ಮಹಾರಾಷ್ಟ್ರ ಸರ್ಕಾರಕ್ಕೆ ಮುಖಭಂಗ: ಬಿಜೆಪಿಯ 12 ಶಾಸಕರ ಅಮಾನತು ರದ್ದುಗೊಳಿಸಿದ ಸುಪ್ರೀಂಕೋರ್ಟ್

ಮುಂಬಯಿ: ವಿಧಾನಸಭೆಯಲ್ಲಿ ಅನುಚಿತ ವರ್ತನೆ ಆರೋಪದಲ್ಲಿ ಬಿಜೆಪಿಯ 12 ಶಾಸಕರನ್ನು ಒಂದು ವರ್ಷ ಮಾಡುವ ವಿಧಾನಸಭೆಯ ನಿರ್ಣಯವನ್ನು ಶುಕ್ರವಾರ ರದ್ದುಗೊಳಿಸಿದೆ. ಇದರಿಂದ ಮಹಾರಾಷ್ಟ್ರದ ಮಹಾ ವಿಕಾಸ್ ಅಘಾಡಿ ಸರ್ಕಾರಕ್ಕೆ ತೀವ್ರ ಮುಖಭಂಗ ಉಂಟಾಗಿದೆ. 'ಅಧಿವೇಶನಗಳ ಆಚೆ ಶಾಸಕರನ್ನು ಅಮಾನತು ಮಾಡಿರುವುದು ಅಸಾಂವಿಧಾನಿಕ ಮತ್ತು ಕಾನೂನು ಬಾಹಿರ' ಎಂದು ಸುಪ್ರೀಂಕೋರ್ಟ್ ಹೇಳಿದೆ. 12 ಶಾಸಕರನ್ನು ಯಾವ ಅಧಿವೇಶನದಲ್ಲಿಯೂ ಭಾಗವಹಿಸದಂತೆ ಒಂದು ವರ್ಷ ಅಮಾನತು ಮಾಡಲಾಗಿದೆ. ನಿಯಮಗಳ ಪ್ರಕಾರ ಒಂದು ಅಧಿವೇಶನಕ್ಕೆ ಅಮಾನತು ಮಾಡಬಹುದಾಗಿದೆ. ಸ್ಪೀಕರ್ ಸ್ಥಾನದಲ್ಲಿ ಕುಳಿತಿದ್ದ ಭಾಸ್ಕರ್ ಜಾಧವ್ ಅವರ ಜಾಗಕ್ಕೆ ತೆರಳಿ ಅನುಚಿತ ವರ್ತನೆ ತೋರಿದ್ದಾರೆ ಎಂದು ರಾಜ್ಯ ಸರ್ಕಾರ ಆರೋಪಿಸಿದ ಬಳಿಕ ಕಳೆದ ವರ್ಷ ಜುಲೈ 5ರಂದು ವಿಧಾನಸಭೆಯಿಂದ ಅವರನ್ನು ಒಂದು ವರ್ಷ ಅಮಾನತು ಮಾಡಲಾಗಿತ್ತು. ಸಂಜಯ್ ಕುಟೆ, ಆಶೀಶ್ ಶೆಲಾರ್, ಅಭಿಮನ್ಯು ಪವಾರ್, ಗಿರೀಶ್ ಮಹಾಜನ್, ಅತುಲ್ ಭಟ್ಕಳ್ಕರ್, ಪರಾಗ್ ಅಲವಾನಿ, ಹರೀಶ್ ಪಿಂಪಾಲೆ, ಯೋಗೇಶ್ ಸಾಗರ್, ಜೇ ಕುಮಾರ್ ರಾವತ್, ನಾರಾಯಣ್ ಕುಚೆ, ರಾಮ್ ಸತ್ಪುತೆ ಮತ್ತು ಬಂಟಿ ಭಂಗಾಡಿಯಾ ಅಮಾನತುಗೊಂಡ ಬಿಜೆಪಿಯ 12 ಶಾಸಕರಾಗಿದ್ದಾರೆ. ಸಂಸದೀಯ ವ್ಯವಹಾರಗಳ ಸಚಿವ ಅನಿಲ್ ಪರಬ್ ಅವರು ವಿಧಾನಸಭೆಯಲ್ಲಿ ಶಾಸಕರು ಅಮಾನತು ನಿರ್ಣಯವನ್ನು ಮಂಡಿಸಿದ್ದರು. ಇದಕ್ಕೆ ಧ್ವನಿ ಮತದಿಂದ ಅನುಮೋದನೆ ದೊರಕಿತ್ತು. ದುರ್ವರ್ತನೆ ತೋರಿದ್ದಾನೆ ಎಂಬ ಆರೋಪ ಸುಳ್ಳು. ಜಾಧವ್ ಅವರು ಪ್ರತಿಪಾದಿಸಿದ ಘಟನೆಯು ಒಂದು ಆಯಾಮವನ್ನು ಮಾತ್ರ ಹೇಳುತ್ತದೆ ಎಂದು ವಿರೋಧ ಪಕ್ಷದ ನಾಯಕ ದೇವೇಂದ್ರ ಫಡ್ನವೀಸ್ ಆರೋಪಿಸಿದ್ದರು. 'ಇದು ಸುಳ್ಳು ಆರೋಪ. ವಿರೋಧ ಪಕ್ಷದ ಸ್ಥಾನಗಳನ್ನು ಕಡಿಮೆ ಮಾಡುವ ಪ್ರಯತ್ನ. ಏಕೆಂದರೆ ಸ್ಥಳೀಯ ಸಂಸ್ಥೆಗಳಲ್ಲಿನ ಹಿಂದುಳಿದ ವರ್ಗಗಳ ಕೋಟಾದಲ್ಲಿ ಸರ್ಕಾರದ ವಂಚನೆಯನ್ನು ನಾವು ಎತ್ತಿಹಿಡಿದಿದ್ದೆವು. ಹಂಗಾಮಿ ಸ್ಪೀಕರ್ ಅವರನ್ನು ಬಿಜೆಪಿ ಶಾಸಕರು ನಿಂದಿಸಿರಲಿಲ್ಲ' ಎಂದು ಫಡ್ನವೀಸ್ ಹೇಳಿದ್ದರು. ಅಸಭ್ಯ ವರ್ತನೆ ಆರೋಪದಲ್ಲಿ ವಿಧಾನಸಭೆಯಿಂದ ತಮ್ಮನ್ನು ಅಮಾನತು ಮಾಡಿದ್ದ ಆದೇಶವನ್ನು ಪ್ರಶ್ನಿಸಿ 12 ಶಾಸಕರು ಸುಪ್ರೀಂಕೋರ್ಟ್ ಮೆಟ್ಟಿಲೇರಿದ್ದರು. ಇದರ ತೀರ್ಪನ್ನು ಸುಪ್ರೀಂಕೋರ್ಟ್ ಕಳೆದ ವಾರ ಮೀಸಲಿಟ್ಟಿತ್ತು. ಕೆಲವು ಅರ್ಜಿದಾರರ ಪರ ಹಾಜರಾದ ಹಿರಿಯ ವಕೀಲ ಮುಕುಲ್ ರೋಹಟಗಿ, ವಿಚಾರಣೆ ಆಲಿಸದೆ ಸದನ ನಿರ್ಣಯ ತೆಗೆದುಕೊಂಡಿರುವುದು ಸ್ವಾಭಾವಿಕ ನ್ಯಾಯದ ಕೊರತೆ ಮತ್ತು ಅತಾರ್ಕಿಕವಾಗಿದೆ. ಅವರು ಶಾಸಕರನ್ನು ಒಂದು ವರ್ಷ ಅಮಾನತು ಮಾಡುವಂತಿಲ್ಲ. ಇದು ನಿಯಮ ಎಂದು ವಾದಿಸಿದ್ದರು. ಇನ್ನು ಕೆಲವು ಅರ್ಜಿದಾರರ ಪರ ವಾದ ಮಂಡಿಸಿದ ಹಿರಿಯ ವಕೀಲ ಮಹೇಶ್ ಜೇಠ್ಮಲಾನಿ, ಅಮಾನತು ನಿರ್ಣಯದ ಉದ್ದೇಶವು ಶಿಸ್ತಿಗೆ ಸಂಬಂಧಿಸಿರಬೇಕು. ಅಮಾನತನ್ನು ಒಂದು ಅವಧಿಗಿಂತ ಹೆಚ್ಚು ಕಾಲ ವಿಸ್ತರಿಸುವಂತೆ ಇಲ್ಲ ಎಂದು ಹೇಳಿದರು. ಇದನ್ನು ಪರಿಗಣಿಸಿದ ನ್ಯಾಯಮೂರ್ತಿಗಳಾದ ಎಎಂ ಖಾನ್ವಿಲ್ಕರ್, ದಿನೇಶ್ ಮಹೇಶ್ವರಿ ಮತ್ತು ಸಿ.ಟಿ ರವಿಕುಮಾರ್ ಅವರನ್ನು ಒಳಗೊಂಡ ನ್ಯಾಯಪೀಠ, ಶಾಸಕರ ಒಂದು ವರ್ಷದ ಅಮಾನತು ಅಸಾಂವಿಧಾನಿಕ ಎಂದು ತೀರ್ಪು ನೀಡಿದೆ.