ಐಪಿಎಸ್ ಆಫೀಸರ್ ಪಾತ್ರದಲ್ಲಿ ಚೆಂದುಳ್ಳಿ ಚೆಲುವೆ ಅದಿತಿ ಪ್ರಭುದೇವ

ಪದ್ಮಾ ಶಿವಮೊಗ್ಗ ಸ್ಯಾಂಡಲ್‌ವುಡ್‌ನ ಚೆಂದುಳ್ಳಿ ಚೆಲುವೆ ಅವರು ಹೊಸ ಚಿತ್ರವೊಂದರಲ್ಲಿ ಪೊಲೀಸ್ ಆಫೀಸರ್ ಆಗಿ ನಟಿಸಲಿದ್ದಾರೆ. ನಟಿ ಅದಿತಿ ಪ್ರಭುದೇವ ಒಂದಾದ ಮೇಲೆ ಒಂದರಂತೆ ಅನೇಕ ಸಿನಿಮಾಗಳನ್ನು ಒಪ್ಪಿಕೊಳ್ಳುತ್ತಿದ್ದಾರೆ. ಈಗಾಗಲೇ 10ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿ ಅದರ ರಿಲೀಸ್‌ಗೆ ಕಾದಿರುವ ನಟಿ ಅದಿತಿ ಪ್ರಭುದೇವ ಅವರು ಇದೀಗ ಇನ್ನೊಂದು ಹೊಸ ಚಿತ್ರದ ಶೂಟಿಂಗ್‌ನಲ್ಲಿ ಬಿಝಿಯಾಗಿದ್ದಾರೆ. ಇನ್ನೂ ಹೆಸರಿಡದ ಈ ಚಿತ್ರದಲ್ಲಿ ನಟಿ ಅದಿತಿ ಪ್ರಭುದೇವ ಐಪಿಎಸ್‌ ಆಫೀಸರ್‌ ಆಗಿ ನಟಿಸಲಿದ್ದಾರೆ. ಮೊದಲ ಬಾರಿಗೆ ನಟಿ ಅದಿತಿ ಪ್ರಭುದೇವ ಅವರು ಪೊಲೀಸ್‌ ಯೂನಿಫಾರ್ಮ್‌ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಈ ಸಿನಿಮಾದಲ್ಲಿ ತಮ್ಮ ಬಹುದಿನದ ಕನಸು ನನಸಾಗುತ್ತಿರುವುದಕ್ಕೆ ನಟಿ ಅದಿತಿ ಪ್ರಭುದೇವ ಥ್ರಿಲ್‌ ಆಗಿದ್ದಾರೆ. ‘ಎಲ್ಲರಿಗೂ ಚಿಕ್ಕವರಿದ್ದಾಗ ಪೊಲೀಸ್‌ ಆಗಬೇಕು, ಪೊಲೀಸ್‌ ಡಿಪಾರ್ಟ್‌ಮೆಂಟ್‌ನಲ್ಲಿ ಕೆಲಸ ಮಾಡಬೇಕು ಅನ್ನುವ ಆಸೆಗಳಿರುತ್ತವೆ. ಆ ಕೆಲಸಾನೇ ಅಂಥದ್ದು ಮತ್ತು ಪೊಲೀಸ್‌ ಡ್ರೆಸ್‌ನ ಆಕರ್ಷಣೆಯೇ ಹಾಗಿರುತ್ತದೆ. ನನಗೂ ಈ ಕನಸು ಇತ್ತು. ನಾನು ಬೇರೆ ಬೇರೆ ರೀತಿಯ ಪಾತ್ರಗಳಲ್ಲಿ ನಟಿಸಬೇಕೆಂದಿದ್ದೇನೆ. ಈಗ ಈ ಸಿನಿಮಾ ಮೂಲಕ ಪೊಲೀಸ್‌ ಇನ್ವೆಸ್ಟಿಗೇಟಿವ್‌ ಆಫೀಸರ್‌ ಆಗುತ್ತಿದ್ದೇನೆ. ಸಸ್ಪೆನ್ಸ್‌ ಥ್ರಿಲ್ಲರ್‌ ಸಿನಿಮಾವಿದು. ಈ ಜಾನರನ್ನು ಎಲ್ಲರೂ ಇಷ್ಟಪಡುತ್ತಾರೆ. ಹಾಗಾಗಿ ಒಪ್ಪಿಕೊಂಡೆ. ಇನ್ನು ಮುಂದೆಯೂ ಇಂಥ ಪಾತ್ರ ಸಿಕ್ಕರೆ ಮಾಡುವೆ’ ಎಂದಿದ್ದಾರೆ ನಟಿ ಅದಿತಿ ಪ್ರಭುದೇವ. ಇತ್ತೀಚೆಗೆ ನಡೆದ ನೈಜ ಘಟನೆಯೊಂದರಿಂದ ಸ್ಫೂರ್ತಿ ಪಡೆದು ಈ ಸಿನಿಮಾ ಮಾಡಲಾಗುತ್ತಿದೆ. ಜೀವ ಎಂಬುವರು ಇದರ ನಿರ್ದೇಶಕರಾಗಿದ್ದು, ಹಲವು ವರ್ಷಗಳಿಂದ ಸಹ ನಿರ್ದೇಶಕರಾಗಿ ಕೆಲಸ ಮಾಡಿರುವ ಅವರು ಇದೀಗ ಮೊದಲ ಬಾರಿಗೆ ಸ್ವತಂತ್ರವಾಗಿ ನಿರ್ದೇಶನ ಮಾಡುತ್ತಿದ್ದಾರೆ. ನಟ ಪವನ್‌ ನಾಯಕರಾಗಿ ನಟಿಸುತ್ತಿರುವ ಈ ಸಿನಿಮಾದ ಚಿತ್ರೀಕರಣ ಈಗಾಗಲೇ ಮೈಸೂರಿನ ಪೊಲೀಸ್‌ ಸ್ಟೇಷನ್‌ನಲ್ಲಿ ಪ್ರಾರಂಭವಾಗಿದೆ. ಅರಮನೆ ನಗರಿಯಲ್ಲಿ 25 ದಿನಗಳ ಕಾಲ ಶೂಟಿಂಗ್‌ ನಡೆಯಲಿದ್ದು, ಇದರ ಕೆಲವು ಫೈಟ್‌ ದೃಶ್ಯಗಳಲ್ಲಿ ನಟಿ ಅದಿತಿ ಪ್ರಭುದೇವ ಸ್ಟಂಟ್‌ ಕೂಡ ಮಾಡಲಿದ್ದಾರೆ. ‘ಆಕ್ಷನ್‌ ದೃಶ್ಯಗಳಲ್ಲೂ ನಾನು ನಟಿಸಬೇಕಿದೆ. ಇದಕ್ಕಾಗಿ ಫೈಟ್‌ ಕಲಿಯುತ್ತಿದ್ದೇನೆ. ಈ ಸಿನಿಮಾದಲ್ಲಿ ಲವ್‌ ಸ್ಟೋರಿಯೂ ಲೈಟ್‌ ಆಗಿ ಬಂದು ಹೋಗುತ್ತದೆ. ನಾಯಕ ಪವನ್‌ ಈ ಮೊದಲು ಹಲವು ಸಿನಿಮಾಗಳಲ್ಲಿ ನಟಿಸಿದ್ದಾರೆ’ ಎಂದಿದ್ದಾರೆ ನಟಿ ಅದಿತಿ ಪ್ರಭುದೇವ. 'ಆನ ಮತ್ತು ಈ ಹೊಸ ಚಿತ್ರ ಆಕ್ಷನ್ ಓರಿಯೆಂಟೆಡ್ ನನಗೆ ಹೆಚ್ಚಾಗಿ ಈ ಥರದ ಸಿನಿಮಾಗಳಿಗೆ ಆಫರ್ ಬರುತ್ತಿದೆ. ಹೊಸಬರು ವಿಭಿನ್ನ ಕಥೆಗಳೊಂದಿಗೆ ಬರುತ್ತಿದ್ದಾರೆ. ಕಥೆ ಇಷ್ಟವಾಗುತ್ತಿರುವುದರಿಂದ ಹೊಸಬರೊಂದಿಗೆ ಸಿನಿಮಾ ಮಾಡುತ್ತಿರುವೆ’ ಎಂದು ನಟಿ ಅದಿತಿ ಪ್ರಭುದೇವ ತಿಳಿಸಿದ್ದಾರೆ. ಅಂದ್ಹಾಗೆ, ನಟಿ ಅದಿತಿ ಪ್ರಭುದೇವ ಕೈಯಲ್ಲಿ ತೋತಾಪುರಿ, ಗಜಾನನ ಅಂಡ್ ಗ್ಯಾಂಗ್, ಚಾಂಪಿಯನ್, ಓಲ್ಡ್ ಮಾಂಕ್, ತ್ರಿಬಲ್ ರೈಡಿಂಗ್, ಅಂದೊಂದಿತ್ತು ಕಾಲ, ಮಾಫಿಯಾ ಮುಂತಾದ ಚಿತ್ರಗಳಿವೆ.