ಬೆಂಗಳೂರಿನಲ್ಲಿ ಅಕ್ಟೋಬರ್‌ನಲ್ಲಿ ಅತಿ ಕಡಿಮೆ ಕೋವಿಡ್‌ ಕೇಸ್‌ ದಾಖಲು, ಸಂಭಾವ್ಯ 3ನೇ ಅಲೆಯ ಬಗ್ಗೆ ಆತಂಕ ದೂರ
2020ರ ಜುಲೈನಿಂದ ಇಲ್ಲಿಯವರೆಗಿನ ಅಂಕಿ - ಅಂಶಗಳನ್ನು ನೋಡಿದಾಗ ಇದೇ ಮೊದಲ ಬಾರಿಗೆ ಈ ವರ್ಷದ ಅಕ್ಟೋಬರ್‌ ತಿಂಗಳಲ್ಲಿ ಬೆಂಗಳೂರು ನಗರದಲ್ಲಿ ಅತಿ ಕಡಿಮೆ ಕೋವಿಡ್‌ ಪ್ರಕರಣಗಳು ದಾಖಲಾಗಿವೆ.
Admin
0
7
ಬೆಂಗಳೂರು: 2020ರ ಜುಲೈನಿಂದ ಇಲ್ಲಿಯವರೆಗೂ ಇದೇ ಮೊದಲ ಬಾರಿಗೆ ಈ ವರ್ಷದ ಅಕ್ಟೋಬರ್‌ ತಿಂಗಳಲ್ಲಿ ನಗರದಲ್ಲಿ ಅತಿ ಕಡಿಮೆ ಕೋವಿಡ್‌ ಪ್ರಕರಣಗಳು ದಾಖಲಾಗಿವೆ.
ಆರೋಗ್ಯ ಇಲಾಖೆಯ ವರದಿಯ ಪ್ರಕಾರ, ನಗರದಲ್ಲಿ ಅಕ್ಟೋಬರ್‌ನಲ್ಲಿ 5221 ಕೋವಿಡ್‌ ಪ್ರಕರಣಗಳು ದಾಖಲಾಗಿದ್ದು, 113 ಮಂದಿ ಕೊರೊನಾದಿಂದ ಮೃತಪಟ್ಟಿದ್ದಾರೆ. 2021ರ ಫೆಬ್ರವರಿಗಿಂತಲೂ 2021ರ ಅಕ್ಟೋಬರ್‌ನಲ್ಲಿ ಕೋವಿಡ್‌ ಪ್ರಕರಣಗಳು ತಗ್ಗಿವೆ. ಆದರೂ ಕೋವಿಡ್‌ ಸಾವುಗಳು ಮಾತ್ರ ಮುಂದುವರಿದಿದೆ.
2021ರ ಸೆಪ್ಟೆಂಬರ್‌ನಲ್ಲಿ ನಗರದಲ್ಲಿ 8,234 ಕೊರೊನಾ ಪ್ರಕರಣಗಳು ವರದಿಯಾಗಿದ್ದು, 155 ಮಂದಿ ಮೃತಪಟ್ಟಿದ್ದಾರೆ. ಅದೇ ರೀತಿ ಆಗಸ್ಟ್‌ನಲ್ಲಿ 10,089 ಕೊರೊನಾ ಪಾಸಿಟಿವ್‌ ಪ್ರಕರಣಗಳು, 113 ಮಂದಿ ಸಾವು ಹಾಗೂ ಜುಲೈನಲ್ಲಿ 13,104 ಪ್ರಕರಣಗಳು ದಾಖಲಾಗಿದ್ದು, 223 ಮಂದಿ ನಿಧನರಾಗಿದ್ದಾರೆ.
ಕೋವಿಡ್‌ ಮೊದಲನೇ ಅಲೆ ಸಂದರ್ಭದಲ್ಲಿ 2020ರ ಜೂನ್‌ 30ರವರೆಗೆ 5,435 ಕೋವಿಡ್‌ ಪ್ರಕರಣಗಳು, 95 ಸಾವಿನ ಪ್ರಕರಣಗಳು ವರದಿಯಾಗಿತ್ತು. ಜುಲೈ ವೇಳೆಗೆ ಈ ಸಂಖ್ಯೆ ದಿಢೀರ್‌ ಏರಿಕೆಯಾಗಿದ್ದು, 52,406 ಪ್ರಕರಣಗಳು ದಾಖಲಾಗಿದ್ದು, 962 ಮಂದಿ ಮೃತಪಟ್ಟಿದ್ದರು. ಅದೇ ರೀತಿ ಆಗಸ್ಟ್‌ನಲ್ಲಿ 75,514 ಕೊರೊನಾ ಪ್ರಕರಣಗಳು ವರದಿಯಾಗಿದ್ದು, 950 ಮಂದಿ ಅಸುನೀಗಿದ್ದರು.
ಅಲ್ಲದೇ 2020ರ ಸೆಪ್ಟೆಂಬರ್‌ ವೇಳೆಗೆ ಕೊರೊನಾ ಪ್ರಕರಣಗಳು ದುಪ್ಪಟ್ಟಾಗಿದ್ದು, 1,03,758 ಪ್ರಕರಣಗಳು ಹಾಗೂ 971 ಸಾವುಗಳು ವರದಿಯಾಗಿದೆ. ಅಕ್ಟೋಬರ್‌ನಲ್ಲಿ 1,00,958 ಕೋವಿಡ್‌ ಪ್ರಕರಣಗಳು ದಾಖಲಾಗಿದ್ದು, 897 ಮಂದಿ ಮೃತಪಟ್ಟಿದ್ದರು. ನಂತರದ ದಿನಗಳಲ್ಲಿ ಕೊರೊನಾ ಕೊಂಚ ತಗ್ಗಿದ್ದು, ನವೆಂಬರ್‌ನಲ್ಲಿ 32,101 ಪ್ರಕರಣಗಳು, 271 ಸಾವುಗಳು ಹಾಗೂ ಡಿಸೆಂಬರ್‌ನಲ್ಲಿ 18,551 ಪ್ರಕರಣಗಳು, 184 ಸಾವಿನ ಪ್ರಕರಣಗಳು ವರದಿಯಾಗಿವೆ. ಜನವರಿಯಲ್ಲಿ ಮತ್ತಷ್ಟು ತಗ್ಗಿದ್ದು, 10,311 ಪ್ರಕರಣಗಳು ದಾಖಲಾಗಿದ್ದು, 66 ಮಂದಿ ಮೃತಪಟ್ಟಿದ್ದರು. ಫೆಬ್ರವರಿನಲ್ಲಿ 6,813 ಪ್ರಕರಣಗಳು ವರದಿಯಾಗಿದ್ದು, 88 ಮಂದಿ ನಿಧನರಾಗಿದ್ದರು.
ಸದ್ಯ ವಾರದ ಪ್ರಕರಣಗಳ ಸಂಖ್ಯೆಯನ್ನು ಗಮನಿಸಿದರೆ, ಈ ವರ್ಷದ ಅಕ್ಟೋಬರ್‌ 2 ರಿಂದ 8 ರವರೆಗೆ, 1,261 ಕೊರೊನಾ ಪ್ರಕರಣಗಳು ದಾಖಲಾಗಿದ್ದು, 22 ಮಂದಿ ಮೃತಪಟ್ಟಿದ್ದಾರೆ. ಅದೇ ರೀತಿ ಅ. 9 ರಿಂದ 15ರವರೆಗೆ 1,088 ಪ್ರಕರಣಗಳು ಮತ್ತು 26 ಸಾವು, ಅ. 16 ರಿಂದ 22ರವರೆಗೆ 1,268 ಪ್ರಕರಣಗಳು, 31 ಸಾವುಗಳು ವರದಿಯಾಗಿವೆ. ಅ. 23 ರಿಂದ 29ರವರೆಗೆ 1,222 ಕೋವಿಡ್‌ ಪ್ರಕರಣಗಳು ವರದಿಯಾಗಿದ್ದು, 34 ಮಂದಿ ಮೃತಪಟ್ಟಿದ್ದಾರೆ.
ಆತಂಕ ದೂರ
ನಗರದಲ್ಲಿ'ಎ ವೈ 4.2' ಕೋವಿಡ್‌-19 ಪರಿವರ್ತಿತ ವೈರಾಣುವಿನ ಎರಡು ಪ್ರಕರಣಗಳು ಪತ್ತೆಯಾಗಿದ್ದು, ಸಂಭಾವ್ಯ ಮೂರನೇ ಅಲೆಯ ಬಗ್ಗೆ ಆತಂಕ ಉಂಟು ಮಾಡಿತ್ತು. ಆದಾಗ್ಯೂ, ಈ ವರ್ಷದ ಜುಲೈನಲ್ಲಿ ಜೀನೋಮ್‌ ಸೀಕ್ವೆನ್ಸಿಂಗ್‌ ಮಾಡಲಾಗಿದ್ದು, ಈ ತಳಿಯ ಕೋವಿಡ್‌ ವೈರಸ್‌ನಿಂದ ಯಾವುದೇ ತೀವ್ರ ಪರಿಣಾಮ ಉಂಟಾಗುವುದಿಲ್ಲ ಎಂದು ತಜ್ಞರು ತಿಳಿಸಿದ್ದಾರೆ.
ಮೊದಲ ಡೋಸ್‌ ಲಸಿಕೆ ಪಡೆದ ಶೇ.86 ಮಂದಿ
ಅಕ್ಟೋಬರ್‌ವರೆಗೆ ನಗರದಲ್ಲಿ ದಾಖಲೆಯ 1.5 ಕೋಟಿ ಡೋಸ್‌ ಕೋವಿಡ್‌ ಲಸಿಕೆ ನೀಡಲಾಗಿದೆ. ಸದ್ಯ, ಇಬ್ಬರು ಬೆಂಗಳೂರಿಗರ ಪೈಕಿ ಒಬ್ಬರು ಎರಡೂ ಡೋಸ್‌ ಲಸಿಕೆ ಹಾಕಿಸಿಕೊಂಡಿದ್ದಾರೆ. ದಾಖಲೆಯ ಪ್ರಕಾರ, ನಗರದಲ್ಲಿ 18 ವರ್ಷ ಮೇಲ್ಪಟ್ಟ ಶೇ.52ರಷ್ಟು ಮಂದಿ ಎರಡೂ ಡೋಸ್‌ ಲಸಿಕೆ ಪಡೆದಿದ್ದು, ಶೇ.86ರಷ್ಟು ಮಂದಿ ಮೊದಲ ಡೋಸ್‌ ಲಸಿಕೆ ಪಡೆದಿದ್ದಾರೆ.
