ಮಳೆಯಿಂದಾಗಿ ತರಕಾರಿ ದರದಲ್ಲಿ ಏರಿಳಿತ: ಕೊತ್ತಂಬರಿ ದರ ಹೆಚ್ಚಳ, ಬೀನ್ಸ್‌ ರೇಟ್ ಡೌನ್
ಉಳಿದಂತೆ ಆಷಾಢ ಮಾಸದ ಹಿನ್ನೆಲೆಯಲ್ಲಿ ಶುಭ ಕಾರ್ಯಕ್ರಮಗಳು ನಡೆಯುತ್ತಿಲ್ಲ. ಹೀಗಾಗಿ ತರಕಾರಿಗಳಿಗೆ ಸ್ವಲ್ಪ ಬೇಡಿಕೆ ಕಡಿಮೆಯಾದರೂ ಹೋಟೆಲ್‌, ರೆಸ್ಟೋರೆಂಟ್‌ ಇತ್ಯಾದಿಗಳನ್ನು ತೆರೆದಿರುವುದರಿಂದ ಬೇಡಿಕೆಯಿದೆ.
Admin
0
9
: ಮಳೆಯಿಂದಾಗಿ ನಗರದಲ್ಲಿ ಕೊತ್ತಂಬರಿ ಸೊಪ್ಪಿನ ಬೆಲೆ ಏರಿಕೆಯಾಗಿದ್ದು, ಧಾರಾಳವಾಗಿ ಬಳಸುತ್ತಿದ್ದ ಗೃಹಿಣಿಯರು ಚೌಕಾಸಿ ಮಾಡಿ ಬಳಸುವಂತಾಗಿದೆ. ಅಷ್ಟೇ ಅಲ್ಲ, ಕ್ಯಾರೆಟ್‌ ಮತ್ತಿತರ ಕೆಲವು ತರಕಾರಿಗಳ ದರವೂ ಏರಿಕೆಯಾಗಿದೆ. ಟೊಮೇಟೊ ಸ್ವಲ್ಪ ಏರಿಕೆಯಾಗಿದ್ದು, 12 ರೂ. ಇದ್ದುದು 16 ರೂ.ಗೆ ತಲುಪಿದೆ.
ಸಮಾಧಾನದ ಸಂಗತಿಯೆಂದರೆ ಹಾಪ್‌ಕಾಮ್ಸ್‌ನಲ್ಲಿ ಕಳೆದ ತಿಂಗಳು ಕೆ.ಜಿ.ಗೆ 60 ರೂ. ಇದ್ದ ಬೀನ್ಸ್‌ ಇದೀಗ 48 ರೂ.ಗೆ ಇಳಿಕೆಯಾಗಿದೆ. ನುಗ್ಗೆಕಾಯಿ ಕೆ.ಜಿ.ಗೆ 100-120 ರೂ.ವರೆಗೆ ಇತ್ತು. ಇದೀಗ ಕೇವಲ 55 ರೂ.ಗೆ ಇಳಿಕೆಯಾಗಿದೆ. ಹೀಗಾಗಿ, ಕೆಲ ತರಕಾರಿಗಳು ಏರಿದರೆ, ಇನ್ನೂ ಕೆಲ ತರಕಾರಿಗಳು ಗ್ರಾಹಕರ ಕೈಗೆಟಕುವಂತಿವೆ.
ಕಳೆದ ಎರಡು ವಾರಗಳಿಂದ ನಿರಂತರವಾಗಿ ಸುರಿಯುತ್ತಿರುವುದರಿಂದ ಕೆಲವೆಡೆ ಬೆಳೆಗಳಿಗೆ ತೀವ್ರ ಪ್ರಮಾಣದಲ್ಲಿ ಹಾನಿಯಾಗಿದೆ. ಜತೆಗೆ ಮಳೆ ಬೀಳುತ್ತಿರುವುದರಿಂದ ರೈತರು ಮಾರುಕಟ್ಟೆಗೆ ತರಕಾರಿಗಳನ್ನು ಕಿತ್ತು ತರುವಲ್ಲಿ ತೊಡಕಾಗಿದೆ. ಕೂಲಿ ಕಾರ್ಮಿಕರ ಸಮಸ್ಯೆಯೂ ಇದೆ. ಹೀಗಾಗಿ ಕೆಲವು ತರಕಾರಿಗಳ ದರದಲ್ಲಿ ಏರಿಕೆಯಾಗಿದೆ.
ಉಳಿದಂತೆ ಆಷಾಢ ಮಾಸದ ಹಿನ್ನೆಲೆಯಲ್ಲಿ ಶುಭ ಕಾರ್ಯಕ್ರಮಗಳು ನಡೆಯುತ್ತಿಲ್ಲ. ಹೀಗಾಗಿ ತರಕಾರಿಗಳಿಗೆ ಸ್ವಲ್ಪ ಬೇಡಿಕೆ ಕಡಿಮೆಯಾದರೂ ಹೋಟೆಲ್‌, ರೆಸ್ಟೋರೆಂಟ್‌ ಇತ್ಯಾದಿಗಳನ್ನು ತೆರೆದಿರುವುದರಿಂದ ಬೇಡಿಕೆಯಿದೆ. ಹೀಗಾಗಿ, ಕ್ಯಾರೆಟ್‌, ಬೆಂಡೆಕಾಯಿ, ಬೀಟ್‌ರೂಟ್‌ ಮತ್ತಿತರ ತರಕಾರಿಗಳ ದರದಲ್ಲಿ ಸ್ವಲ್ಪ ಪ್ರಮಾಣದಲ್ಲಿ ಏರಿಕೆಯಾಗಿದೆ ಎನ್ನುತ್ತಾರೆ ಯಶವಂತಪುರ ಎಪಿಎಂಸಿ ಸಗಟು ತರಕಾರಿ ಮಾರಾಟಗಾರ ಶ್ರೀನಿವಾಸ್‌.
ಕೊತ್ತಂಬರಿ ಸೊಪ್ಪು ಕಂತೆಗೆ 20 ರೂ. ಇದ್ದುದು ಕಳೆದ ವಾರದಿಂದೀಚೆಗೆ 30 ರೂ.ಗೆ ಏರಿಕೆಯಾಗಿದೆ. ಹಾಪ್‌ಕಾಮ್ಸ್‌ನಲ್ಲಿ ಕೆ.ಜಿ.ಗೆ 65-70 ರೂ. ಇದ್ದುದು ಇದೀಗ 94 ರೂ.ಗೆ ಏರಿಕೆಯಾಗಿದೆ. ಸೊಪ್ಪು ಮತ್ತು ತರಕಾರಿಗಳು ಚಿಲ್ಲರೆ ದರದಲ್ಲಿ ಪ್ರದೇಶವಾರು ದರದಲ್ಲಿ ಏರುಪೇರು ಇರುತ್ತದೆ.
ಹಾಪ್‌ಕಾಮ್ಸ್‌ನಲ್ಲಿ ಹಣ್ಣು-ತರಕಾರಿ ದರ (ಕೆ.ಜಿ.ಗಳಲ್ಲಿ)
ಕೊತ್ತಂಬರಿ ಸೊಪ್ಪು 94 ರೂ.
ಬಿಳಿ ಬದನೆ 40 ರೂ.
ಬೀನ್ಸ್‌ 48 ರೂ.
ಬೀಟ್‌ರೂಟ್‌ 42 ರೂ.
ಹಾಗಲಕಾಯಿ 49 ರೂ.
ಸೌತೆಕಾಯಿ 20 ರೂ.
ದಪ್ಪ ಮೆಣಸಿನಕಾಯಿ 43 ರೂ.
ಹಸಿಮೆಣಸಿನಕಾಯಿ 50 ರೂ.
ಊಟಿ ಕ್ಯಾರಟ್‌ 90 ರೂ.
ನಾಟಿ ಕ್ಯಾರಟ್‌ 60 ರೂ.
ನುಗ್ಗೆಕಾಯಿ 55 ರೂ.
ಬೆಂಡೆಕಾಯಿ 45 ರೂ.
ನಿಂಬೆಹಣ್ಣು 45 ರೂ.
ಟೊಮೇಟೊ 16 ರೂ.
ಸೀತಾಫಲ 60 ರೂ.
ಏಲಕ್ಕಿ ಬಾಳೆ 56 ರೂ.
ಸೀಬೆ 67 ರೂ.
ದಾಳಿಂಬೆ ಬಾಗ್ವ 170 ರೂ.
ಪಪ್ಪಾಯ ಸೋಲಾ 40 ರೂ.
ಕಲ್ಲಂಗಡಿ ನಾಮಧಾರಿ, ಕಿರಣ್‌ -36 ರೂ.
