ಇಳಿಯುತ್ತಲೇ ಸಾಗಿದೆ ಪೇಟಿಎಂ ಷೇರು ದರ, ಮಾರುಕಟ್ಟೆ ಮೌಲ್ಯದಲ್ಲಿ 50,000 ಕೋಟಿ ರೂ. ಇಳಿಕೆ!

ಮುಂಬಯಿ: ಕಳೆದ ಗುರುವಾರ ಷೇರು ಮಾರುಕಟ್ಟೆ ಪ್ರವೇಶಿಸಿದ ನಂತರ ಪೇಟಿಎಂನ ಮಾರುಕಟ್ಟೆ ಮೌಲ್ಯ 56,233 ಕೋಟಿ ರೂ.ನಷ್ಟು ಇಳಿಕೆ ಕಂಡಿದೆ. ಷೇರು ಮಾರುಕಟ್ಟೆಗೆ ಪ್ರವೇಶಿಸಿದ ನಂತರ ಪೇಟಿಎಂನ ಷೇರು ಬೆಲೆ ಶೇ. 40ರಷ್ಟು ಇಳಿಕೆ ಕಂಡಿದ್ದು, 1,362 ರೂ.ಗೆ ಇಳಿಕೆ ಕಂಡಿದೆ. ಸೋಮವಾರ ಕೂಡ ಷೇರು ದರ 199 ರೂ. ಅಥವಾ ಶೇ. 12.74 ರಷ್ಟು ಇಳಿಕೆ ಕಂಡಿದೆ. ಒಂದು ಹಂತದಲ್ಲಿ 1,283 ರೂ.ಗೆ ಇಳಿಕೆ ಕಂಡಿತ್ತು. ನಂತರ ಅಲ್ಪ ಏರಿಕೆ ಕಂಡು 1362 ರೂ.ಗೆ ದಿನದ ವಹಿವಾಟು ಮುಗಿಸಿತು. ಷೇರಿಗೆ ಹೆಚ್ಚಿನ ಮೌಲ್ಯ ನಮೂದಿಸಿದ್ದೇ ಷೇರು ದರ ಈ ಪ್ರಮಾಣದಲ್ಲಿ ಇಳಿಕೆ ಕಾಣಲು ಪ್ರಮುಖ ಕಾರಣ ಎಂದು ವಿಶ್ಲೇಷಕರು ಹೇಳಿದ್ದಾರೆ. ನವೆಂಬರ್‌ 10ರಂದು ಅಂತ್ಯವಾಗಿತ್ತು. ಪೇಟಿಎಂನ ಷೇರುಗಳಿಗೆ 1.89 ಪಟ್ಟು ಹೆಚ್ಚಿನ ಜನರು ನೋಂದಾಯಿಸಿಕೊಂಡಿದ್ದರು. ಆದರೆ ಪೇಟಿಎಂನ ಆಸುಪಾಸಿನಲ್ಲೇ ಷೇರು ಮಾರುಕಟ್ಟೆ ಪ್ರವೇಶಿಸಿದ್ದ ನೈಕಾ ಮತ್ತು ಜೊಮ್ಯಾಟೋಗೆ ಇದಕ್ಕಿಂತ ಹೆಚ್ಚಿನ ಬೇಡಿಕೆ ಕಂಡು ಬಂದಿತ್ತು. ನೈಕಾ ಷೇರುಗಳಿಗೆ 82 ಪಟ್ಟು ಹೆಚ್ಚಿನ ಜನರು ಬಿಡ್‌ ಮಾಡಿದ್ದರೆ, ಜೊಮ್ಯಾಟೋಗೆ 38.25 ಪಟ್ಟು ಹೆಚ್ಚಿನ ಜನರು ಮುಗಿಬಿದ್ದಿದ್ದರು. ಪೇಟಿಎಂನ ಮಾತೃಸಂಸ್ಥೆ ಒನ್‌97 ಕಮ್ಯೂನಿಕೇಷನ್ಸ್‌ ಐಪಿಒದ ಮೂಲಕ 18,300 ಕೋಟಿ ರೂ. ಸಂಗ್ರಹಿಸಿತ್ತು. ಆದರೆ ಷೇರು ಮಾರುಕಟ್ಟೆಗೆ ಪ್ರವೇಶ ಪಡೆದ ಬೆನ್ನಲ್ಲೇ ಪೇಟಿಎಂ ಷೇರುಗಳ ಬೆಲೆ ಭಾರಿ ಕುಸಿತ ಕಂಡಿತ್ತು. ಆಫರ್‌ ಪ್ರೈಸ್‌ (ಕೊಡುಗೆ ಬೆಲೆ) ಹೆಚ್ಚಳಕ್ಕೆ ಹೂಡಿಕೆದಾರರು ತೀವ್ರ ಒತ್ತಡ ಹೇರಿದ್ದೇ ಇದಕ್ಕೆ ಕಾರಣ ಎಂಬ ಟೀಕೆ ಕೇಳಿ ಬಂದಿದೆ. ಪೇಟಿಎಂನ ಐಪಿಒವನ್ನು ಮೋರ್ಗಾನ್ ಸ್ಟಾನ್ಲಿ, ಗೋಲ್ಡ್‌ಮನ್ ಸ್ಯಾಚ್ಸ್ ಗ್ರೂಪ್ ಐಎನ್‌ಸಿ., ಜೆಪಿ ಮೋರ್ಗನ್‌ ಚೇಸ್‌ & ಕೊ., ಐಸಿಐಸಿಐ ಸೆಕ್ಯುರಿಟೀಸ್ ಲಿಮಿಟೆಡ್ ಮತ್ತು ಆಕ್ಸಿಸ್‌ ಕ್ಯಾಪಿಟಲ್‌ ಹೋಲ್ಡಿಂಗ್ಸ್‌ ಲಿ. ಸೇರಿದಂತೆ ಪ್ರಮುಖ ಬ್ಯಾಂಕ್‌ಗಳು ನಿರ್ವಹಿಸಿದ್ದವು. ಷೇರು ಮಾರುಕಟ್ಟೆಗೆ ಪೇಟಿಎಂ ಪ್ರವೇಶಿಸಿದ ದಿನವೇ ಪೇಟಿಎಂ ಸಂಸ್ಥೆಯನ್ನು ವಿಶ್ಲೇಷಣೆ ಮಾಡಿದ್ದ ವಿದೇಶಿ ಬ್ರೋಕರೇಜ್‌ ಸಂಸ್ಥೆ ಮ್ಯಾಕ್ವಾರಿ, ಸಂಸ್ಥೆಗೆ ಕಡಿಮೆ ಕಾರ್ಯಕ್ಷಮತೆಯ ರೇಟಿಂಗ್‌ ನೀಡಿತ್ತು. ಮತ್ತು ಹಂಚಿಕೆ ಬೆಲೆ 2,150 ರೂ.ಗೆ ಹೋಲಿಸಿದರೆ 1,200 ರೂ. ಗುರಿಯನ್ನು ನೀಡಿತ್ತು. ಇದು ಶೇ. 44ರಷ್ಟು ಕಡಿಮೆಯಾಗಿದೆ. ಸದ್ಯ ಇದೇ ಮಟ್ಟಕ್ಕೆ ಷೇರು ಬೆಲೆ ಇಳಿಕೆಯಾಗುತ್ತಿದೆ. "ಪೇಟಿಎಂನ ವ್ಯವಹಾರ ಮಾದರಿಯು ಫೋಕಸ್‌ ಮತ್ತು ನಿರ್ದೇಶನದ ಕೊರತೆಯನ್ನು ಹೊಂದಿದೆ," ಎಂದು ಹೇಳಿದ್ದ ಮ್ಯಾಕ್ವಾರಿ, ಕಂಪನಿಯನ್ನು 'ಕ್ಯಾಷ್‌ ಗಝ್ಲರ್' (ಅಗತ್ಯಕ್ಕಿಂತ ಹೆಚ್ಚು ನಗದು ನುಂಗಿರುವ ಎಂದರ್ಥ) ಎಂದೂ ಕರೆದಿತ್ತು. ಸಂಸ್ಥೆಗೆ ಲಾಭದಾಯಕತೆ ಸಾಧಿಸುವುದು ದೊಡ್ಡ ಸವಾಲಾಗಿದೆ ಮತ್ತು ನಿಯಮಗಳು ಹಾಗೂ ಸ್ಪರ್ಧೆಯು ತೀವ್ರವಾಗಿದ್ದು ಚಿಂತೆ ಹೆಚ್ಚಿಸಿದೆ ಎಂದು ಮ್ಯಾಕ್ವಾರಿ ವಿಶ್ಲೇಷಿಸಿತ್ತು. ಇದಾದ ಬಳಿಕ ಒಂದೇ ಸಮನೆ ಪೇಟಿಎಂ ಷೇರು ಬೆಲೆ ಇಳಿಕೆ ಕಾಣುತ್ತಿದ್ದು, ಮಾರುಕಟ್ಟೆ ಮೌಲ್ಯವೂ ದೊಡ್ಡ ಮಟ್ಟದಲ್ಲಿ ಕುಸಿದಿದೆ.