ಹೈದರಾಬಾದ್‌ಗೆ ಬಂದಿಳಿದ 30 ಲಕ್ಷ ಡೋಸ್‌ ಸ್ಪುಟ್ನಿಕ್‌-ವಿ ಕೊರೊನಾ ಲಸಿಕೆ

ಹೈದರಾಬಾದ್‌: ರಷ್ಯಾ ತಯಾರಿಸಿರುವ ಸ್ಪುಟ್ನಿಕ್‌-ವಿ ಕೊರೊನಾ ಲಸಿಕೆಯ 30 ಲಕ್ಷ ಡೋಸ್‌ಗಳು ಮಂಗಳವಾರ ಹೈದರಾಬಾದ್‌ಗೆ ಬಂದಿಳಿದಿವೆ. ಇದು ರಷ್ಯಾದಿಂದ ಬರುತ್ತಿರುವ ಮೂರನೇ ಕಂತಿನ ಲಸಿಕೆಗಳಾಗಿದ್ದು, ಈ ಬಾರಿ ದೊಡ್ಡ ಪ್ರಮಾಣದಲ್ಲಿ ಲಸಿಕೆ ಭಾರತಕ್ಕೆ ಬಂದಿದೆ. 56.5 ಮೆಟ್ರಿಕ್‌ ಟನ್‌ ತೂಕದ ಈ ಲಸಿಕೆಗಳನ್ನು ಹೊತ್ತ ವಿಶೇಷ ವಿಮಾನ RU-9450 ಮಂಗಳವಾರ ಮುಂಜಾನೆ ಹೈದರಾಬಾದ್‌ನಲ್ಲಿ ಬಂದಿಳಿಯಿತು. ಇದು ಈವರೆಗೆ ಭಾರತದಲ್ಲಿ ನಿರ್ವಹಣೆ ಮಾಡಿದ ಅತ್ಯಂತ ದೊಡ್ಡ ಪ್ರಮಾಣದ ಲಸಿಕೆಯ ಪೂರೈಕೆಯಾಗಿದೆ ಎಂದು ಜಿಎಂಆರ್‌ ಹೈದರಾಬಾದ್‌ ಏರ್‌ ಕಾರ್ಗೊ ಹೇಳಿದೆ. ಬಂದಿಳಿದ ಕೇವಲ 90 ನಿಮಿಷಗಳನ್ನು ಲಾಸಿಕೆಗಳನ್ನು ಡಾ ರೆಡ್ಡೀಸ್‌ ಲ್ಯಾಬ್ಸ್‌ಗೆ ತಲುಪಿಸಲಾಯಿತು ಎಂದು ಜಿಎಂಆರ್‌ ಹೇಳಿದೆ. ಡಾ ರೆಡ್ಡೀಸ್‌ ಭಾರತದಲ್ಲಿ ಸ್ಪುಟ್ನಿಕ್‌-ವಿ ಲಸಿಕೆ ವಿತರಣೆಯ ಜವಾಬ್ದಾರಿ ಹೊತ್ತಿದ್ದು, ನೇರವಾಗಿ ರಷ್ಯನ್‌ ಡೈರೆಕ್ಟ್‌ ಇನ್ವೆಸ್ಟ್‌ಮೆಂಟ್‌ ಫಂಡ್‌ ಜತೆ ಒಪ್ಪಂದ ಮಾಡಿಕೊಂಡಿದೆ. ಈ ಹಿಂದೆ ಮೇ 1 ರಂದು 1.5 ಲಕ್ಷ ಡೋಸ್‌ ಲಸಿಕೆ ಭಾರತಕ್ಕೆ ಬಂದಿತ್ತು. ಮೇ 16 ರಂದು 60,000 ಡೋಸ್‌ ಬಂದಿತ್ತು. ಇದೀಗ ಒಂದೇ ಬಾರಿ 30 ಲಕ್ಷ ಡೋಸ್‌ ಲಸಿಕೆ ಬಂದಿದೆ. ಮೇ 14 ರಂದು ಭಾರತದಲ್ಲಿ ಸ್ಪುಟ್ನಿಕ್‌-ವಿ ಲಸಿಕೆ ಅಭಿಯಾನಕ್ಕೆ ಡಾ ರೆಡ್ಡೀಸ್‌ ಚಾಲನೆ ನೀಡಿದೆ. ಆರಂಭದಲ್ಲಿ ತನ್ನ ಉದ್ಯೋಗಿಗಳಿಗೆ ಲಸಿಕೆ ನೀಡುವ ಮೂಲಕ ಡಾ ರೆಡ್ಡೀಸ್‌ ಈ ಅಭಿಯಾನಕ್ಕೆ ಚಾಲನೆ ನೀಡಿತ್ತು. ಹೊಸದಾಗಿ ಬಂದಿಳಿದ ಲಸಿಕೆಗಳಿಗೆ ಕೇಂದ್ರ ಔಷಧ ಪ್ರಯೋಗಾಲಯ ಅನುಮತಿ ನೀಡಿದ ಬಳಿಕ ಇವುಗಳನ್ನು ಜನರಿಗೆ ನೀಡಲಾಗುತ್ತದೆ. ಜೂನ್‌ ಮಧ್ಯದ ವೇಳೆಗೆ ಈ ಲಸಿಕೆಗಳು ಜನರಿಗೆ ಸಿಗಲಿದೆ. ಆಮದು ಮಾಡಿಕೊಂಡ ಲಸಿಕೆಗೆ ಜಿಎಸ್‌ಟಿ ಸೇರಿ ಪ್ರತಿ ಡೋಸ್‌ಗೆ 995 ರೂ. ದರ ನಿಗದಿಪಡಿಸಲಾಗಿದೆ.