ತಿಂಗಳಲ್ಲಿ 12ನೇ ಬಾರಿಗೆ ತೈಲ ದರ ಏರಿಕೆ, ಬೆಂಗಳೂರಿನಲ್ಲೂ ರೂ. 100ರತ್ತ ಪೆಟ್ರೋಲ್‌ ದರ

ಬೆಂಗಳೂರು: ಸರಕಾರಿ ಸ್ವಾಮ್ಯದ ತೈಲ ಮಾರಾಟ ಕಂಪನಿಗಳು ಭಾನುವಾರ ಮತ್ತೆ ಪೆಟ್ರೋಲ್‌ ಮತ್ತು ಡೀಸೆಲ್‌ ದರ ಏರಿಕೆ ಮಾಡಿವೆ. ಈ ಮೂಲಕ ಮೇ ತಿಂಗಳೊಂದರಲ್ಲೇ ತೈಲ ದರಗಳು 12ನೇ ಬಾರಿಗೆ ಏರಿಕೆಯಾದಂತಾಗಿದೆ. ಪರಿಣಾಮ ಪೆಟ್ರೋಲ್‌, ಡೀಸೆಲ್‌ ಬೆಲೆ ದಾಖಲೆ ಮಟ್ಟಕ್ಕೆ ತಲುಪಿದೆ.ಇಂಡಿಯನ್‌ ಆಯಿಲ್‌ ಪೆಟ್ರೋಲ್‌ ದರ ಭಾನುವಾರ 17 ಪೈಸೆ ಏರಿಕೆಯಾಗಿದ್ದರೆ, ಡೀಸೆಲ್‌ ದರ 29 ಪೈಸೆ ಹೆಚ್ಚಳವಾಗಿದೆ. ಪರಿಣಾಮ ರಾಷ್ಟ್ರ ರಾಜಧಾನಿಯಲ್ಲಿ ಪೆಟ್ರೋಲ್‌ ಬೆಲೆ ಲೀಟರ್‌ಗೆ 93.21 ರೂ.ಗೆ, ಡೀಸೆಲ್‌ ದರ ಲೀಟರ್‌ಗೆ 84.07 ರೂ.ಗೆ ಹೆಚ್ಚಳವಾಗಿದೆ.ಮುಂಬಯಿನಲ್ಲಂತೂ ಪೆಟ್ರೋಲ್‌ ದರ ನೂರರ ಅಂಚಿಗೆ (99.49 ರೂ.) ತಲುಪಿದೆ. ಡೀಸೆಲ್‌ ದರ 91.30 ರೂ.ಗೆ ಹೆಚ್ಚಳವಾಗಿದೆ.ರಾಜಸ್ಥಾನ, ಮಧ್ಯ ಪ್ರದೇಶ, ಮಹಾರಾಷ್ಟ್ರದ ಹಲವು ಪ್ರದೇಶಗಳಲ್ಲಿ ಈಗಾಗಲೇ ಪೆಟ್ರೋಲ್‌ ದರ ಸೆಂಚುರಿ ದಾಟಿ ಮುನ್ನುಗ್ಗುತ್ತಿದೆ. ಜೈಸಲ್ಮೇರ್‌, ಬನ್ಸ್ವಾರ, ಅನುಪ್ಪುರ್‌, ಇಂದೋರ್‌, ಭೋಪಾಲ್‌, ಗ್ವಾಲಿಯರ್‌, ರೇವಾ, ರತ್ನಗಿರಿ, ಔರಂಗದಾಬಾದ್‌ ಮತ್ತು ಪರ್ಭಾನಿ ಈ ಪಟ್ಟಿಯಲ್ಲಿವೆ. ರಾಜಸ್ಥಾನದ ಶ್ರೀ ಗಂಗಾನಗರದಲ್ಲಂತೂ ಪೆಟ್ರೋಲ್‌ ವೆಲೆ 104.18 ರೂ.ಗೆ ತಲುಪಿದೆ. ಇದೀಗ ಮುಂಬಯಿ ಸೇರಿ ಹಲವು ನಗರಗಳಲ್ಲಿ ಪೆಟ್ರೋಲ್‌ ಬೆಲೆ 100ರ ಅಂಚಿಗೆ ತಲುಪಿದೆ, ಥಾಣೆ, ಜೈಪುರ, ಕೊಲ್ಹಾಪುರ ಮತ್ತು ನಾಸಿಕ್‌ ಈ ಸಾಲಿನಲ್ಲಿವೆ. ಬೆಂಗಳೂರಿನಲ್ಲಿ ಸೆಂಚುರಿಗೆ ಇನ್ನೂ 3.69 ಪೈಸೆ ಬಾಕಿಬೆಂಗಳೂರಿನಲ್ಲಿ ಭಾನುವಾರ ಪೆಟ್ರೋಲ್‌ ದರ 20 ಪೈಸೆ ಏರಿಕೆಯಾಗಿದ್ದು 96.31 ರೂಪಾಯಿಗೆ ಮುಟ್ಟಿದೆ. ಪೆಟ್ರೋಲ್‌ ಬೆಲೆ ಸೆಂಚುರಿ ಮುಟ್ಟಲು ಇನ್ನು ಕೇವಲ 3.69 ಪೈಸೆ ಅಷ್ಟೇ ಬಾಕಿ ಇದೆ. ಬಹುಶಃ ಇದೇ ವೇಗದಲ್ಲಿ ಬೆಲೆ ಹೆಚ್ಚಳವಾಗುತ್ತಿದ್ದರೆ ಇನ್ನೊಂದು ತಿಂಗಳಲ್ಲಿ ಕರ್ನಾಟಕ ರಾಜಧಾನಿಯಲ್ಲೂ ಪೆಟ್ರೋಲ್‌ ದರ ಶತಕ ಬಾರಿಸಲಿದೆ.ಇನ್ನು ಡೀಸೆಲ್‌ ದರ ಭಾನುವಾರ 28 ಪೈಸೆ ಏರಿಕೆಯಾಗಿದ್ದು, 89.12 ರೂಗೆ ತಲುಪಿದೆ. ಡೀಸೆಲ್‌ ಬೆಲೆ 90ರ ಅಂಚಿಗೆ ಮುಟ್ಟಿದೆ.ದೇಶದ ಪ್ರಮುಖ ನಗರಗಳಲ್ಲಿ ಪೆಟ್ರೋಲ್‌, ಡೀಸೆಲ್‌ ದರ ಹೀಗಿದೆ,

ನಗರ	ಪೆಟ್ರೋಲ್‌	ಡೀಸೆಲ್‌
ದಿಲ್ಲಿ	93.21	84.07
ಮುಂಬಯಿ	99.49	91.30
ಚೆನ್ನೈ	94.86	88.87
ಕೋಲ್ಕೊತ್ತಾ	93.27	86.91
ಬೆಂಗಳೂರು	96.31	89.12