ಆಂಧ್ರ ನಗರ ಸ್ಥಳೀಯ ಸಂಸ್ಥೆ ಚುನಾವಣೆ, ಜಗನ್‌ ಪಕ್ಷದಿಂದ ಕ್ಲೀನ್‌ಸ್ವೀಪ್‌ ಸಾಧನೆ

ಅಮರಾವತಿ: ಆಡಳಿತಾರೂಢ ವೈಎಸ್‌ಆರ್‌ ಕಾಂಗ್ರೆಸ್‌ ಪಕ್ಷ (ವೈಎಸ್‌ಆರ್‌ಸಿಪಿ) ಆಂಧ್ರಪ್ರದೇಶದ ನಗರ ಸ್ಥಳೀಯ ಸಂಸ್ಥೆ ಚುನಾವಣೆಯಲ್ಲಿ ಐತಿಹಾಸಿಕ ಜಯ ಸಾಧಿಸಿದ್ದು, ರಾಜ್ಯಾದ್ಯಂತ ಸಿಎಂ ಅವರ ಪ್ರಾಬಲ್ಯ ವಿಸ್ತಾರಗೊಂಡಿರುವುದು ಸ್ಪಷ್ಟವಾಗಿದೆ. ಎಲ್ಲ 12 ಮಹಾನಗರ ಪಾಲಿಕೆಗಳಲ್ಲಿಯೂ ವೈಎಸ್‌ಆರ್‌ ಕಾಂಗ್ರೆಸ್‌ ಅಧಿಕಾರದ ಗದ್ದುಗೆ ಏರಲಿದೆ. ಅಲ್ಲದೇ ರಾಜ್ಯದ 75 ಮುನ್ಸಿಪಾಲಿಟಿಗಳ ಪೈಕಿ ಪಕ್ಷವು 74 ಕಡೆ ಆಡಳಿತದ ಚುಕ್ಕಾಣಿ ಹಿಡಿಯಲಿದೆ. ಅನಂತಪುರ ಜಿಲ್ಲೆಯ ತಾಡಿಪತ್ರಿ ಮುನ್ಸಿಪಾಲಿಟಿಯನ್ನು ಮಾತ್ರ ಟಿಡಿಪಿ ತನ್ನದಾಗಿಸಿಕೊಳ್ಳಲು ಯಶಸ್ವಿಯಾಗಿದೆ. ಇಲ್ಲಿನ 36 ವಾರ್ಡ್‌ಗಳ ಪೈಕಿ 18 ಟಿಡಿಪಿಗೆ, 16 ವೈಎಸ್‌ಆರ್‌ಸಿಪಿಗೆ ಮತ್ತು 2 ಇತರರಿಗೆ ಒಲಿದಿದೆ. ವಿಶೇಷವಾಗಿ, ವಿಶಾಖಪಟ್ಟಣಂ ಮಹಾನಗರ ಪಾಲಿಕೆ ವೈಎಸ್‌ಆರ್‌ಪಿಗೆ ಒಲಿದಿದೆ. ಆಂಧ್ರಪ್ರದೇಶದ ನೂತನ ಕಾರ್ಯಕಾರಿ ರಾಜಧಾನಿಯಾಗಿ ವಿಶಾಖಪಟ್ಟಣಂ ಅನ್ನು ಘೋಷಿಸಿದ್ದ ಸಿಎಂ ಜಗನ್‌ ನಡೆಯ ವಿರುದ್ಧ ಪ್ರತಿಪಕ್ಷಗಳು ಕಿಡಿಕಾರಿದ್ದವು. ಆದರೆ ಜಗನ್‌ ನಿರ್ಣಯಕ್ಕೆ ಜನರು ಸಾಥ್‌ ಕೊಟ್ಟಿರುವುದು ಸ್ಪಷ್ಟವಾಗಿದೆ. ಚಿತ್ರನಟ ಪವನ್‌ ಕಲ್ಯಾಣ್‌ ಅವರ ನೇತೃತ್ವದ ಜನಸೇನಾ ಜತೆಗೆ ಕೈಜೋಡಿಸಿ ಆಂಧ್ರಪ್ರದೇಶದಲ್ಲಿನೆಲೆಯೂರಲು ಯತ್ನಿಸುತ್ತಿರುವ ಬಿಜೆಪಿಗೂ ನಿರೀಕ್ಷಿತ ಯಶಸ್ಸು ಸಿಕ್ಕಿಲ್ಲ. 21 ತಿಂಗಳಲ್ಲಿ3ನೇ ಜಯ: ಪ್ರತಿಪಕ್ಷ ತೆಲುಗುದೇಶಂ ಪಾರ್ಟಿ (ಟಿಡಿಪಿ)ಯನ್ನು ಸತತ ಮೂರನೇ ಬಾರಿಗೆ ಸಿಎಂ ಜಗನ್‌ ಹೀನಾಯವಾಗಿ ಸೋಲಿಸಿದ್ದಾರೆ. 2019ರ ವಿಧಾನಸಭೆ ಚುನಾವಣೆಯಲ್ಲಿ ಮೊದಲ ಬಾರಿ ಚಂದ್ರಬಾಬು ನಾಯ್ಡು ನೇತೃತ್ವದ ಟಿಡಿಪಿಗೆ ಸೋಲಿನ ರುಚಿ ತೋರಿಸಿದ್ದ ಜಗನ್‌ ಅವರು ಕಳೆದ ತಿಂಗಳು ನಡೆದ ಗ್ರಾಮ ಪಂಚಾಯಿತಿ ಚುನಾವಣೆಯಲ್ಲೂಭಾರಿ ಅಂತರದಲ್ಲಿಪಕ್ಷಕ್ಕೆ ಜಯ ದಕ್ಕಿಸಿಕೊಡುವಲ್ಲಿ ಯಶಸ್ವಿಯಾಗಿದ್ದರು. ಮಾರ್ಚ್ 5ರಂದು ಗ್ರಾಮ ಪಂಚಾಯಿತಿ ಚುನಾವಣೆ ಫಲಿತಾಂಶ ಹೊರಬಿದ್ದಿದೆ. ಮಾರ್ಚ್ 10ರಂದು ನಡೆದ ನಗರ ಸ್ಥಳೀಯ ಸಂಸ್ಥೆ ಚುನಾವಣೆಯಲ್ಲಿಶೇ.65ರಷ್ಟು ಮತದಾನ ನಡೆದಿತ್ತು. ಜಗನ್‌ಮೋಹನ್‌ ರೆಡ್ಡಿ ನೇತೃತ್ವದ ಸರಕಾರ ಆಡಳಿತದ ಚುಕ್ಕಾಣಿ ಹಿಡಿದು ಎರಡು ವರ್ಷಗಳಾದ ಬಳಿಕ ನಡೆದ ಮಹತ್ವದ ಚುನಾವಣೆ ಇದಾಗಿತ್ತು. ಆಡಳಿತದಲ್ಲಿ ಭಾರಿ ಸುಧಾರಣೆ, ಜನರಪರ ಕಲ್ಯಾಣ ಯೋಜನೆಗಳ ಪರಿಣಾಮಕಾರಿ ಅನುಷ್ಠಾನದ ಮೂಲಕ ಕೊರೊನಾ ಆತಂಕದ ನಡುವೆಯೂ ಆಂಧ್ರದ ಜನತೆ ವೈಎಸ್‌ಆರ್‌ಸಿಪಿ ಜತೆಗೆ ನಿಂತಿದ್ದಾರೆ. ವೈಎಸ್‌ಆರ್‌ ಅವರ ಸಾಧನೆಯನ್ನು ಪುತ್ರರಾದ ಸಿಎಂ ಜಗನ್‌ ಮೋಹನ್‌ ರೆಡ್ಡಿ ಮುಂದುವರಿಸಿದ್ದಾರೆ. ಟಿಡಿಪಿಯನ್ನು ಆಂಧ್ರ ಜನತೆ ದೂರ ತಳ್ಳಿರುವುದು ಸ್ಪಷ್ಟವಾಗಿದೆ. - ಸಜ್ಜಾಲ ರಾಮಕೃಷ್ಣ ರೆಡ್ಡಿ, ವೈಎಸ್‌ಆರ್‌ ಕಾಂಗ್ರೆಸ್‌ ಮುಖಂಡ