IT Raid: ಮಹಾರಾಷ್ಟ್ರದಲ್ಲಿ ಆದಿತ್ಯ ಠಾಕ್ರೆ ಆಪ್ತನ ಮೇಲೆ ಆದಾಯ ತೆರಿಗೆ ದಾಳಿ

ಮುಂಬಯಿ: ಮಹಾರಾಷ್ಟ್ರದಲ್ಲಿ ಕೇಂದ್ರ ಸರ್ಕಾರ ಸ್ವಾಮ್ಯದ ಸಂಸ್ಥೆಗಳ ದಾಳಿ ಮುಂದುವರಿದಿದೆ. ಮಹಾರಾಷ್ಟ್ರದ ಸಚಿವ ಹಾಗೂ ಸಿಎಂ ಉದ್ಧವ್ ಠಾಕ್ರೆ ಅವರ ಮಗ ಅವರ ಆಪ್ತರಾಗಿರುವ ಪದಾಧಿಕಾರಿ ಮತ್ತು ಶಿರಡಿ ಟ್ರಸ್ಟ್ ಸದಸ್ಯ ರಾಹುಲ್ ಕನಾಲ್ ಅವರ ಮನೆಯ ಮೇಲೆ ಆದಾಯ ತೆರಿಗೆ ಇಲಾಖೆ ಅಧಿಕಾರಿಗಳು ಮಂಗಳವಾರ ದಾಳಿ ನಡೆಸಿದ್ದಾರೆ. ಶಿವಸೇನಾ ಸಂಸದ ಸಂಜಯ್ ರಾವತ್ ಅವರ ಉದ್ದೇಶಿತ ಸುದ್ದಿಗೋಷ್ಠಿಗೆ ಕೆಲವೇ ಗಂಟೆಗಳು ಮುನ್ನ ಈ ನಡೆದಿದೆ. "ಇಂತಹ ದಾಳಿಗಳು ಮಹಾರಾಷ್ಟ್ರದಲ್ಲಿ ಈ ಹಿಂದೆ ನಡೆದಿದ್ದವು. ಈಗ ಕೂಡ ನಡೆಯುತ್ತಿವೆ" ಎಂದು ಆದಿತ್ಯ ಠಾಕ್ರೆ ಪ್ರತಿಕ್ರಿಯೆ ನೀಡಿದ್ದಾರೆ. ಜಾರಿ ನಿರ್ದೇಶನಾಲಯದ ಒಳಗಿನ ಹುಳುಕುಗಳನ್ನು ಬಿಚ್ಚಿಡುವುದಾಗಿ ಸಂಜಯ್ ರಾವತ್ ಹೇಳಿದ್ದರು. ಅದೇ ವೇಳೆ ಐಟಿ ದಾಳಿ ನಡೆದಿದೆ. ಮುಂಬಯಿ ಮತ್ತು ಪುಣೆಯ ವಿವಿಧ ಸ್ಥಳಗಳಲ್ಲಿ ಐಟಿ ಅಧಿಕಾರಿಗಳು ಪರಿಶೀಲನೆ ನಡೆಸಿದ್ದಾರೆ. "ಈ ವಿಚಾರದಲ್ಲಿ ಕೇಂದ್ರ ಸಂಸ್ಥೆಗಳನ್ನು ಹಿಂದೆ ಕೂಡ ದುರ್ಬಳಕೆ ಮಾಡಿಕೊಳ್ಳಲಾಗಿತ್ತು. ಇದು ಪಶ್ಚಿಮ ಬಂಗಾಳ, ಆಂಧ್ರಪ್ರದೇಶಗಳಲ್ಲಿ ನಡೆದಿತ್ತು. ಮಹಾರಾಷ್ಟ್ರದಲ್ಲಿ ಚುನಾವಣೆಗಳು ನಡೆಯಬೇಕಿರುವುದರಿಂದ ಇಲ್ಲಿ ಕೂಡ ನಡೆಯುತ್ತಿವೆ. ಈ ಕೇಂದ್ರ ಸಂಸ್ಥೆಗಳು ಸ್ವತಃ ಬಿಜೆಪಿಯ ಪ್ರಚಾರ ಯಂತ್ರದ ಮಾರ್ಗವಾಗಿ ಪರಿಣಮಿಸುತ್ತಿವೆ. ಆದರೆ ನಾವು ಇದರಿಂದ ತಲೆಬಾಗುವುದಿಲ್ಲ. ಮಂಡಿಯೂರುವುದಿಲ್ಲ" ಎಂದು ಅವರು ಹೇಳಿಕೆ ನೀಡಿದ್ದಾರೆ. ಶ್ರೀ ಸಾಯಿಬಾಬ ಸಂಸ್ಥಾನ ಟ್ರಸ್ಟ್‌ನ ಟ್ರಸ್ಟಿ ಹಾಗೂ ಪ್ರವಾಸೋದ್ಯಮ ಸಚಿವ ಆದಿತ್ಯ ಠಾಕ್ರೆ ಅವರ ಆಪ್ತ ರಾಹುಲ್ ಕನಾಲ್ ಮತ್ತು ಹಿರಿಯ ಶಿವಸೇನಾ ನಾಯಕ ರಾಮದಾಸ್ ಕದಂ ಅವರ ಸಹೋದರ ಸಂಜಯ್ ಕದಂ ಹಾಗೂ ಒಬ್ಬ ಸರ್ಕಾರಿ ಅಧಿಕಾರಿ ಸೇರಿದಂತೆ ವಿವಿಧ ವ್ಯಕ್ತಿಗಳ ಮನೆಗಳು ಹಾಗೂ ಕಚೇರಿಗಳ ಮೇಲೆ ಐಟಿ ಅಧಿಕಾರಿಗಳು ದಾಳಿ ನಡೆಸಿದ್ದಾರೆ. ರಾಹುಲ್ ಕನಾಲ್ ಅವರು ಯುವ ಸೇನಾ ಕೋರ್ ಸಮಿತಿಯಲ್ಲಿದ್ದಾರೆ. ಫೆ. 25ರಂದು ಶಿವಸೇನಾ ಕಾರ್ಪೊರೇಟರ್ ಯಶ್ವಂತ್ ಜಾಧವ್ ಮತ್ತು ಇತರರ ಮೇಲೆ 130 ಕೋಟಿ ರೂ.ಗೂ ಹೆಚ್ಚಿನ ತೆರಿಗೆ ವಂಚನೆ ಆರೋಪಗಳಿಗೆ ಸಂಬಂಧಿಸಿದಂತೆ ಐಟಿ ದಾಳಿ ನಡೆಸಲಾಗಿತ್ತು.