ಕೇರಳದಲ್ಲಿ ಶುಕ್ರವಾರ, ಶನಿವಾರ ಕೊರೊನಾ ಪರೀಕ್ಷಾ ಅಭಿಯಾನ: 2 ದಿನದಲ್ಲಿ 2.5 ಲಕ್ಷ ಮಂದಿಗೆ ಟೆಸ್ಟ್‌ ಟಾರ್ಗೆಟ್..!

ಕಾಸರಗೋಡು (): ಕೇರಳದಲ್ಲಿ ಏಪ್ರಿಲ್ 16 ಹಾಗೂ 17 ರಂದು ಎರಡೂವರೆ ಲಕ್ಷ ಮಂದಿಗೆ ಕೋವಿಡ್‌ ಟೆಸ್ಟ್‌ ನಡೆಸಲು ತೀರ್ಮಾನಿಸಲಾಗಿದೆ. ತಿರುವನಂತಪುರದಲ್ಲಿ ಸಿಎಂ ಪಿಣರಾಯಿ ವಿಜಯನ್‌ ಅಧ್ಯಕ್ಷತೆಯಲ್ಲಿ ನಡೆದ ಕೋವಿಡ್‌ ಅವಲೋಕನಾ ಸಭೆಯಲ್ಲಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ರಾಜ್ಯಾದ್ಯಂತ ವ್ಯಾಪಕ ಪರಿಶೀಲನೆ, ನಿಯಂತ್ರಣ, ವ್ಯಾಕ್ಸಿನೇಶನ್‌ ಎಂಬ ಮೂರು ರೀತಿಯಲ್ಲಿ ಕೋವಿಡ್‌ ನಿಯಂತ್ರಿಸಲು ಪ್ರಯತ್ನಿಸಲಾಗುವುದು ಎಂದು ಸರ್ಕಾರ ತಿಳಿಸಿದೆ. ಚುನಾವಣೆ ಸಂದರ್ಭ ಸಕ್ರಿಯರಾದ ಎಲ್ಲರನ್ನೂ ಕೋವಿಡ್‌ ಟೆಸ್ಟ್‌ಗೊಳಪಡಿಸಲಾಗುವುದು. ಕೋವಿಡ್‌ ನಿಯಂತ್ರಣದಲ್ಲಿ ಭಾಗಿಯಾಗುವವರು, ಕೋವಿಡ್‌ ವ್ಯಾಪಕವಾಗಿ ಹರಡುವ ಪ್ರದೇಶದಲ್ಲಿರುವವರು, ಹೆಚ್ಚಿನ ಜನರನ್ನು ಸಂಪರ್ಕಿಸುವ ಸಾರ್ವಜನಿಕ ವಲಯ, ಹಾಸ್ಪಿಟಾಲಿಟಿ, ಪ್ರವಾಸೋದ್ಯಮ, ಅಂಗಡಿ, ಹೋಟೆಲ್‌, ಮಾರ್ಕೆಟ್‌, ಸೇವಾ ಕೇಂದ್ರಗಳಲ್ಲಿ ಕೆಲಸ ಮಾಡುವವರು, ಡೆಲಿವರಿ ಎಕ್ಸಿಕ್ಯೂಟಿವ್ಸ್ ಮುಂತಾದವರನ್ನು ಪತ್ತೆ ಹಚ್ಚಿ ಟೆಸ್ಟ್‌ಗೊಳಪಡಿಸಲು ತೀರ್ಮಾನಿಸಲಾಗಿದೆ. ಮುಂದಿನ ಎರಡು ವಾರಗಳಲ್ಲಿ ನಿಯಂತ್ರಣಕ್ಕೆ ಬೇಕಾಗಿರುವ ಎಲ್ಲ ಸೌಕರ‍್ಯಗಳನ್ನು ಏರ್ಪಡಿಸಲಾಗುವುದು. ಎಸ್ಸೆಸ್ಸೆಲ್ಸಿ ಹಾಗೂ ಪ್ಲಸ್‌ಟು ನಡೆಯುವುದರಿಂದ ವಿದ್ಯಾರ್ಥಿಗಳಿಗೆ ಬೇಕಾದ ಸೌಕರ‍್ಯ ಏರ್ಪಡಿಸಲಾಗುವುದು. ಮಾಲ್‌ಗಳು, ಮಾರ್ಕೆಟ್‌ಗಳಲ್ಲಿ ನಿಯಂತ್ರಣ ಅಗತ್ಯವಾಗಿದೆ. ಎಲ್ಲರೂ ದೈಹಿಕ ಅಂತರ ಪಾಲಿಸಬೇಕು, ಉತ್ಸವಗಳು, ಮತ ಪರವಾದ ಕಾರ್ಯಕ್ರಮಗಳಲ್ಲಿ ಜನರು ಗುಂಪಾಗಿ ಸೇರದಂತೆ ಎಚ್ಚರಿಕೆ ವಹಿಸಬೇಕು, ಇದಕ್ಕಾಗಿ ಮತ ಪಂಡಿತರ, ವ್ಯಾಪಾರಿಗಳ, ಸಂಘಟನೆಗಳ ಪ್ರತಿನಿಗಳ ಸಭೆಯನ್ನು ಕರೆಯಲು ತೀರ್ಮಾನಿಸಲಾಗಿದೆ. ಕೋವಿಡ್‌ ಅವಲೋಕನಾ ಸಭೆಯಲ್ಲಿ ಆರೋಗ್ಯ ಸಚಿವೆ ಕೆ.ಕೆ. ಶೈಲಜಾ, ಮುಖ್ಯ ಕಾರ‍್ಯದರ್ಶಿ ವಿ.ಪಿ. ಜೋಯ್‌, ರಾಜ್ಯ ಪೊಲೀಸ್‌ ವರಿಷ್ಠಾಕಾರಿ ಲೋಕನಾಥ್‌ ಬೆಹ್ರಾ, ಸಂಬಂಧಪಟ್ಟ ಇಲಾಖೆಗಳ ಕಾರ‍್ಯದರ್ಶಿಗಳು, ಜಿಲ್ಲಾಧಿಕಾರಿಗಳು, ಜಿಲ್ಲಾ ಪೊಲೀಸ್‌ ಮುಖ್ಯಸ್ಥರು, ಜಿಲ್ಲಾ ವೈದ್ಯಾಧಿಕಾರಿಗಳು ಭಾಗವಹಿಸಿದ್ದರು.