ಕಾವೇರಿ ನದಿಯಲ್ಲಿ ಪುನೀತ್‌ ರಾಜ್‌ಕುಮಾರ್‌ಗೆ ತರ್ಪಣ ಬಿಟ್ಟ ನಟ ವಿನೋದ್ ರಾಜ್

'ಕರುನಾಡಿನ ಮನೆ ಮಗ', ಅಭಿಮಾನಿಗಳ ಪ್ರೀತಿಯ ಅಪ್ಪು, ಪವರ್ ಸ್ಟಾರ್ ನಮ್ಮೊಂದಿಗೆ ಇಲ್ಲವಾಗಿ 11 ದಿನಗಳೇ ಕಳೆದಿವೆ. ಇಂದು ದೊಡ್ಮನೆ ಕುಟುಂಬ ಪುನೀತ್ ಅವರ 11ನೇ ದಿನದ ಕಾರ್ಯಗಳನ್ನು ಮಾಡಿದೆ. ಕಂಠೀರವ ಸ್ಟುಡಿಯೋದಲ್ಲಿರುವ ಪುನೀತ್ ಸಮಾಧಿಗೆ ಪೂಜೆ ಸಲ್ಲಿಸಿ, ನಂತರ ಮನೆಯಲ್ಲೂ ಪೂಜೆಯನ್ನು ಮಾಡಿದೆ. ಈ ಮಧ್ಯೆ ಹಿರಿಯ ನಟಿ ಲೀಲಾವತಿ ಮತ್ತು ಅವರ ಪುತ್ರ ಅವರು ಪುನೀತ್ ಆತ್ಮಕ್ಕೆ ಸದ್ಗತಿ ಸಿಗಲೆಂದು ಶ್ರೀರಂಗಪಟ್ಟಣದ ಗಂಜಾಮ್ ಸಮೀಪವಿರುವ ಕಾವೇರಿ ನದಿಯ ಸಂಗಮದಲ್ಲಿ ಚಿತ್ರ ನಟಿ ಲೀಲಾವತಿ ಪುತ್ರ ವಿನೋದ್ ರಾಜ್ ಅವರು ಅಗಲಿದ ಪುನೀತ್‌ಗೆ ತರ್ಪಣ ಬಿಟ್ಟು ವೈದಿಕ ಕ್ರಿಯಾಕರ್ಮ ನೆರವೇರಿಸಿದ್ದಾರೆ. ಹೌದು, ಅತ್ತ ಬೆಂಗಳೂರಿನಲ್ಲಿ ಪುನೀತ್ ರಾಜ್‌ಕುಮಾರ್ ಅವರ 11ನೇ ದಿನದ ಪುಣ್ಯತಿಥಿಯನ್ನು ರಾಜ್‌ಕುಮಾರ್‌ ಕುಟುಂಬಸ್ಥರು ಕಂಠೀರವ ಸ್ಟುಡಿಯೋ ಹಾಗೂ ಪುನೀತ್‌ ನಿವಾಸದಲ್ಲಿ ನಡೆಸುತ್ತಿದ್ದರೆ, ಇತ್ತ ವಿನೋದ್ ರಾಜ್ ಅವರು ತಮ್ಮ ತಾಯಿ ಲೀಲಾವತಿ ಹಾಗೂ ಕುಟುಂಬದ ಆಪ್ತವರ್ಗದವರ ಜೊತೆ ಶ್ರೀರಂಗಪಟ್ಟಣದ ಕಾವೇರಿ ತೀರ ಸಂಗಮದಲ್ಲಿ ಪುನೀತ್ ರಾಜ್ ಕುಮಾರ್ ಆತ್ಮಕ್ಕೆ ಶಾಂತಿ ಕೋರಿ ತರ್ಪಣ ಅರ್ಪಿಸಿ ವೈದಿಕ ಕ್ರಿಯಾ ಕರ್ಮದ ಪೂಜೆ ನೆರವೇರಿಸಿದ್ದಾರೆ. ಎರಡು ಕಾರಿನಲ್ಲಿ ಸಂಗಮಕ್ಕೆ ಬಂದಿದ್ದ ಲೀಲಾವತಿ ಹಾಗೂ‌ ವಿನೋದ್ ರಾಜ್ ಸೇರಿ ಅವರ ಆಪ್ತ ಕುಟುಂಬ ವರ್ಗದವರು ಸಂಗಮದಲ್ಲಿ ಪುನೀತ್‌ ಆತ್ಮದ ಶಾಂತಿಗಾಗಿ ಅರ್ಚಕ ದೇವರಾಜ್ ಶರ್ಮಾರಿಂದ ಆಶ್ಲೇಷ ಬಲಿ, ನಾರಾಯಣ ಬಲಿ ಪೂಜೆ, ಹೋಮ ನಡೆಸಿದರು. ಬಳಿಕ ಕಾವೇರಿ ನದಿಯಲ್ಲಿ ತರ್ಪಣ ಅರ್ಪಿಸಿ ಪುನೀತ್ ಆತ್ಮಕ್ಕೆ ಶಾಂತಿಕೋರಿದ್ದಾರೆ ವಿನೋದ್‌ ರಾಜ್‌. ಪುನೀತ್ ನಿಧನರಾದ ಸುದ್ದಿ ಕೇಳಿದಾಗ ವಿನೋದ್ ರಾಜ್ ಮತ್ತು ಲೀಲಾವತಿ ತುಂಬ ಭಾವುಕರಾಗಿದ್ದರು. ಪುನೀತ್ ನಿಧನರಾದಾಗ ಕಣ್ಣೀರಿಟ್ಟು ಮಾತನಾಡಿದ್ದ ವಿನೋದ್ ರಾಜ್, 'ಹೊಟ್ಟೆ ಉರಿದು ಹೋಗುತ್ತಿದೆ. ಆ ಮಗುಗೆ ದೇವರು ಈ ತರಹ ಮಾಡಬಹುದಾ? ಅಪ್ಪು ಮಗು ತರಹವೇ.. ಅವರದ್ದು ತುಂಬಾ ವಿಶೇಷವಾದ ಜನ್ಮ. ಆ ಸ್ಥಾನವನ್ನು ಯಾರೂ ತುಂಬಲು ಸಾಧ್ಯವಿಲ್ಲ. ಇಡೀ ಮನೆಗೆ ಬೆಳಕಾದ ರವಿ ಅವರು. ಇವತ್ತು ಅದೇ ರವಿಯ ಕಿರಣಗಳು ಮುಚ್ಚಿ ಹೋದವು. ಮತ್ತೆ ಉದಯ ಆಗುವುದಿಲ್ಲವೇ ಎನ್ನುವಂಥದ್ದೇ ಶಾಕಿಂಗ್ ಆಗಿದೆ. ನನಗೆ ನಂಬೋದಕ್ಕೆ ಸಾಧ್ಯವಾಗುತ್ತಿಲ್ಲ. ನನ್ನ ತಾಯಿಗೂ ಕೂಡ ಆಘಾತವಾಗಿದೆ. ಕನ್ನಡದ ಕಲಾವಿದರ ಮೇಲೆ ದೇವರಿಗೆ ಯಾಕೆ ಇಷ್ಟೊಂದು ಬೇಸರ? ಯಾಕೆ ಈ ತರಹ ಆಗುತ್ತಿದೆ? ತುಂಬಾ ನೋವಾಗುತ್ತಿದೆ. ನನ್ನ ಎದೆ ಚೂರಾಗಿದೆ. ಸಹಿಸಿಕೊಳ್ಳಲು ಆಗುತ್ತಿಲ್ಲ. ನನಗೆ ಇವತ್ತು ದೇವರ ಮೇಲೆ ಇದ್ದ ನಂಬಿಕೆ ಹೊರಟು ಹೋಯ್ತು. ದೇವರು ಮಹಾನ್ ಕ್ರೂರಿ. ಅದೇ ಸತ್ಯ. ನಮಗೆಲ್ಲಾ ನೋವು ತುಂಬಿಸಿ ಅಪ್ಪು ಹೋಗಿಬಿಟ್ಟರು' ಎಂದು ಹೇಳಿದ್ದರು.