ನಕಲಿ ಜಾಬ್‌ ವೆಬ್‌ಸೈಟ್‌ಗಳಿವೆ ಎಚ್ಚರ..! ನೇಮಕಾತಿ ವೇಳೆ ಯಾವ ಕಂಪನಿಯೂ ಹಣ ಕೇಳಲ್ಲ..!
ನಿಜವಾದ ಯಾವುದೇ ಕಂಪನಿಗಳು ಉದ್ಯೋಗಿಗಳನ್ನು ನೇಮಕ ಮಾಡಿಕೊಳ್ಳುವಾಗ ಹಣ ಕೇಳುವುದಿಲ್ಲ. ಈ ರೀತಿ ಹಣ ಕೇಳುವ ಕಂಪನಿಗಳನ್ನು ವಂಚಕರೆಂದೇ ಪರಿಗಣಿಸಿ. ಇಂತವರಿಂದ ದೂರವಿರಿ ಅಥವಾ ಸತ್ಯಾಸತ್ಯತೆಯನ್ನು ಪರಿಶೀಲಿಸಲು ಸ್ಥಳೀಯ ಪೊಲೀಸರಿಗೆ ಮಾಹಿತಿ ನೀಡಿರಿ.
Admin
0
3
: ಕೇಂದ್ರ ಸರಕಾರದ ವಿವಿಧ ಸಂಸ್ಥೆಗಳಲ್ಲಿ ಕೆಲಸ ಖಾಲಿ ಇದೆ ಎಂದು ಉದ್ಯೋಗಾಂಕ್ಷಿಗಳನ್ನು ದಾರಿ ತಪ್ಪಿಸಿ ವಂಚಿಸುವ ವೆಬ್‌ಸೈಟ್‌ಗಳ ಕುರಿತು ಜನರು ಎಚ್ಚರಿಕೆಯಿಂದಿರಬೇಕು ಎಂದು ರಾಷ್ಟ್ರೀಯ ಸಂಸ್ಥೆ (ಎನ್‌ಆರ್‌ಎ) ಸಲಹೆ ನೀಡಿದೆ. ಇತ್ತೀಚೆಗೆ ಎನ್‌ಆರ್‌ಎಯು ತನ್ನ ಅಧಿಕೃತ ವೆಬ್‌ಸೈಟ್‌ ಬಿಡುಗಡೆ ಮಾಡಿದ್ದು, ಈ ಸಂದರ್ಭದಲ್ಲಿ ಈ ಸಲಹೆ ನೀಡಿದೆ.
ಕೇಂದ್ರ ಸರಕಾರದ ನೇಮಕಾತಿಗೆ ಸಂಬಂಧಪಟ್ಟಂತೆ ಆನ್‌ಲೈನ್‌ ಪರೀಕ್ಷೆ ನಡೆಸಲು ಈ ನೂತನ ವೆಬ್‌ಸೈಟ್‌ ಬಳಕೆಯಾಗಲಿದೆ. ಇಂಟರ್‌ನೆಟ್‌ನಲ್ಲಿಂದು ನಕಲಿ ಉದ್ಯೋಗದ ಆಫರ್‌ಗಳಿಂದ ಸಾಕಷ್ಟು ಜನರು ಹೋಗುತ್ತಿದ್ದಾರೆ. ಫೇಕ್‌ ವೆಬ್‌ಸೈಟ್‌ಗಳು, ನಕಲಿ ಯೂಟ್ಯೂಬ್‌ ಚಾನೆಲ್‌ಗಳ ಮೂಲಕ ಅಭ್ಯರ್ಥಿಗಳನ್ನು ವಂಚಿಸಲಾಗುತ್ತಿದೆ. ಎನ್‌ಆರ್‌ಎ ಹೆಸರಿನಲ್ಲಿ ಅಥವಾ ಇನ್ಯಾವುದೋ ಸರಕಾರದ ಇಲಾಖೆ, ಸಂಸ್ಥೆಯ ಹೆಸರಿನಲ್ಲಿ ನಕಲಿ ವೆಬ್‌ಸೈಟ್‌ಗಳನ್ನು ವಂಚಕರು ನಿರ್ಮಿಸುತ್ತಾರೆ. ಇಂತಹ ಸಮಯದಲ್ಲಿ ಅಭ್ಯರ್ಥಿಗಳು ಸತ್ಯಾಸತ್ಯಾತೆಯನ್ನು ಪರಿಶೀಲಿಸಿ ಮುಂದುವರಿಯಬೇಕು ಎಂದು ಎನ್‌ಆರ್‌ಎ ತಿಳಿಸಿದೆ.
ರಾಷ್ಟ್ರೀಯ ನೇಮಕಾತಿ ಸಂಸ್ಥೆ (ಎನ್‌ಆರ್‌ಎ)ಯು ಅಧಿಕೃತ ವೆಬ್‌ಸೈಟ್‌ ಹೊಂದಿದೆ. ಆದರೆ, ಎನ್‌ಆರ್‌ಎ ಹೆಸರಿನಲ್ಲಿ ಹಲವು ನಕಲಿ ವೆಬ್‌ಸೈಟ್‌ಗಳಿವೆ. ಇಂತಹ ಫೇಕ್‌ ಜಾಹೀರಾತು / ವೆಬ್‌ಸೈಟ್‌ಗಳು / ವಿಡಿಯೋಗಳ ಕುರಿತು ಎಚ್ಚರ ವಹಿಸಬೇಕು. ನಕಲಿ ವೆಬ್‌ಗಳ ಕುರಿತು ಸರಕಾರಕ್ಕೆ ಮಾಹಿತಿ ದೊರಕಿದ ತಕ್ಷಣ ಕ್ರಮಕೈಗೊಳ್ಳಲಾಗುತ್ತದೆ ಎಂದು ಎನ್‌ಆರ್‌ಎ ತಿಳಿಸಿದೆ.
ಎನ್‌ಆರ್‌ಎಯು ಸರಕಾರದ ವಿವಿಧ ಇಲಾಖೆ, ಸಚಿವಾಲಯಗಳಲ್ಲಿನ ಖಾಲಿ ಹುದ್ದೆಗಳನ್ನು ಭರ್ತಿ ಮಾಡಲು ಏಕ ಸಾಮಾನ್ಯ ಪ್ರವೇಶ ಪರೀಕ್ಷೆ (ಸಿಇಟಿ) ನಡೆಸಲಿದೆ.
ಸರಕಾರದ ಉದ್ಯೋಗ ಮಾತ್ರವಲ್ಲದೆ ಪ್ರಮುಖ ಖಾಸಗಿ ಕಂಪನಿಗಳ ಹೆಸರಿನಲ್ಲಿಯೂ ಉದ್ಯೋಗ ವಂಚನೆ ಹೆಚ್ಚಾಗುತ್ತಿದೆ. ಇನ್ಫೋಸಿಸ್‌, ವಿಪ್ರೊ, ಐಬಿಎಂ ಇತ್ಯಾದಿ ಕಂಪನಿಗಳ ಹೆಸರಿನಲ್ಲಿ ಉದ್ಯೋಗದ ಆಫರ್‌ ನೀಡಿ ಜನರನ್ನು ವಂಚಿಸಿದ ಹಲವು ಪ್ರಕರಣಗಳು ಬೆಳಕಿಗೆ ಬಂದಿವೆ.
'ಕೊರೊನಾ ಸಾಂಕ್ರಾಮಿಕದ ಬಳಿಕ ಹಣ ಮಾಡಲು ಜನರು ಸಾಕಷ್ಟು ಹೊಸ ಟ್ರಿಕ್ಸ್‌ಗಳನ್ನು ಬಳಸಿಕೊಳ್ಳುತ್ತಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ಜಾಬ್‌ ಸ್ಕ್ಯಾ‌ಮ್‌ ಹೆಚ್ಚಾಗಿದ್ದು, ಉದ್ಯೋಗಾಕಾಂಕ್ಷಿಗಳು ಎಚ್ಚರದಿಂದ ಇರಬೇಕು. ಯಾವುದೇ ಕಂಪನಿಯು ಉದ್ಯೋಗಕ್ಕಾಗಿ ಹಣ ಕೇಳುವುದಿಲ್ಲ. ಯಾರೇ ನಿಮ್ಮಲ್ಲಿ ಉದ್ಯೋಗದ ಹೆಸರಿನಲ್ಲಿ ಹಣ ಕೇಳಿದರೂ ಅದನ್ನು ಜಾಬ್‌ ಸ್ಕ್ಯಾ‌ಮ್‌ ಎಂದೇ ತಿಳಿಯಿರಿ' ಎಂದು ಬೆಂಗಳೂರಿನ ಸೈಬರ್‌ ಸೆಕ್ಯುರಿಟಿ ವಿಭಾಗದ ಅಧಿಕಾರಿಯೊಬ್ಬರು ಸಲಹೆ ನೀಡಿದ್ದಾರೆ.
ಮೋಸ ಹೋಗಬೇಡಿ
* ಪ್ರತಿಯೊಬ್ಬ ಉದ್ಯೋಗ ವಂಚಕರ ಮೊದಲ ಗುರಿ ಹಣ ಸಂಪಾದಿಸುವುದು. ಇದಕ್ಕಾಗಿ ಅವರಿಗಿರುವ ದಾರಿ ಅಭ್ಯರ್ಥಿಗಳಿಂದ ಹಣ ಕೀಳುವುದು. ತರಬೇತಿಯ ಹೆಸರಲ್ಲಿ ಹಣ ಕೀಳಬಹುದು. ಅಥವಾ ಉದ್ಯೋಗ ನೇಮಕ ಪ್ರಕ್ರಿಯೆ ಆರಂಭಿಸಲು ಇಂತಿಷ್ಟು ಪಾವತಿಸುವುದು ಅವಶ್ಯ ಎಂದು ಹೇಳಿ ಹಣ ತೆಗೆದುಕೊಳ್ಳಬಹುದು. ನೆನಪಿಡಿ, ನಿಜವಾದ ಯಾವುದೇ ಕಂಪನಿಗಳು ಉದ್ಯೋಗಿಗಳನ್ನು ನೇಮಕ ಮಾಡಿಕೊಳ್ಳುವಾಗ ಹಣ ಕೇಳುವುದಿಲ್ಲ. ಈ ರೀತಿ ಹಣ ಕೇಳುವ ಕಂಪನಿಗಳನ್ನು ವಂಚಕರೆಂದೇ ಪರಿಗಣಿಸಿ. ಇಂತವರಿಂದ ದೂರವಿರಿ ಅಥವಾ ಸತ್ಯಾಸತ್ಯತೆಯನ್ನು ಪರಿಶೀಲಿಸಲು ಸ್ಥಳೀಯ ಪೊಲೀಸರಿಗೆ ಮಾಹಿತಿ ನೀಡಿರಿ.
* ಈಗಾಗಲೇ ಜನಪ್ರಿಯವಾಗಿರುವ ಪ್ರಮುಖ ಜಾಬ್‌ ಪೋರ್ಟಲ್‌ಗಳಲ್ಲಿ ಮಾತ್ರ ರೆಸ್ಯುಮೆ ಪೋಸ್ಟ್‌ ಮಾಡಿ. ಅಂತಹ ಪೋರ್ಟಲ್‌ಗಳು ಇಂತಹ ಫೇಕ್‌ ಕಂಪನಿಗಳ ಬಗ್ಗೆ ನಿಗಾ ಇಡುವ ವ್ಯವಸ್ಥೆಯನ್ನು ಹೊಂದಿರುತ್ತವೆ. ಹಾಗೆಂದು ಇಂತಹ ತಾಣಗಳೂ ಶೇಕಡ 100ರಷ್ಟು ಸುರಕ್ಷಿತವಾಗಿರುವುದಿಲ್ಲವೆನ್ನುವುದನ್ನು ನೆನಪಿನಲ್ಲಿಡಿ.
* ಮಧ್ಯವರ್ತಿಗಳನ್ನು ನಂಬಬೇಡಿ. ಅವರು ಹಣ ಮಾಡುವ ಉದ್ದೇಶದಿಂದಲೇ ಮುಗ್ಧರನ್ನು ಹುಡುಕುತ್ತಿರುತ್ತಾರೆ. ಇಷ್ಟು ಹಣ ಕೊಟ್ಟರೆ ಉದ್ಯೋಗ ಮಾಡಿಕೊಡುತ್ತೇನೆ ಎನ್ನುವವರೆಲ್ಲ ಕಳ್ಳರೇ ಆಗಿರುತ್ತಾರೆ. ಯಾವುದೇ ಕಂಪನಿಯು ಹಿಂಬಾಗಿಲಿನ ಮೂಲಕ ಅಭ್ಯರ್ಥಿಗಳನ್ನು ಪ್ರವೇಶಿಸಲು ಅವಕಾಶ ನೀಡುವುದಿಲ್ಲ.
