'ರಾಬರ್ಟ್' ಚಿತ್ರದ ರಾಘವ-ತನು ಜೋಡಿಗೆ ಸ್ಯಾಂಡಲ್‌ವುಡ್‌ನಲ್ಲಿ ಸಖತ್ ಡಿಮ್ಯಾಂಡ್‌!
'ಚಾಲೆಂಜಿಂಗ್ ಸ್ಟಾರ್' ದರ್ಶನ್ ಅಭಿನಯದ 'ರಾಬರ್ಟ್' ಸಿನಿಮಾದಲ್ಲಿ ಪತಿ, ಪತ್ನಿಯಾಗಿ ನಟಿಸಿದ್ದವರು ವಿನೋದ್‌ ಪ್ರಭಾಕರ್‌ ಮತ್ತು ಸೋನಲ್‌ ಮಂಥೆರೋ. ಇದೀಗ ಈ ಜೋಡಿಗೆ ಸ್ಯಾಂಡಲ್‌ವುಡ್‌ನಲ್ಲಿ ಡಿಮ್ಯಾಂಡ್‌ ಹೆಚ್ಚಾಗಿದೆ.
Admin
0
5
ಹರೀಶ್‌ ಬಸವರಾಜ್‌
ಈ ವರ್ಷದ ಸೂಪರ್‌ ಹಿಟ್‌ ಸಿನಿಮಾಗಳಲ್ಲಿ ಒಂದಾದ 'ರಾಬರ್ಟ್' ಸಿನಿಮಾದಲ್ಲಿ ದರ್ಶನ್ ಮತ್ತು ಆಶಾ ಭಟ್‌ ಅವರ ಜೋಡಿಯಷ್ಟೇ ಪ್ರೇಕ್ಷಕರಿಗೆ ಇಷ್ಟವಾದದ್ದು ರಾಘವ್‌ ಮತ್ತು ತನು ಜೋಡಿ. ಈ ಪಾತ್ರಗಳಲ್ಲಿ ನಟಿಸಿದ್ದ ವಿನೋದ್‌ ಪ್ರಭಾಕರ್‌ ಮತ್ತು ಸೋನಲ್‌ ಮಂಥೆರೋ ಅವರನ್ನು ಇಟ್ಟುಕೊಂಡು ಒಂದಷ್ಟು ಮಂದಿ ಸಿನಿಮಾ ಮಾಡಲು ಮುಂದೆ ಬಂದಿದ್ದಾರೆ.
'ರಾಬರ್ಟ್'ನಲ್ಲಿ ಈ ಜೋಡಿಯ ನಟನೆಯನ್ನು ಎಲ್ಲರೂ ಇಷ್ಟಪಟ್ಟಿದ್ದರು. ಒಂದಷ್ಟು ದಿನಗಳ ಕಾಲ ಸೋಶಿಯಲ್‌ ಮೀಡಿಯಾದಲ್ಲಿ ಅವರಿಬ್ಬರೂ ಒಟ್ಟಿಗಿರುವ ಫೋಟೋಗಳು ಸಿಕ್ಕಾಪಟ್ಟೆ ಹರಿದಾಡಿದ್ದವು ಕೂಡ. ಈಗ ಇವರಿಬ್ಬರನ್ನೂ ಸಿನಿಮಾದ ನಾಯಕ ಮತ್ತು ನಾಯಕಿಯನ್ನಾಗಿ ಮಾಡಲು ಕೆಲ ನಿರ್ದೇಶಕರು ಕಥೆ ಬರೆದುಕೊಂಡು ರೆಡಿಯಾಗಿದ್ದಾರೆ. ಈ ವಿಚಾರವನ್ನು ನಟ ವಿನೋದ್‌ ಪ್ರಭಾಕರ್‌ ಕೂಡ ದೃಢಪಡಿಸಿದ್ದಾರೆ. ಅವರಿಗೆ ಈಗಾಗಲೇ ಕೆಲ ನಿರ್ದೇಶಕರು ಮತ್ತು ನಿರ್ಮಾಪಕರು ಕರೆ ಮಾಡಿ ಕೇಳಿದ್ದಾರೆ. ಇನ್ನು ಕೆಲವರು ಈಗಾಗಲೇ ಕಥೆಯನ್ನು ಹೇಳಿದ್ದಾರಂತೆ. ಆದರೆ ಇನ್ನೂ ಯಾವುದನ್ನೂ ಅವರು ಫೈನಲ್‌ ಮಾಡಿಲ್ಲ.
'ನಮ್ಮಿಬ್ಬರ ಜೋಡಿಗೆ ಇಷ್ಟು ದೊಡ್ಡ ಮಟ್ಟದ ಜನಪ್ರಿಯತೆ ಸಿಗುತ್ತದೆ ಅಂದುಕೊಂಡಿರಲಿಲ್ಲ. 2019ರಲ್ಲಿ ಐದಾರು ಜನ ನಿರ್ಮಾಪಕರು ಅಡ್ವಾನ್ಸ್‌ ಕೊಟ್ಟಿದ್ದರು. ಅವರು 'ರಾಬರ್ಟ್'ನ ರಾಘವ್‌-ತನು ಜೋಡಿ ಹಿಟ್‌ ಆದುದನ್ನು ಕಂಡು ನಿಮ್ಮ ಸಿನಿಮಾಗೆ ಅವರನ್ನೇ ನಾಯಕಿಯನ್ನಾಗಿ ಹಾಕಿಕೊಳ್ಳೋಣ ಎಂದಿದ್ದಾರೆ. ಜತೆಗೆ ಲಾಕ್‌ಡೌನ್‌ಗಿಂತಲೂ ಮುನ್ನ ಒಬ್ಬರು ಕಥೆ ಹೇಳಿದ್ದಾರೆ. ಅವರು ನಮ್ಮಿಬ್ಬರ ಜೋಡಿಯನ್ನು ತಲೆಯಲ್ಲಿಟ್ಟುಕೊಂಡು ಕಥೆ ಹೇಳಿದ್ದಾರೆ. ಸಾಕಷ್ಟು ಜನ ಒಟ್ಟಿಗೆ ಕಾಣಿಸಿಕೊಳ್ಳಿ ಎನ್ನುತ್ತಿದ್ದಾರೆ. ನಮ್ಮ ಪಾತ್ರಗಳ ಮೂಲಕ ಜನ ನಮ್ಮನ್ನು ಗುರುತಿಸಿದರೆ ಅದು ನಮಗೆ ಹೆಚ್ಚುವರಿ ಗೌರವ ಸಿಕ್ಕಂತೆ' ಎನ್ನುತ್ತಾರೆ ವಿನೋದ್‌ ಪ್ರಭಾಕರ್‌.
ಸದ್ಯ ವಿನೋದ್‌ ಪ್ರಭಾಕರ್‌ 'ಲಂಕಾಸುರ' ಸಿನಿಮಾದಲ್ಲಿ ಬಿಝಿಯಾಗಿದ್ದಾರೆ. ಅದಕ್ಕಾಗಿ ಅವರು ಉದ್ದದ ಗಡ್ಡವನ್ನು ಬಿಟ್ಟಿದ್ದರು. ಆ ಚಿತ್ರದಲ್ಲಿಅವರಿಗೆ ಮೂರು ಶೇಡ್‌ನ ಪಾತ್ರವಿದೆಯಂತೆ. ಲಾಕ್‌ಡೌನ್‌ ಇಲ್ಲದೇ ಇದ್ದಲ್ಲಿ ಇಷ್ಟು ಹೊತ್ತಿಗೆ ಶೇ. 60ರಷ್ಟು ಚಿತ್ರೀಕರಣ ಕಂಪ್ಲೀಟ್‌ ಆಗಿರುತ್ತಿತ್ತು ಎಂದು ಮಾಹಿತಿ ನೀಡಿದ್ದಾರೆ ವಿನೋದ್‌. 'ನಮ್ಮಿಬ್ಬರ ಜೋಡಿ ಚೆನ್ನಾಗಿದೆ ಎಂದು ಒಂದಷ್ಟು ವಿಚಾರಣೆಗಳು ಬಂದಿವೆ. ಯಾವುದೂ ಫೈನಲ್‌ ಆಗಿಲ್ಲ. ಸೋನಲ್‌ ಅವರು ನಾಲ್ಕೈದು ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ. ಡೇಟ್ಸ್‌ ಮ್ಯಾಚ್‌ ಆಗಬೇಕು. ನನ್ನನ್ನು ಕೇಳಿದವರಿಗೆ ಅವರನ್ನು ಕೇಳಲು ಹೇಳಿದ್ದೇನೆ. ಒಟ್ಟಿಗೆ ಸಿನಿಮಾ ಮಾಡುವುದು ಖಚಿತ. ಆದರೆ ಯಾವುದು ಎಂಬುದಿನ್ನೂ ನಿರ್ಧಾರವಾಗಿಲ್ಲ' ಎನ್ನುತ್ತಾರೆ ವಿನೋದ್‌ ಪ್ರಭಾಕರ್‌.
