್ಯದ ವೇಳೆಗೆ ಆರ್‌ಟಿ-ಪಿಸಿಆರ್‌ ಟೆಸ್ಟ್‌ ಅನ್ನು ಶೇ.40ಕ್ಕೆ ಇಳಿಸುವಂತೆ ಮತ್ತು ರ‍್ಯಾಟ್ ಅನ್ನು ಶೇ.60ಕ್ಕೆ ಹೆಚ್ಚಿಸುವಂತೆ ರಾಜ್ಯಗಳಿಗೆ ಕೇಂದ್ರ ಸರಕಾರ ಸೂಚನೆ ನೀಡಿದೆ. ಈ ವಿಧಾನದ ತಪಾಸಣೆಯ ಹೆಚ್ಚಳದಿಂದ ಹಳ್ಳಿಗಳಲ್ಲಿ ಮನೆ ಮನೆಗೆ ತೆರಳಿ ಸುಲಭದಲ್ಲಿ ಸೋಂಕಿತರನ್ನು ಪತ್ತೆ ಮಾಡಬಹುದಾಗಿದ್ದು, ಇದು ಸೋಂಕು ನಿಯಂತ್ರಣಕ್ಕೆ ಸಹಕಾರಿಯಾಗಲಿದೆ ಎನ್ನಲಾಗಿದೆ. ಸೋಂಕು ಗ್ರಾಮೀಣ ಭಾಗಕ್ಕೂ ತ್ವರಿತ ಗತಿಯಲ್ಲಿ ವ್ಯಾಪಿಸುತ್ತಿರುವುದು ಸರಕಾರವನ್ನು ಚಿಂತೆಗೀಡು ಮಾಡಿದೆ. ಹೀಗಾಗಿ ಸರಕಾರ ತನ್ನ ಟೆಸ್ಟಿಂಗ್‌ ಕಾರ್ಯತಂತ್ರವನ್ನು ಆಮೂಲಾಗ್ರವಾಗಿ ಬದಲಿಸುತ್ತಿದೆ. ಇದುವರೆಗೂ ಸರಕಾರ 'ಗೋಲ್ಡ್‌ ಸ್ಟ್ಯಾಂಡರ್ಡ್‌' ಎಂದು ಹೇಳುವ ಮೂಲಕ ಆರ್‌ಟಿ-ಪಿಸಿಆರ್‌ ಟೆಸ್ಟ್‌ಗೆ ಹೆಚ್ಚಿನ ಮನ್ನಣೆ ನೀಡುತ್ತಿತ್ತು. ಆದರೆ ಜೂನ್‌ ಅಂತ್ಯಕ್ಕೆ ರ‍್ಯಾಟ್ ವಿಧಾನದ ತಪಾಸಣೆಯನ್ನು ಶೇ.60ಕ್ಕೆ ಹೆಚ್ಚಿಸಲು ಮುಂದಾಗಿದೆ. ಜೂನ್‌ ಅಂತ್ಯದ ವೇಳೆಗೆ ದೇಶದಲ್ಲಿ ಪ್ರತಿನಿತ್ಯ 45 ಲಕ್ಷ ಜನರಿಗೆ ಕೊರೊನಾ ತಪಾಸಣೆ ನಡೆಸುವ ವ್ಯವಸ್ಥೆ ಬರಲಿದೆ. ಇದರಲ್ಲಿ 27 ಲಕ್ಷ ತಪಾಸಣೆಗಳು (ಶೇ.60) ರ‍್ಯಾಟ್ ವಿಧಾನದ ಮೂಲಕ ನಡೆಯಲಿದ್ದರೆ, 18 ಲಕ್ಷ ತಪಾಸಣೆಗಳು (ಶೇ.40) ಆರ್‌ಟಿ-ಪಿಸಿಆರ್‌ ವಿಧಾನದ ಮೂಲಕ ನಡೆಯಲಿದೆ. ಈಗಾಗಲೇ ರಾಜ್ಯಗಳು ಗ್ರಾಮೀಣ ಭಾಗದಲ್ಲಿ ಸಂಚಾರಿ ವಾಹನಗಳ ಮೂಲಕ ಆರ್‌ಟಿ-ಪಿಸಿಆರ್‌ ತಪಾಸಣೆ ನಡೆಸುತ್ತಿದೆ. ಆದರೆ ಸ್ವ್ಯಾಬ್ ಮಾದರಿಗಳನ್ನು ನಗರದಲ್ಲಿರುವ ಪ್ರಯೋಗಾಲಯಗಳಿಗೆ ಕಳಿಸಬೇಕಾಗಿದ್ದು, ವರದಿ ಬರಲು 2 ರಿಂದ 3 ದಿನ ಕಾಯಬೇಕಾಗುತ್ತದೆ. ಆದರೆ ರ‍್ಯಾಟ್ ಟೆಸ್ಟ್‌ ಅನ್ನು ಗ್ರಾಮೀಣ ಭಾಗದಲ್ಲಿ ಮನೆಮನೆಗೆ ತೆರಳಿ ಪರೀಕ್ಷೆ ನಡೆಸಬಹುದಾಗಿದ್ದು, ಇದರಲ್ಲಿ ವರದಿಯನ್ನು ತಕ್ಷಣ ಪಡೆಯಬಹುದಾಗಿದೆ. ಇದರಿಂದ ಸೋಂಕಿತರಿಗೆ ತಕ್ಷಣದಿಂದಲೇ ಚಿಕಿತ್ಸೆ ನೀಡಲು ಅನುಕೂಲವಾಗಲಿದೆ ಎಂಬುದು ಕೇಂದ್ರದ ಸಮರ್ಥನೆಯಾಗಿದೆ. ದಾಖಲೆಯ ತಪಾಸಣೆ: ದೇಶದಲ್ಲಿ ಗುರುವಾರ ಒಂದೇ ದಿನ ದಾಖಲೆಯ 20,61,683 ಜನರಿಗೆ ಕೊರೊನಾ ಸೋಂಕು ಪರೀಕ್ಷೆಗಳನ್ನು ನಡೆಸಲಾಗಿದೆ. ಪಾಸಿಟಿವಿಟಿ ಪ್ರಮಾಣ ಶೇ. 12.59ಕ್ಕೆ ಇಳಿಕೆಯಾಗಿದೆ. ದೇಶದಲ್ಲಿ 24 ಗಂಟೆಯಲ್ಲಿ 2,59,551 ಹೊಸ ಪ್ರಕರಣಗಳು ದಾಖಲಾಗಿದ್ದು, ಒಟ್ಟು 4,529 ಸಾವು ವರದಿಯಾಗಿದೆ. ವಿಶೇಷವಾಗಿ ದಿಲ್ಲಿಯಲ್ಲಿ ಕೇವಲ 3,009 ಹೊಸ ಪ್ರಕರಣ ಹಾಗೂ 252 ಸಾವು ದಾಖಲಾಗಿದ್ದು, ಪಾಸಿಟಿವಿಟಿ ಪ್ರಮಾಣ ಮೊದಲ ಬಾರಿಗೆ ಶೇ.5ಕ್ಕಿಂತ ಕಡಿಮೆ (ಶೇ.4.76) ವರದಿಯಾಗಿದೆ. ಸತತ ಐದನೇ ದಿನವೂ ಹೊಸ ಕೋವಿಡ್‌ ಪ್ರಕರಣಗಳಿಗಿಂತ ಚೇತರಿಕೆ ಪ್ರಕರಣಗಳು ಹೆಚ್ಚಳಗೊಂಡಿವೆ. ರಾಷ್ಟ್ರೀಯ ಚೇತರಿಕೆ ಪ್ರಮಾಣವು ಶೇ.87.25ಕ್ಕೆ ಏರಿಕೆಯಾಗಿದೆ ಎಂದು ಆರೋಗ್ಯ ಸಚಿವಾಲಯ ತಿಳಿಸಿದೆ. ಆಭರಣ, ಜವಳಿ ಮಳಿಗೆಗಳಿಗೆ ವಿನಾಯಿತಿ: ಲಾಕ್‌ಡೌನ್‌ ನಡುವೆ ದಿನಸಿ, ಹಾಲು ಮತ್ತು ಔಷಧ ಮಾರಾಟ ಮಳಿಗೆಗಳಲ್ಲದೆ ಆಭರಣ ಹಾಗೂ ಜವಳಿ ಮಳಿಗೆಗಳನ್ನು ತೆರೆಯಲು ಕೂಡ ಕೇರಳ ಸರಕಾರ ಅವಕಾಶ ಮಾಡಿಕೊಟ್ಟಿದೆ. ಇದಲ್ಲದೇ, ಮೀನುಗಾರ ಸಮುದಾಯಕ್ಕೆ ಯಾವುದೇ ಆದಾಯ ಇಲ್ಲದಿರುವ ಕಾರಣದಿಂದಾಗಿ ಉಚಿತ ಆಹಾರದ ಕಿಟ್‌ಗಳನ್ನು ನೀಡಲು ಸರಕಾರ ಮುಂದಾಗಿದೆ.